EZAYI 21 - Kalate Zambe Nnomo a Mfefe Mfefé Nkôñelan

Babilôn a zu ku

¹ Mbañete ô ne ntilane na: Nkôte si ya mañ; aval'ane beôlendé ba tyi'ilane Négéb nalé ate nye nsiñ a so *nkôte si ya si é ne ékowoñ:

² angônda jam a litibaneya be ma. Njoñôlô a joñôlô, ntyame ki a tyam: Betek, a Elam! Bôma'an a bita a Beméde! Ma mane mebune mé mese, nalé Nti a jô.

³ Ajô te ma wô'ôtane mbia mintaé angeteñe dam. Mintaé mi lateya ma, aval'ane minga, éyoñ a kô'ôlô mie: ésôbôk ja bo me na me bo te wôk, a mfô'ôban wo bo me na me bo te yen.

⁴ Nleme wom ô jañeya fé, a woñ ô biya ma; évôvoé ya mamengô'é me nga kômbô é kôñelaneya angôndô mfa'a wom.

⁵ Ba kôme tawôlô, bemombô ba mombô, ba di ba nyu, teba'ane betetele, mia bivet! Woka'ane bibene bienane mbon.

⁶ Amu avale di nde Nti a kôbôya ma na; kelek a telé mmombô na a kat e jam a ye yen.

⁷ Nge a yene vagoñ a tii e bikabela bibaé, mbete ékabela a bete éjakase yôp, mbete ékabela a bete e kamel yôp, a ntoo ve tu'a tabe ntyel, a a tabe'e ntyele biyoñe bibaé!

⁸ Nde nyô a fombô a nga yôtane na: a monti, me tele e vôme ma mombô ngume *môs, a me tele e vôme ma ba'ale ngum alu.

⁹ E jame da zu nde di: Môt a bete vagoñ a ne ntiñetane bikabela bibaé. Nde a nga kobô a jô na: A kuya Babilôn a kuya, a bive'ela'a ya bezambe bé be kuya si bifuse bifus.

¹⁰ A bôte y'ayoñe dam, mbe be nga tya'aban ane fôn afube dam été, e jam me nga wôk e be Nti ya *minsamba mewosan, Zambe y'Israél, nde le me kateya mia.

Nkulane mejô wo wosane Duma a Arabi

¹¹ Ayaa da tôñe Duma Ba yôtane ma e Séyir na: a mmombô, alu e n'aya' A mmombô, alu e n'aya'

¹² Mmombô nye na: tyé ja zu, alu fe da zu. Nge mia kômbô sili jam, sila'an: kôñela'an mi zu.

¹³ Ayaa da tôñe Arabi. Mia ye bômbô e mefane y'Arabi a mia minsamba be be'e mimbaé ya Dedañ!

¹⁴ Za'a veane bôte ba wô'ô évé mendim; e bôte be too Téma ba ke ôsu ya bôte ba tup be bili belet.

¹⁵ Amu ba tub ôsu ya minkpwaté mekôn, ôsu ya nsoé nkpwaté mekôn, ôsu ya *élaé é kolô. Osu minju'u ya bita.

¹⁶ Amu avale di nde Nti a kobôya ma na: a li'iya mbu wua, éfunan ane mimbu ya besaé moné, wôna duma ese ya Kédar da ye man.

¹⁷ Mebuka'a ya biwôlô bewua bilaé, mbe be ne bone be Kédar, ma ye bo ve tyôtyoé, amu Nti, Zambe y'Israél, a kobôya.