EZAYI 43 - Kalate Zambe Nnomo a Mfefe Mfefé Nkôñelan

Nti étam nye a kôté Israél

¹ Avale di nde Nti, nyô a nga té wo a Yakob! Nyô a nga kôme wo a Israél! A jô éyoñe jina na: te ko woñ amu me kôtéya wo. Me looneya wo a jôé dôé: ô ntoo éñwom.

² Nge wo lôt e mendim été, ma ye tabe be wo, nge wo dañ asôé e n'anen, da ye bo te yandane wo yôp; nge wo wulu e nduan été, wo ye bo te dik, a nkaba'a nduan wo ye bo te mane tume wo.

³ Amu me ne Nti, e Zambe wôé Nyô y'Israél a n'étyi, *nkôté wôé; ma v'Ejipte asu ngôtô jôé, Etiôpi a Séba e señe jôé.

⁴ Amu ô ne anen e mise mam, amu ô bili ésemé a amu ma nye'e wo, nde ma ve bôt e señe jôé, a *meyoñ me bôt asu ényiñe jôé.

⁵ Te ko woñ, amu me ne be wo; Ma ye soo mvoñe bôte jôé mfa'a jôp da tôô, a ma kôane wo aso jôp da dim.

⁶ Ma ye jô akôé na: Ke'e ma! A nké na: Te bi! Bo'o bobefame bame na be so ôyap a bobebinga bame na be so aku'u si,

⁷ ba bese be be'e jôé dam, ba bese me nga té, me nga mé a me nga kôme na be liti duma dam.

⁸ Be kuli'i ayoñe bôt e ne ndim atan, a too ke na be be'e mis, nalé fe mindôndok, a too ke na mi be'e melo.

⁹ Meyoñ me bôte mese me ne te yeme Zambe me sula'ane vôme wua a ba bôtô a kô'ane fe vôme wua. Za ya be be a nga kate foé ya mam mete' Bevé be nga ye'ele bia mam y'ôsu me nga boban' Be liti na ba kobô bebela; bi vô'ôlô be a bi bo nguleya jô na: mia bele!

¹⁰ Mia mi ne bengaa bam, nalé Nti a jô, mia a mbo ésaé wom me nga top, nalé ate mia ye yeme nye, mia ye buni ma a yeme na: Ma le; Zambe mfe a nji bo ma ôsu, a mfe aa ye ke bo ma mvus

¹¹ ve mamiene fo'o me ne Nti, nge ô vaa ma, nyii bôte mfe a nji bo.

¹² Ma me nga kate foé, ma me nga nyii a ma me nga kuli mejô; saake ôzezambe bikuu, be ne koone wô e be mia. Ajô te ñhe mi ne bengaa bam, nalé Nti a jô; ma me ne Zambe.

¹³ Me ne nye, te na *môs ô téban, a teke jôm é ne kôté môt e wo wom été; nge me jô na ma bo ana, za a ne tebe ngame yat'

Ma lôme môt éziñ asu denan

¹⁴ Avale di nde, Nti a jô, nyô a kôté wo, nyô y'Israél a n'étyi na: asu denan nde me nga lôme môt a wosane Babilôn. Ma ye bo na be mane kubu ôsôé, bôte ba tube bete bese, be Kaldééñ bete be too besitima meva'a map été.

¹⁵ Me ne Nti, Eñwônan a n'étyi, njô a nga té Israél njô bôte wônan.

¹⁶ Avale di nde Nti a kobô, nyô a nga limi njoñ e mañ été, a *zen e mendim me ne ngul été,

¹⁷ Nyô a nga sô'ôlô bevagoñ a bikabela, bi wulu e fé été, nalé fe minkane bita a biwôlô bi bôte biabe ya mewosan; minkane bita mite mi nga mane ku, te fe nguleya beta kôlô si. Ve mane dim a dik ane nsañe lambe, a jô'ô na:

¹⁸ te simesane mam y'ôsu me nga boban, nge semé nnôme jam.

¹⁹ Mi lôô ma zu bo mfefé jam, nde le da zu, ngaa mia ye yeme de' Ye mia ye fo'o yeme de' Ma ye tube *zen e *nkôte si, a bôé asôé e si é n'ayet.

²⁰ Betite ya fé ba ye kañe ma, bitumba a b'éngutu, amu mveane ma ye ve mendim e *nkôte si, a amu asôé ma ye bôôé e si é n'ayet, asu ya ve ayoñe bôte dam me nga top mendime ya nyu.

²¹ Ayoñe bôt me nga bo asu dam da ye yia ma bia y'ékaña'a.

²² Ve sa ke ma ô nga loon, a Yakob! Amu ô nga kate ma, a Israél!

²³ Ô nji ve ma bone mintômba bôé mveane ba di'i ngumba, *bityi'a metuna'a biôé bi nji bo asu duma dam; me nji yemete wo na ô bo ma mimvean, nge ve wo some nyô ajô ôtu.

²⁴ O nji kuse nkaé ô n'étyita'a be ma a moné, a ô nji ve m'abume nlem a mevoñe ya *bityi'a biôé; v'ô nga tindi ma éto *ôlo été a mboon *abé wôé. ô nga te'e ma nyô a bikobe biôé.

²⁵ Ve mamiene fo'o ma tyame mbia mimboone miôé, amu ma nye'e mamien, a ma ye bo te beta simesan *abé dôé.

²⁶ Ba'ala'an e jam wo ve ma de bijô, bia bebaé e ntame sañetane jame te, tame tote mam ma ve wo mekabe

²⁷ Esoo wôé y'ôsu a nga bo *abé, a bebii ntume bôé be nga bene njôane wom,

²⁸ ajô te me nga bo bivete ya vôm a n'étyi ane zesé bôt, me nga kee Yakob e njañ a Israél e metaa été.