EZAYI 5 - Kalate Zambe Nnomo a Mfefe Mfefé Nkôñelan

Afube ndi'i woone Nti e ne Israél

¹ Me tame yia mvôé jam jia ya nyô ma dañe nye'e a afube mindi'i dé. Nyô ma dañe nye'e a nga bili afube mindi'i mi woon e mfa'a nkô ô n'abui atek.

² A nga tyee si a vaa *mekok, nd'a nga bé ndi'i woon wo dañe mvaé, Ezezañ, a nga lôñe *nda benonô afup a fa'a ébé ba miate bibuma. A nga yange na mbamba bibuma bia ye wum été, ve viane teme na bibuma bi n'abé mbie bi nga viane wum été.

³ Eyoñe ji, a bôt be too Yérusalém, A bôte ya Yuda, bo'one betyi'i mejô e zañe bia afube mindi'i dam.

⁴ Za jam afe e nga yiane beta boban e be afube mindi'i dam nde me nji ke bo asu dé' Amu jé da bobane na Eyoñe me nga yange na e wum mbamba bibuma e nga viane wum bibuma bi n'abé'

⁵ Eyoñe ji ma zu kate mia e jam ma ye bo afube mindi'i dam: ma ye té nka'alé wo bômane de, A mimbame betit mia ye di de. Ma ye bu'u afôla éziñ ya mfin wo bômane de Nalé ba ye tibi de a mebo.

⁶ Ma ye bo de ne sangaññ, ba ye bo te sebe de nge bale de biyo a ndôé bia ye faa été, a ma ye kamane minkut mi bo te noo mveñ été.

⁷ Afube mindi'i Nti ya minsamba mewosan e nji bo jôm éfe ve Nda bôte Israél. A bôte ya Yuda be ne Atôk a mbe a dañe nye'e. A nga yange nya ntyi'ane mejôô be nye, ve miñyône bingôngole bi bôt mmie mia viane wô'é.

Biyo'é biwôlô bi bôte ya Yuda

⁸ Ngo'é ba ba beté *nda fe e nyô be bili yôp, a beté fe afub afe e di be bili yôp, a kui ba mane nyoñe vôm ase A su'ulane tabe si ve beebe.

⁹ E ngana *nti ya minsamba mewosan e é wô'éya e melo mam été na: ézu'u menda, ma me n'anen a abeñ, ma ye bo bifut amu teke bôt ba tabe été.

¹⁰ Beéktar b'afube mindi'i belaa, ba ye bo te ve lita woon mewôm metan. Môt a bé kili nlisi ntet a ye kôane ve awôme da.

¹¹ Ngo'é ba ba kune kôlô si a jeñe binyunyui bi ne ngu, éyoñe ngô'é é ntoo abui, ba ve nyôl ayôñ a woon!

¹² Engombé a mvet, ngom a ndiñ, bia kobô e menda menyu map, ve be ne te fombô e jame Nti a bo, a teke yen e mame mo mé ma bo.

¹³ Ajô te ayoñe bôte dam da ye ke minkôm amu ñyemane momo. E bôte si é too be ndi ba ye wu zaé, A jama bôt a ye wu évé.

¹⁴ Eyoñe te ébé ja ye ndamé anyu ne ngeññ A vundi éngoñ; beta be bôt a bone be bôt ba ye sis été, a melitane mab a meva'a map.

¹⁵ Ajô te bôte bese ba yiane luu mesu si, a di mbuluk; e môt a ne mise bivéé a yiane sili mise mé si.

¹⁶ Nti y'émo ése a ye liti anene dé éyoñ a ye telé nkômane mame wé e Zambe a n'étyi A ye liti étyi jé éyoñ a ye beta telé nya ntyi'ane mejôô.

¹⁷ Bitoñe mintômba bia ye di valé ane vôme wob be wô'ô di, a biyem bi ne avem bia ye di e bili'i ya vôm bi nga too beyeñ.

¹⁸ Ngo'é e ba ba dutu *abé si a minkole ya minsos a dutu fe ékobe si a minkole mi vagoñ.

¹⁹ A ba jô na: A bo'ok avô, e jam a kômbô bo a bo'o de avô bi yen. Ôsimesane Nyô y'Israél a n'étyi ô yené'é a ô boba'an nalé ate bia ye yeme wô.

²⁰ Ngo'é bôt ba jô mvaé na *abé a *abé na mvaé! Ba veñesane dibi na e bo éfufup, a éfufube na e bo dibi. Jôm é n'avoé ba nyoñe je ayô a ji é n'ayô ba nyoñe je avoé!

²¹ Ngo'é ba ba yene bebiene na be ne fek, a tyi'i bebiene na be ne mintyetyeñ!

²² Ngo'é e bôt be ne mimbene ya menyu a bemedañ ya mbundane bilam.

²³ Ba kale e môt a yiane ku amu tañ a bene ve môt a ne te bijô mekabe mé.

²⁴ Ajô te, aval ane nduan ja di'i mimbop, a aval ane bikumba bi fôn bia jañ e nkaba'a nduan été nalé ate ba ye boé ataté minkañ, a e same jab ja ye yele ane mbuluk, amu be nga bene ñye'elane Nti ya *minsamba mewosan, a be nga biasé nkobô Nyô ya Israél a n'étyi.

Ayaa Nti

²⁵ Ajô te ayaa Nti da yôñ e be bôte bé, a same wo wé na a bôme be, Minkôl mia fô'ôban, a mimbime miab mia funane mbuan ô ne minjoñe yôp. V'akôsa bo mam mete mese, ayaa dé e nji bulane mvus a e wo wé ô ngenane nsaman.

²⁶ A bete nlinga asu ayoñ e n'ôyap, a loone de a éloñ é so'o meku'u ya si, tame yen ane da bo avô a da ji'a zu.

²⁷ Teke wua ya bôte bé a ne nte'an, teke wua y'été a kolé ôbak, teke wua a ndeñ nge ke ôyo, meses me tii be mengeteñ me ne teke kulan, a minkole besilefase miab teke téé.

²⁸ Mekoñ m'élaé mé me ne njeban, bilaé bié bise bi ne nkolan, bibo'os ya bikabela bié bi ne ane *mekok, minka ya bevagoñe bé ki ane ôlende.

²⁹ Mbamane wé ô ne wu ngale ngbwengbwem, ngale ngbwengbwem ate a bam ane bitoñ bengbwengbwem, a bôm a bi jôme jé a yiane bi a kee je, teke jôm é ne wôlé nye je.

³⁰ Ve *môs ôte, ba ye bame nye, *mvam éte é funa'ane éduñe mañ. Ba ye fombô mfa'a ya si a yene dibi a ôlun, afibe *nkut da ye bo éfufube naé na é bo dibi.