EZAYI 25 - Kalate Zambe Nnomo a Mfefe Mfefé Nkôñelan

Nti, asoé bebuni

¹ A Nti, ô ne Zambe wom ma ye zalé wo, ma ye kañe jôé dôé, amu ô boya étua jam; mam ô nga kak aso ayap me yeme a me ne ngu.

² Amu ô boya tison avise *mekok, a tison ôlem jôm é ntoo ntyaman, beta abeñe *nda bikuu a tyambaneya e tison été, a be se nguleya beta lôñe nye.

³ Ajô te ayoñe bôt e ne ngu da ye ve wo duma, bitisone ya *meyoñ me bôt ma tibili bôte bevok ma ye yeme ngule jôé.

⁴ Amu ô ne asoé asu mintetek, yaa, asoé asu bingôngole bi bôt éyoñe be too ôlun été. ô ne vôme ya sobô ôkôs a éjijine vôme ya sobô ayôñ, amu mvebe betibili bôt wo funan ôkôs éyoñ wo jimbi akak.

⁵ Avale f'ane ayôñe vian éyoñ da jimbi si é n'ayet. Wo dime minkumutu bikuu ane vôm éjijine ya *nkut ja dim ayôñe vian, wo tooé jia betibili bôt évô.

Beta ndian asu bôte bese

⁶ Nti a ne ngul ése a ye bo beta dina asu *meyoñ me bôt mese e beta nkôle nyô yôp, dina betit be n'avoñ a minnôm mi woon, mevoñe betit be ne mvaé abui a minnôme mi woon mi ne nya nléan.

⁷ Eyoñe te a ye vaa ntendé a yalé bôte bese, mfinga wo buti *meyoñ me bôte mese.

⁸ A bo awu momo jam nnôm éto; Nti a ne Zambe a fimi mili'i ya mesu mese, a bo na ôsame ya bôte bé a jañ e si nyôna ése été: amu Nti a kobôya.

⁹ *môs ôte ba ye jô na: e Zambe wongan nye nyô, e Nye bi nga too nye ndi, a Nye a nga nyii bia, Nti le, Nyô bi nga too nye ndi; ntyela'ane si a mvakan amu nyiane wé!

Môab a fitiban

¹⁰ Amu wo Nti ô ne e nkôle wu yôp; a be maneya tibi Môab a mebo vôm ate, aval'ane ba tibi mbuan ébata mbuan été.

¹¹ A same mo mé ézezañe ébata te aval? ane môt a jok a same mo na a jok ve Nti a sili mebune mé si éyoñe a sili melame ya mo mé si.

¹² Mfa'a ya meka'a môé a Môab, mfa'a ya aleme dôé e n'ôyabe yôp, Nti a sô'ôlôya bie si, a kpwéya a wua bie si, e mbulu'u été.