EZAYI 3 - Kalate Zambe Nnomo a Mfefe Mfefé Nkôñelan

Môt ase a bo ane a kômbô e Yuda été

¹ Amu na, tame yen, Nti, Zambe ya *minsamba mewosan, a vaa Yérusalém a Yuda avale mvolan ese. Mvolane ya bidi, a mvolane ya mendim;

² mben a môta mewosan, *ntyi'i mejô a *nkulu mejô, mvimvi'i a *mvendé môt,

³ évete nsamba bezimbi mewôm metan a môt a bili duma, mbôndé mefek, ntyetyeñe mbo biôm, a ñyememame ya ngbwee.

⁴ Ma ye ve be bisoé bendôman bi bo bivete biap. A bone be bongô ba ye jôô be.

⁵ E ayoñe bôt été, môte wua a ye tibili nyô mbok, a môt ase a ye tibili nyô mbok; ésoé ndôman ja ye té nnôme môt ntañete, ôvevese môt wo ye wosane môt a n'adit,

⁶ éyoñe te môt a ye bi monyañ, e *nda ésaa wé a jô nye na: wo ô bili ngômesan, bo'o njôô wongan! Avise mbuane di e kele éjôé jôé si!

⁷ Môs ôte nye ki a ye bete *tyiñ a yalane na: me nji bo nsaé bôt, *nda jame fe é nji bi bidi a ngômesan; te telane ma njô bôt.

Nti a yaa

⁸ Yaa Yérusalém a koléya ôbak, a Yuda a kuya *mbek, amu nkobô wob a mimboone miap bi ne Nti e ngame yat. A ba wosan asu dé e n'étôtok.

⁹ Avale mesu mab me né da bo'olô be. Yôta'an *abé dab aval ane Sodom, teke solé de. Ngo'o be! Amu ba kômesane bidime biap!

¹⁰ Jô'ane na: Zôsôa môt a ne mevak; amu a ye bu'ubane bibuma ya mimboone mié.

¹¹ Ngo'o mbia môt! Ngo'o nye! Amu ba ye bo nye avale mimboone mié mi né.

¹² Bone be bongô mbe ba tibili ayoñe dam a binga mbe ba jôô de; a ayoñe bôte dam! Beliti zene bôé, mbe ba yale wo zene fe. A ba kee wo ékotekote *zen.

¹³ Nti a ne nkôman ya kobô ajô, a tele na a tyi'i *meyoñ me bôte mejô.

¹⁴ Nti a telé bemvendé a bivete ya ayoñe dé asu ntyi'ane mejô. Mia mi nga min afube ndi'i woon a biôm mi nga wôlé minzôzoé, bi ne e menda menan été.

¹⁵ Amu jé mi nga ko'otô e bôte bam, a sile mesu minzôzoé e mebo si' Nalé Nti, Zambe ya *minsamba mewosan a jô.

Nti a ne binga ya Yérusalém e ngame yat

¹⁶ Nti a jô na: amu bengone ya Siôn be ne mebun, A ba wulu metyiñ me dene, mise ki me kele ma fombô mefep, amu ba ke ba mo'o dulu ne do do do, mengôñ be be'e mebo mme ma duñ ne woñ woñ woñ.

¹⁷ Ajô te Nti a ye bo nlô bengone ya siôn na o bi ayan, Nti a ye kulane soé jap.

¹⁸ Môs ôte, Nti a ye vaa jôme nyanga ése: bilondo mevot ba jaé nlô a bengobé;

¹⁹ bimvônga, mekom a bentendé ba yalé mesu.

²⁰ Mintôm, bone bengôkop ba jaé mebo, bekandé, biwolo bi biôm bi ne mbamba menyum a menjit;

²¹ Bilondo a adôk;

²² mengômesan ba jaé *mebôk, mintôm ba jaé nlô a mi ba jaé e *tyiñ, bone bikpwaé ba bi mo si,

²³ bengobé, bifumulu mimfondé, mintôm bindelé ba diñe nlô a bindelé ya buti mesu.

²⁴ Vôm ôlobinda a mbe ébol ja ye bo valé; nkol wo ye tyendé kandé; ntui nlô wo ye tyendé bidima mimfen, Sanda nkuta a ye tyendé Sada éfumulu éyé ndi'ane ékôb wo ye tyendé mbamba ékôp.

²⁵ Beyôm befame bôé ba ye ku a nkpwaté mekôn biwôlô bi bôte biôé ki e nseñ mewosan été;

²⁶ mimbé miôé mia ye tat a yôn asu'ulan, wo ye tabe si.