EZAYI 22 - Kalate Zambe Nnomo a Mfefe Mfefé Nkôñelan

Nkulane mejô wo wosane Yérusalém

¹ Ayaa e mbi'ili ya ñyenane mam. Jé é boya Yérusalém' Amu jé bôte bôé bese be maneya bet e mendile yôp'

² A wo ô ne zô'é abui, tisone bindundumba, tisone ya meva'a nga' Bebalé meveñe bôé be nji balebane meveñ a nkpwaté mekôn, a ba ye bo te wu bita

³ Bejôô bôé bese be nga tube nsamba wua. Bewua bilaé be biya be mimbôk. Bôte bese be too be wo be biya be mimbôk, nsamba wua, be kusa ke ba tub ôyap.

⁴ Ajô te ma jô na: Va'ane me mise nyô, jôka'ane ma me yôn mbia ñyônan; te veane ngule ya volô ma *nlem, amu bidim bi ngone ya bôte bam.

⁵ Amu den a ne môse ya fe'e njañan, môse mbiban a fe'e ne vema, ñwô Nti, Zambe ya *minsamba mewosan a lômeya; e mbi'ili ya ñyenane mam été, beta mfin a kuya, a miñyôn mia bet e mfa'a ya beta minkô.

⁶ Elam a be'e ékpwaé mekoñe m'élaé e bevagoñ be tii a be ne mbetan, Kir ki a kuli ében atan.

⁷ Minyanebe miôé mia dañ abeñ, mi ne njalan a bevagoñ, bewulu bikabela be yabeya e mimbé,

⁸ Biôme bia kamane Yuda bi vasebaneya. Môs ôte, mi nga fombô mfa'a biôme mewosan Ya *nda é ne Afan été.

⁹ Mi lôô abui mefôla be nga yooé e tisone David, a mia kôane mendim ébata ya nké.

¹⁰ Mia lañe menda ya Yérusalém, a mia tyame menda asu ya yemete akak.

¹¹ Mia fa'a ébé ya ba'ale mendim e zañe mimfin, asu mendime ya nnôm ébatak. Ve mi ne te kee mise menan e be nyô a bo jame te, mi ne teke yene nyô a kômesane jame te ayab éyoñe mvus.

¹² Nti, Zambe ya *minsamba mewosan, a maneya loone mia e môse wu na, mi yôn, mi sôtebane mintui a tiñeti minkuta mengeteñ,

¹³ éyoñe ji yenane mefôn a mevak! Ba wôé beta biyem a tyi'i bone biyeme *tyiñ, bi di bia diban a woon a nyuban: nja'an a nyu amu akiti bia ye wu!

¹⁴ Nti ya *minsamba mewosan a litiya me jame te; momo, ékobe te ja ye bo te vaaban asu denan, akekui awu denan, nalé Nti ya *minsamba mewosan a jô.

Asu biwôlô bebo bisaé bibaé

¹⁵ Avale di nde Nti ya *minsamba mewosan a jô na: kele yene mba'ale akum ate, Sebna, njôô ya *nda njô bôt a sili nye na:

¹⁶ Ô bili jé va' Beza be ne wo bebiaé va, asu ya fa'a wo soñe va, asu ya fa'a soñe jôé yôp, a ba wo étaba'a akôm été'

¹⁷ Ajô te Nti a ye sô'ôsane wo, a mba môt, a ye dutu wo mbom,

¹⁸ a wua wo ô ke wo bi'iti ane ébuma mfa'a si é bili beta mefôla: nne wo ye wu wé, e wé a bevagoñ ba ve wo duma, ve be too jôm ôsame ya *nda masa wôé.

¹⁹ Ma ye titane wo ô kôlô ésaé jôé, a vaa wo été jôé.

²⁰ Môs ôte, ma ye loone mbo ésaé wom, Eliakim, e mone Ilkiya.

²¹ Ma ye jalé nye alô'ô dôé a ve nye ngu a asese dôé, ma ye kalane ngule jôé e mo mé. A ye bo ésaa asu bôte be too Yérusalém, a asu *nda bôte Yuda.

²² Ma ye beté édiba'a ya *nda David étule jé yôp, a ye yooé, a teke môt a ye bo nguleya dip. A ye dip, ve teke môt a ye bo nguleya yooé.

²³ Ma ye nyiñeli nye vôm a yeme ane sen a a ye bo éto njôane ya duma asu *nda bôt ésaa wé.

²⁴ Etôto'o ése ya *nda ésaa ja ye tyebe be nye, mintyaé a minkpwangbwa biôm mebelan ya *nda bi ne tyôtyoé, ataté mekop a kui minka'a mevale mese.

²⁵ Môs ôte, nalé Nti a ne ngul ése a jô, éyoñe te e sen é ne ñyemetan e vôm a ne afip, ja ye téé, é bu'i a ku, a mbe'e é nga be'e wo ye tyamban, amu Nti a kobôya.