EZAYI 41 - Kalate Zambe Nnomo a Mfefe Mfefé Nkôñelan

Israél a yiane tabe ndi e be Nti

¹ A mia bikôte bi mañ, taba'ane bivô a vô'ôlô ma! Meyoñ me bôt me tame vumelane ngule jap, me tame zu bebé a me kobô'ô! Nteba'ane nsamba asu ntyi'ane mejô.

² Za a nga soo nyô nkobane mejô wo loone na a tôñe wô mfa'a jôbe da tôô' Za a nga kalane nye *meyoñ me bôt a bo bejô bôt alo' Nkpwaté mekône wé wo veñesane be mbuluk a *élaé jé ki ja bo be bikumba bilo'o bia mialan!

³ A tôñe be, a a lôt be teke nye yen. Mebo mé me ne te nambe tyia.

⁴ Za a nga bo a tôé mam mete' Nyô a loone miaé mi bôt aso atata'a. Ma, Nti me ne nyô y'ôsu a ma ye fe bo ngabe ya ba ba su'ulan.

⁵ Bikôte bi mañ bia yene nye *a ko woñ. Meku'u me si ma fô'ôsan, ma subu bebé, ma zu.

⁶ Ma volan, jia é volô'ô ji évok. A môt ase a jô monyañe na: Bo'o ngule *nlem!

⁷ Nyô a ba biôm a ve nyô a nyemen biôme ngule nlem; nyô a biñeli biôm a vamak, a ve nlumelui ngule nlem; a jô nlatane bityé a nduane na: Ô n'abeñ! A a yemete *ngunemelan a mesene na é bo te ku.

⁸ Ve wo, a Israél, mbo ésaé wom, Yakob, nyô me nga top, mvoñ Abraham, mvôé jam!

⁹ Wo me nga bi meku'u ya si nyô a loone wo e mevôme y'été ma dañ ôyap, e wo me nga jô na: ô ne mbo ésaé wom, ma tobe wo, a te beta wua wo fé!

¹⁰ Te ko woñ, amu me ne be wo, te kui mis ma ko woñ amu me ne Zambe wôé; ma ve wo ngule nyô, ma zu volô wo. Ma su'u wo a mbo nnôme wom ya ndañan.

¹¹ Ô lôô ôson a meyat, bia ye bi ba bese ba wô'ô wo ôlun; ba bese ba suñe wo biôm, ba ye bo momo, ba ye jañ.

¹² Wo ye jeñe be, ve teke fe be yen, ba ba jeñe wo ntañete; ba be mbe be bo'o wo bita. Ba ye bo momo ya bemomo.

¹³ Amu me ne Nti, e Zambe wôé, nyô a bi wo. Nyô a jô wo na: Te ko woñ, ma zu volô wo.

¹⁴ Te ko woñ a étume ya Yakob, mintete'e biwuwua y'Israél; ma zu volô wo, nalé Nti a jô *nkôté wôé, Nyô y'Israél a n'étyi.

¹⁵ Ô lôô me veñesaneya wo, nkelesañ akabe jôm ba tya'a nlisi, é bili mesôñ, wo ye fit a ko'o beta minkô, a wo ye bo bone minkô mi funane ônyenyame mbuan.

¹⁶ Wo ye se'ese mie, a évuñulu ja ye kee mie, a ôlende a ye mialane mie. Ve wo, wo ye va'a be Nti. Wo ye fôn e be Nyô y'Israél a n'étyi été.

¹⁷ Bingôngole bi bôt a minzôzoé ba jeñe mendim, ve me ne momo; ôyeme viap ô maneya kôt a évé. Ve ma, Nti, ma ye yalane meye'elane map; Ma, Zambe y'Israél, ma ye bo te li'i be.

¹⁸ Ma ye bo na asôé é n'anen é vam e minkôle mi nselek a menjeñ ézezañe mimbi'ili; ma ye tyendé *nkôte si ô bo étame mendim,

¹⁹ ma ye futi bilé bi e *nkôte si: sédre, akasia, mirt a ôlivié; a bilé bina ki ma ye telé bie e vôme si é n'ayet: sipré, orm a bui, bise vôme wua.

²⁰ Nalé ate ba ye yen, ba ye yemelan, ba ye fas a yeme nsamba wua na, wo Nti, ñwô ô boya biôme bite, na Nyô y'Israél a n'étyi a téya bie.

Azezambe

²¹ Lita'an ajô denan nalé Nti a jô; kula'an mendeme menan, nalé njô bôte Yakob a jô.

²² Be za'a ôsu va, a be kate bia jam da ye bo. Mam y'atata'a, katane bia jam me mbe, éyoñe te bia ye kee melo asu ya yeme jam da tôñ; nge na bo'one bia na bi wô'ô mam y'akiti.

²³ Katane bia mam y'asu'ulan éyoñe te bia ye yeme na, mi ne bezambe; tama ve'elane bo ve jam éziñ é ne mvaé nge *abé, nalé bia ye ku'i mis, a bi yene de nsamba wua.

²⁴ Mi lôô mi ne si a dañe momo. a mboone wônan ô ne si a dañe teke jôm; ajô ya tobe mia e n'angôndô.

²⁵ Me nga bo na a so akôé a a nga so e jôb da tôô. A loone jôé dam; a tibi bejôô mebo si ane mbotok, ane mete'e mmé meviek a tyak.

²⁶ Za a nga kate de aso atata'a ane bi ne yeme de te na é boban, ane bi ne jô na: E ne nalé' Môt éziñ a nji kate de, môt éziñ a nji bo na be wô'ô de, a môt éziñ a nji wô'ô mejô menan.

²⁷ Môt ôsu ataté kui Sioñ a jô na: ô lôô mbe ba! Ma ve nkate mba mefoé e Yérusalém.

²⁸ Me fombôya ve teke ke yene môt, môte wua ya be be a ne ve ôsimesan éziñ, a a too nguleya yalane jam éziñ nge ma sili nye minsili.

²⁹ O lôô bese be ne ve momo, mimboone miab mi ne teke jôm, bengunemelane babe ki évuñulu a ñyemeñyem.