EZAYI 19 - Kalate Zambe Nnomo a Mfefe Mfefé Nkôñelan

Asu'ulan y'Ejipte

¹ Nkulane mejô wo wosan Ejipte. Tame yen ane Nti a bete *nkut wo wulu avô, a zu Ejipte. Bemomo bezambe y'Ejipte ba fô'ôban vôm a too, a nleme bôte y'Ejipte wo bili be atek.

² Ma ye bo na môte y'Ejipte a wosane môte y'Ejipte, môt ase ya be be a ye wosane monyañe wé, a môt ase a ye wosane môt a too nye bebé, tison ja ye wosane nyô fok, a éjôé ja ye wosane ji évok.

³ Ejipte ja ye dimili fek, a ma ye tu'ulan mimbôndé mié; ba ye sili bemomo bezambe babe mam a ba ba bi'i bekôn a bebo mesimba.

⁴ A ma ye kalan Ejipte e mo bejô bôt be ne njet, njenjete njô bôt wo ye jôô be, nalé Nti ya *minsamba mewosan a jô.

⁵ Mendime ya mañ ma ye vele, beta ôsôé a ye kôt a dutu na si é bo ayet;

⁶ asôé e n'anen da ye boé mendim a atôñe ya Nil da ye se'an a kôt, minkaé a nden bia ye viele:

⁷ nsa'a Nil a vôme Nil a suane mañ bia ye bo teke fe jôm! Jôm ése é nga béban bebé Nil ja ye kôt a tetane fé a bo momo.

⁸ Beyobe kos ba ye yôn a ba bese ba wua nnop e Nil ba ye yi, a ba ba wua mevot e mendime yôp ba ye bili atek.

⁹ Ba ba bo ésaé ya vose léñ a ba ba tiñe bifumulu bindelé ba ye bili ôson.

¹⁰ Mesu bisaé ma ve bôte moné ma ye bo momo a besaé moné bese ba ye bi ôlune minlem.

¹¹ Bivete ya Sôan bi ne fo'o mekut, mimfefe'e bebôndé mefe'e mi Faraoñ, éso'o jap é ntoo zezé jôm. Mi ne jô Faraoñ aya na: me ne mfefek, nye'é bejô bôte ya kôa'

¹² Mimfefe'e miôé mi ne vé' Mi tyeñele'e ñhe wo, bi yeme jame Nti a ne ngul ése a tyi'iya ajô Ejipte.

¹³ Bivete ya Sôañ bi ntoo mekut; bivete ya Nof bi maneya du'uban, bi yaleya Ejipte feñ bie ki bi too ako'o jua ya meyoñe mé.

¹⁴ Nti a sôéya be nsisime ya bijôñ, ajô te bia bo na Ejipte é ndeñetan e jam ese da bo été aval ane nso'o meyok a ke a ndembe a yôôk.

¹⁵ Te ke môt a ye beta bo jam Ejipte, ja'ane nlô nge njem, to'o ntem alen nge nden.

¹⁶ Môs ôte, Ejipte ja ye bo ane binga, befô'ôfô'ô a benyeñenyeñ ba ye bi nye, éyoñ a ye yene wo Nti a ne ngul ése, a ye bete yôbe na a wosane nye.

¹⁷ A sii ya Yuda ja ye bo éko woñe y'Ejipte: éyoñ ése Yuda a ye tebe Ejipte ôsu Ejipte ja ye fô'ôban jame Nti, nyô a ne ngul ése a tyi'iya mfa'a ya wosane nye.

¹⁸ Melu mete bitisone bitane y'Ejipte bia ye kobô nkobô ya Kanaan a ba ye late Nti a ne ngul ése a nkanane ngana. Tisone jia y'été ja ye lobane jôé na: Ir Aérés nalé a ne na tisone ya ntyamane mam.

¹⁹ Môs ôte ako'o metuna'a Nti da ye tebe e temeteme si y'Ejipte a akôn e ne ndeme Nti di ki da ye tebe bebé e nné si y'Ejipte.

²⁰ Jame te da ye bo ndem a ngaa asu Nti nyô a ne ngul ése e si y'Ejipte éyoñe ba ye yône be Nti amu e bôte ba tibili be, a ye lôme be nyiibôtô nye a ye kamane be a kôté be.

²¹ Nti a ye bo na bôte y'Ejipte be yeme nye, a *môs ôte bôte y'Ejipte ki ba ye yeme Nti. Ba ye saane nye a *bityi'a a mimveane ya mefup, ba ye tiñeti Nti metiñ a ba ye tôé me.

²² Eyoñe te ñhe a ye bo na nge Nti a nga bibi bôte y'Ejipte mbia mbiban, a ye saé be: ba ye bulan e be Nti Nyô a ye yalane meye'elane map a saé be.

²³ Môs ôte njoñ wo ye kôlô Ejipte a kui Asiri. Bôte y'Asiri ba ye zu Asiri. Bôte y'Ejipte a ba y'Asiri ba ye kañe Zambe mfula'an.

²⁴ Môs ôte Israél a ye zu été lale ba Ejipte a Asiri. E si y'Ejipte, ébotan ja ye bo

²⁵ nje Nti a ne ngul ése a ye tote na: Ébotan é bo'o Ejipte, ayoñe dam, Asiri, ésaé ya mo mam a Israél, ngab éli'i jam.