EZAYI 42 - Kalate Zambe Nnomo a Mfefe Mfefé Nkôñelan

Mbo ésaé Nti

¹ Mi lôô mbo ésaé wom nye ma suk, ntobane wom nye nleme wom wo yene mvaé: me futiya nsisime wom e be nye. a ye kulane *meyoñ me ne te yeme Zambe nya ntyi'ane mejô.

² A ye bo te yôtan, te bete tyiñe yôp nge bo na é wô'é e minjoñ.

³ A ye bo te té nkaé ô ne ntusane si, nge dime nsañe lambe wo nyoñ; a ye liti ntyi'ane mejô avale bebela a né.

⁴ A ye bo te tek nge bo meveñ, v'akekui a teléya nya ntyi'ane mejô e *si nyô, a bikôte bi mañ bia ye yange metiñe mé.

⁵ Avale di nde Zambe a kobô, nyô a ne Nti, nyô a nga té yôp a ndamé je, nyô a limiti si a biôm bia faa été, nyô a ve ba be too si éte mvebe, a ényiñ e be ba ba wulu été.

⁶ Ma me ne Nti, me nga loone wo avale da yian, me nga bi wo e wo, me nga nañele wo na ô bo ékasa'a y'élat e zañe jam a ngum *si nyô ése, a na ô bo éfufube ya *meyoñ me ne te yeme Zambe,

⁷ Asu ya kui mindindime mis, asu ya bo na mimbôk mi kôlô menda mimbôk, a bo bôt be too dibi été na be kôlô afanefane mevôm.

⁸ Me ne Nti, éyôlé jame le; a ma ye bo te ve môte mfe duma dam. nge ve bengunemelan ékaña'a ja yiane ma.

⁹ Mi lôô na mam me nga taté kui me maneya tôéban, a éyoñe ji ma kate mia e mame ma bobane mimfefé, a ma kate mia me te na me za boba'an.

Mfefé jia

¹⁰ Yi'ane Nti mfefé jia, jia ya nkañan jé ataté aku'u ya *si nyô: mia mia wulu mañ, mia mintéan mise mi too ôyap.

¹¹ Nkôte si a bitisone bié bi bete'e tyiñe yôp, nalé fe minlame Kédar a too! E bôte be too Séla be tôta'an ayenga! Ayenga mevak e yôta'an aso abôbône minkô!

¹² Be tame ve Nti duma, a be tame mialan ékaña'a jé e bikôte bi mam!

¹³ Nti a so ane mben, a ne nkômesane ya wosan, ane môta bita, a bame ngule tyiñe bita, a soñe besiñe bé a dañe be.

¹⁴ Me tabeya évôl a ayap. Ma dib anyu, ma ba'a mamien; ma tat ane minga a kô'ôlô mie avale ma sañelan nde fe ma veb'abuk.

¹⁵ Ma ye fimi beta minkô a bone minkô a ma ye mane kôtô bilo'o bise; ma veñesan asôé e n'anen e bo bikôte bi mañ, a ma ye bo menjeñe mendime na me mane kôt.

¹⁶ Ma ye bo mindindime na mi wulu e zene mi mbe te yem, ma ye ke ma ya'ale mie a so zene mi mbe mi dimi'i; ôsu viap ma ye veñesane dibi é bo éfufup, mevôm me n'ékotekot, me bo nje'ese, jame te ebien nde ma ye bo.

¹⁷ Ba ye bulane mvus a ôson wo ye bi be, e ne na: e ba bese ba tabe ndi e be bengunemelan, e ba ba jô ñyeman étyé na: mi ne bezambe bangan.

¹⁸ A mindôndok, vô'ôla'an! Mia mindindim fomba'an a yen!

¹⁹ Za a ne ndindim, ye sa mbo ésaé wom, a ndôndok ane mbe'e mefoé wom ma lôm' Za a ne ndindim ane nyô a kooneya *mvo'é, ndindim ane mbo ésaé Nti'

²⁰ Ô maneya yen abui mam, v'ô nji tabe de ntye; be maneya ku'i wo melo, v'ô nji wôk.

²¹ Nti a nga kômbô ve metiñ anen, a mvaé, amu *zôsôô wé.

²² Ve bana be ne e ba bôt be nga mane sa biôm a li'i be mo minsoé, be nga bi be ôlam e beta bibé été a be solô e menda mimbô'ô été be ntoo mbilan a teke môt a nyii be, be ntoo mo minsoé, ve teke môt a jô na: bula'ane bia be.

²³ Za ya be mia a ye kee alo e mame ma' Za a ye kômbô tabe me ntye ane a ye vô'ôlô melu ma zu'

²⁴ Za a nga kalane Yakob e be ba ba li'i ba bevok mo minsoé, a kalan Israél e be ba ba sa' Ye saa Nti, nyô bi nga bo *abé' Be nji kômbô wulu e mezene mé, a be nji ke vô'ôlô metiñe mé.

²⁵ Ajô te a nga sôé ayôñe y'ayaa dé njete ya mewosane mé e nyôl Israél. Bita bite bi nga sôé nye nduane nyô bifase bise; a a nji fe beta kômbô yeme jôm éziñ; a nga mane di'i Israél v'Israél a nji nyoñe jame te anene mfa'a wé.