EZAYI 44 - Kalate Zambe Nnomo a Mfefe Mfefé Nkôñelan

Nti étam a ne Zambe

¹ V'éyoñe ji, vô'ôlô'ô a Yakob, mbo ésaé wom. A Israél nyô me nga top!

² Avale di nde Nti, nyô a nga kôme wo, Nyô a nga mé wo aso abialé dôé, nyô a n'ésuka'a jôé a jô na: te ko woñ, a mbo ésaé wom Yakob, Yésurum, nyô me nga top.

³ Amu ma ye sôé nyô a wô'ô évé mendim a atôñe mendim e si é ne nkôte yôp; ma ye sôé Nsisime wom e mvoñe bôte jôé, a ébotane jam e be bone bôé.

⁴ Ba ye faa ézezañe mbamba ôbut été aval ane bone bilé ya mfôm asôé.

⁵ Wua a ye jô na: Me ne nyô Nti nyô mbok a ye lobane jôé Yakob, mfe a ye tili akule wo wé été na: me ne jôme Nti; a a ye tabe jôé Israél ndi.

Zambe a bulane ve bôte bé étôto'o jap

⁶ Avale di nde Nti, njô bôt Israél, Nyô a kôté nye, Nti ya *minsamba mewosan a jô na: me ne môt ôsu a nyô a su'ulan, Zambe mfe a nji bo ve ma.

⁷ Za a ne kobô aval'ane ma' A tame kate de a liti ma de! Ataté éyoñe me nga té bôt melu mvus, a tame kat e mam ma ye boban, a kate fe ma ma ye zu!

⁸ Te fô'ôban, a te koone woñ. Ye me nji bo wo na ô wô'ô de, a kate wo de aso ayap' Ye mi nji bo ma bengaa y'été' Nge ô vaa ma, ye *zambe mfe a ne' E ne fo'o bebela na te k'akôm éziñ e né, me dimi'i de.

⁹ Ba ba mé azezambe, bese be ne ve momo, bive'ela ba jeñ bi ne teke mfi. Bengaa babe bebien, be nji yene jôm, a, asu ôsone viap, be nji yeme jôm!

¹⁰ Za a tameya mé ôzezambe, nge nyemen ngunemelan asu njembane mfi'

¹¹ Tame yen ane *bebuni bé bese ba woban ôson, bebaa biôm be ne ve bôt! Be sula'ane bese a teb'asu dam: ba ye fô'ôban a woban ôsone bese nsamba.

¹² Nlui étyé a lui ôvôn, a tulan vie e metye'e me nduan été, a nga mé vie a vamak. a bo vie ésaé a wo ô bili ngu, ve nge a tabe te di, ngule jé ve man. Nge a nyu mendim, a ye tek.

¹³ Mbaa bilé a limi nko, a mane kañe jôm a kômbô ba a nkôs, a nga tyi'i je a njo, yaa a kañe je a kompa, a ve je éve'ela môt, étôto'o môta binam, ane é ne nguleya tabe *nda zambe,

¹⁴ ane be ne tyi'i besédre asu duma dé. Môt a nyoñ ôkô'a a tôm, e bilé y'afan, a kômbô na bi bo ngul asu dé, môt a bé élé ba loone péñ, ve mveñ nje ja bo na é yaé.

¹⁵ Asu môt, bilé bite bi ne nja'a ba di'i nduan: a nyoñe je asu ya wobane nduan, a bo'é je nduan a yame bidi été, v'a belane fe nja'a éte asu ya ba ôzezambe, a nga kañe fe wô, a bo nja'a éte *ngunemelan, a nga kute fe je meboñe si,

¹⁶ a nyoñ éfase ya nja'a éte, a nga di'i je nduan, éyoñe te fe a beté tit a ye di été yôp: a yañ nyañane tite wé, a nga di a jaé; a nga wobane fe nduan a jô'ô na: aaa! Aaa! Ma wobane nduan, me lôô évele nkaba'a!

¹⁷ Abime da buk a nga kôm ôzezambe, ngunemelane jé, a nga kute meboñe si a kañe je, a nga ye'elane je a jô'ô na: kôté'é ma amu wo ô ne *zambe wom.

¹⁸ Be ne teke wôk, be ne teke yeme yemelan, amu bikabak bi ne be mis abui na be bo te yen, minleme miap mi ne fe nalé na be bo te fas!

¹⁹ Teke môt, e nleme wé été, a bulane mvuse na a wôk a fas a jô'ô na: me maneya di'i éfase nja'a e nduan, me maneya yame bidi e ma'a yôp, ma yame tit a di je, nja'a ja li'i me nga bo je jôm ôson, ma ye fe kôme kute meboñe si asu aboñ élé!

²⁰ Môt a kôme kabetan asup nleme wé ô du'ubaneya, wo jañele nye fé; a ye bo te kôtéban! V'a ye fe kate jô na: jôme me bili mo ji, ye é se medu'ane nga'

²¹ A Yakob, simesa'an e jame di, a Israél ô ne mbo ésaé wom, me nga mé wo ane mbo ésaé asu dam; wo, a Israél wo ye bo te ve ma ôsone nyô;

²² ane *nkut a ane ôtita me fimiya *abé dôé a bikobe biôé; bula'ane be ma amu me kôtéya wo.

²³ A yôp, kute fas, amu Nti a boya; mia bido'o ya si, loñan ayenga! Mia beta minkô, kutane fas! Nalé fe mia mefan a bilé bienan bise! Amu Nti a kôtéya Yakob, a kulaneya duma dé e Israél été.

²⁴ Avale di nde Nti nyô a kôté wo, nyô a nga mé wo aso abialé dôé a jô na: ma, Nti, ma bo mam mese, ma étam ma same yôp, mamiene fe ma ndamé si.

²⁵ A bo mendem me ne minsos momo; a bo mimvimvi'i na mi so'o mekut. A bo mimfefe'e na mi bulane mvus a kôñelane ñyemane wob jôme ya *te fek.

²⁶ A yemete nkobô mbo ésaé wé a tôé mame minlômane mié mia taté kat. A jô ajô Yérusalém na: bôt ba ye beta tab'été, a ajô bitisone ya Yuda na: ba ye beta lôñe bie. A jôm é ntoo bilik, ma ye bo je na é beta bo nya jômô.

²⁷ Ma jô mendim me n'édo'o na: vele'e, ma ye vele asôé dôé.

²⁸ Ma loone Sirus na: mba'ale mintômba wom! A ye jalé minkômbane miam mise. A ye jô ajô Yérusaleme na: be beta'a lôñe nye! A ajô *nda Zambe na: be beta'a bo mbôka'a y'été.