EZAYI 16 - Kalate Zambe Nnomo a Mfefe Mfefé Nkôñelan

Môab a kobô Yérusalém

¹ Lômane njô bôte ya si éte mone ntômba, ataté Séla éyoñ wo lôte *nkôte si, a ke mfa'a nkôle ngone ya Sioñ.

² E minsaé y'ôsôé Arnon, bengone ya Môab ba ye bo ane anone da tup, be tita'ane de e mumba'a map.

³ Ba jô na: Bo'one ékôan, nyoñane ngume ntyi'an: bo'o nsisiñe wôé na ô bo ane alu, solé'é e ba be nga titan, te ba kulan e ba be nga tup!

⁴ Kañese'e na bôte ya Môab ba jeñe vôme ya sobô be tabe be wo! Bo'o mfa'a wop asoé asu nyô a sa be. Eyoñ ékpwe'ele ja ye man a étibela'a ja ye kui asu'u, éyoñe môta nsa a ye bo momo

⁵ éyoñe te ñhe, amu ô ne mbamba môt, éto njôan é ne ngu a ja tabe ja ye boban asu mvoñe bôte David. A ye tabe éto njôan ane ntyi'i mejô a bôô évevé ajô nya ntyi'ane mejô a *zôsôô.

⁶ Bi nga wô'ôtane mebune me Môab, mebun ma dañe nné, ñyenan émien anen wé a mebune mé.

⁷ Ajô te Môab a yône Môab, môt ase a yôn; mia kobô menyiñ ajô Kir Arés a ntoo si si, mi ntoo nte'an ne bôlôt.

⁸ Amu mefane ya Hesboñ me nga mane bobelan, bivete ya *meyoñ bi maneya ba'é minku'u mindi'i ya Sibma, mmie mi mbe mi kelek a kui Yazer, mmie mi mbe mi fa'a e li a li nkôte si; mintyaé mié mi mbe mi yaék a lôte mañ.

⁹ Ajô te ma ye yône afube mindi'i ya Sibma avale Yazer a Eléalé, ma ye nyuu wo e mili'i mam, amu ñyône bita ô jimbiya bidi biôé a nkôane bidi wôé.

¹⁰ Mevak a mefôn bi jañeya e afube bilé bia wume bibuma; bia momo e mefube mindik, mevak maa bo ki fe! Nkolé bibuma bi ndi'i woon a nji fe miate woon e minka'a été; me boya na ayenga mevak e man.

¹¹ Ajô te *miñya mia tyibelan m'abum été ane nsañe mvet ajô Môab, avale te fe nleme wom ajô Kir Arés.

¹² Môabe le a zu, atek é biya nye éto y'ékôndô'ô yôp. a kuiya vôme wé an'étyi asu ya ye'elan v'a se nguleya bi éyalan.

¹³ Nkobô Nti a kobôya aso ayap ajô Môab ñwô le.

¹⁴ Eyoñe ji Nti a jô mejô mana na: dene mimbu mila (ane mimbu môt ba ya'ane nye), duma ya Môab da ye bo jame y'ébiasé, akôsa bo a bili abui bôt, *mebuka'a ma ye dañe bo tyôtyoé, abim e ne teke mfi.