EZAYI 23 - Kalate Zambe Nnomo a Mfefe Mfefé Nkôñelan

Ajô Tir a Sidoñ

¹ Ayaa ajô Tir. Yônan a besitima ya Tarsis! Amu tison éte é tyambaneya; teke fe menda! Vôme ya nyiine fe momo! Jame te e nga litibane be be ataté si ya Kitim.

² Woñ ô to'é mia mvuk, mia mi too ékôte mañ, mia bekuan abome ya Sidoñ, minlômane mienan mia dañ édo'o mañ!

³ Memvoñ be mbe be béék éwome Nil, Sidoñ nye a mbe a kô'ane me; nye a mbe a nyoñe minsenge ya *meyoñ.

⁴ Ôson a wo, a Sidoñ, tison ôleme ya mañ! Amu avale di mañ ma jô na: Me nji wô'ô mintaé, me nji kô'ôlô mie, me nji ke yale bisoé bendôman, nge yale bengo be binga.

⁵ Eyoñe foé ja ye kui Ejipte, bôt ba ye fô'ôban avale Tir a nga bo éyoñ a nga wô'ô je.

⁶ Kelane mfa'a ya Tarsis, Yônan mia bôte be too ékôte mañ

⁷ ye tisone jenane fo'o le, e vôme bôte ba nye'e mevak' Atata'a dé da so e kôa, ve mebo mé ma kee je é ke tabe ôyap.

⁸ Za a nga nyoñe ntyi'an wo tebe Tir e ngame yate wu' Nyô a ne nkabe bikat, nyô bekuan abome bé be mbe mintômba, nyô bebo makite bé be nga bili ésemen e si ése'

⁹ Nti ya minsamba mewosan nye a nga nyoñe ntyi'ane te, asu ya balé mebune ya jôm ése ja faé aveñ, asu ya sili e ba bese be be'e duma e *si nyô si.

¹⁰ Tame dañe si jôé ane Nil a ngone ya Tarsis, teke fe vôme besitima ba tebe!

¹¹ Nti a sameya wo wé e mañe yôp; a bo bijôé na bi fô'ôban; a bendéya Kanaan na a tyam aleme dé.

¹² A jôya na: Wo ye bo te k'ôsu a bo mevak, wo, éndune ngone ya Sidoñ é nga tibane yôp! Kôlô'ô si a ke e si ya Kitim! Ve ja'ana e wé, wo ye bo te bi awo'on!

¹³ Sii Bekaldééñ nje nyô, Bekaldééñ mbe be nji tame bo ngum ayoñe bôt; bôte y'Asiri be nga ve si éte asu bôte be too e nkôte si; ba lôñe minkume ya mombô, be maneya tyame biwôlô menda ya Tir, be boya me ne sangaññ.

¹⁴ Yônan a besitima ya Tarsis! Amu tison ôleme jenan é tyambaneya!

¹⁵ Môs ôte ba ye vuane Tir tañe mimbu mewôme zamgbwa, abime melu me njô bôt ma tabe. Mvuse mimbu mewôme zamgbwa, Tir a ye bo ane minga ébamba e jia ji ja jô na:

¹⁶ nyoñe mvet, bôma'ane tison, a minga ébamba be vuaneya! Tuka'a bôm, yi'a abui bia, ndemben ba ye simesane wo!

¹⁷ Eyoñe mimbu mewôme zamgbwa mi lôteya, Nti a ye jome Tir, éyoñe te fe Tir a ye beta taté na a bi moné ya mboon ébamba ba be bijôé bise ya *si nyô.

¹⁸ Ve minseñge mié a ma'ane mé bia ye teléban étyi asu Nti. Ba ye bo te kôane bie nge ba'ale bie ve bia ye volô asu ndian, njalan abume ya ba be too Nti ôsu a asu ngômesane jap ja libi.