EZAYI 6 - Kalate Zambe Nnomo a Mfefe Mfefé Nkôñelan

Ezayi a wô'ô nloone Zambe

¹ Mbu njô bôt Ozias a nga wu, me nga yene Nti a too éto njôane é ne étua mbetane yôp, minwôndé ya ayab ézingi jé mi nga yiane Nda Zambe.

² Besérafeñ be nga tele nye mfa'a ya nlô yôp; wua ase y'été a nga bili mefab mesaman; a nga belane mebaé mfa'a ya buti asu mebaé mfa'a ya buti mebo a mebaé mfa'a ya yele;

³ Be mbe be yôta'an wua e nyô mbo'o na: Étyi, étyi, étyi! E be Nti, Nyô a ne ngul ése, si ése é jaéya ne lut a étôto'o jé!

⁴ Mimbôka'a ya mimbé mi nga ti'itan amu tyiñe ya nyô a mbe a yôta'an, a Nda Zambe ése é nga jaé a ôtita.

⁵ Nde ñhe me nga jô na: Ngo'o ma! Me jañeya, amu me ne môte biyaé bi ne te *mfuban, a me too ézezañe ya bôte biyaé bi ne te *mfuban, a mise mam me yeneya njô bôt, Nti ya *minsamba mewosan.

⁶ Ve wua ya besérafeñ a nga yele a zu be ma, a bili atye'e nduane wo nde a nga to'é ata'a metuna'a yôb a abas.

⁷ A nga nambe anyu dam a atye'e nduane te a jô na: Jôme ji é nambeya biyaé biôé; bikobe biôé bi vaseya a *abé dôé é ntoo *njaman.

⁸ Eyoñe te me nga wô'ô tyiñe Nti é jô'ô na: za ma ye lôm a za a ye wulu asu dangan' Nde me nga yalane na: Me nyô, lôme ma.

⁹ Nye na: Kelek, a wo ye jô bôte bete na: tuka'a vô'ôlan, ve teke wô'ô jôm, Tuka'a fomban, ve teke yemelan.

¹⁰ Bo'o minleme ya bôte bana ayet bo'o melo mabe ndok a bo mise mabe ndim, be za yen a mise map nge wôk a melo map, nge bi fek a nleme wop, be za kôñelane minlem a nyiñ.

¹¹ Ane me nga jô na: a Nti, a kui éyoñ évé, nde a nga yalane na: akekui bitison bia ye bo teke fe bôt a menda teke fe bôt be vee, si fe ja ye bo v'éli'i élik;

¹² akekui Nti a ye mane vaa bôt be ke ôyap. A si ja ye li'i teke môt

¹³ Nge ngap awômô ya bôt be né ja li'i ane *mebuka'a, ngabe bôt éte ja ye di'ibane nduan v'aval ane ôkô'a a élôn bia ba'ale bikume biab éyoñ bi maneya ba'éban, nalé ate ekume ya ngab éte Ja ye ve mvoñe bôt é n'étyi.