EZAYI 54 - Kalate Zambe Nnomo a Mfefe Mfefé Nkôñelan

Mfefé élate ya * mvo'é zañe Zambe a Israél

¹ Dañek, a nkôkôm, wo ô nji ke biaé mon! Bete'e tyiñe ya ndañan a fôn, a wo ô nji tame yeme mintaé y'abiaé! Amu bone be minga a nga li'i éngôngo ba ye bo abui a dañe ba be nyô a ne nlu'an nalé Nti a jô.

² Nene'e afôla ya *nda éndelé jôé; be ndamé'é bindelé ya étaba'a jôé; te wo kamane bie! Limiti'i minkole miôé a yemete mekône môé!

³ Amu wo ye nene mbo nnôm a e mbo ngal; mvoñe bôte jôé, ja nyoñe meyoñ me bo jôme jé, a ja ye fôle bitison bi ntoo bilik.

⁴ Te ko woñ amu ôson wo ye bo te bi wo; te tebe ne zemeté amu wo ye bo te same; ve wo ye vuan ôsone ya melu ô mbe ésoé, a wo ye bo te beta simesan ôsame ya éyoñ ô mbe nkus.

⁵ Amu nyô a nga té wo a ne nnôme wôé, jôé dé e ne na Nti ya *minsamba mewosan, a *nkôté wôé a ne Nyô y'Israél a n'étyi, jôé dé e ne na: Zambe ya si ése;

⁶ Amu Nti a beta nyoñe wo ane minga be nga suu nye nsisime wé ô ne mbiban a ôlun. Ye môt a ne suu minga a nga jô nye ndôman! Nalé Nti a jô!

⁷ Me nga li'i wo tañ étun éyoñ ve ma ye beta nyoñe wo a abui nkoon éngôngo;

⁸ e ñwô'an ôlun wo nemban été, me nga vaa asu dame be wo ôyôme nté, ve ma ye mvamane wo a nye'an ô too nnôm éto, nalé Nti, *nkôté wôé a jô.

⁹ Mfa'a wom da ye bo ane melu Noé: me nga kane ngana na: mendim me Noé ma ye bo te beta mialan e si nyô; avale te ma kane ngana na: ma ye bo te beta wô'ô wo ôlun, nge bo wo ayok.

¹⁰ To'o beta minkô ba fô'ôsan, to'o ke bone minkô ba ndeñetan, ve mvame jam ma liti wo ja ye bo te man, a élate *mvo'é jam ja ye bo te tyamé. Nalé Nti, nyô a ko wo éngôngo a jô.

Nti Nyô a kaman Israél

¹¹ A wo ô n'éngôngo, ntya'an ébôm a ôkôs a teke môt a volô wo *nlem! Ô lôô ma ye bé meko'o môé abeñe meyañ été a bôôé mimbôka'a miôé e meko'o me Safir été;

¹² Minsoñ y'andile dôé, ma ye bo mie a meko'o me rubis, a bo mimbé miôé a meko'o me éskarbukel, aka'a dôé ki a meko'o me n'édima.

¹³ Bone bôé bese ba ye bo beyé'é be Nti, afo'o ya bone bôé da ye bo anen.

¹⁴ Zôsôô a ye yemete wo wo ye tebe étibela'a ôyap amu ô nji ke bi jôm wo ko woñ; wo ye fe tebe ébubua jam ôyap amu ja ye bo te kui wo bebé.

¹⁵ Nge ba té wo ntañete jame te da ye bo te so be ma; môt ase a ye té wo ntañete a ye ku amu wo.

¹⁶ Ô lôô me téya nlui melui nye a vuñulu ma'a me nduan a nye a lui évôle bita avale dé; ve me téya fe ntyame mam asu ya bu'u évôle te.

¹⁷ Evôl bita ése é ne nluibane na é wosane wo, ja ye bo teke jam; a ôyem ôse via ye bet a wosane wo aba mejô wo ye te'e vie a mveane wô mekua. Ngabe bebo bisaé be Nti nje le. Zôsôô wop a so be ma nye le, nalé Nti a jô.