EZAYI 13 - Kalate Zambe Nnomo a Mfefe Mfefé Nkôñelan

Minkulane mejô asu meyoñe bikuu Nti a yaa Babilôn

¹ Nkulane mejô Ezayi, e mon Amôs, a nga yen ajô Babilôn.

² Tela'ane nlinga e nsoé beta nkôle yôp, beta'ane tyiñe yôp e be be. Febane wo, nde ba ye tulane mimbé benya bôtô

³ me maneya ve ba be n'émbam mebendé, me maneya fe loone mimbene miam, asu ya tôé ayaa dam, e ba ba va'a e *nda ndañane wom:

⁴ éduñe jama bôt e beta minkôle yôp, éfunan ane bizu'u bi bôt; éduñe jama bijôé ya *meyoñ me bôt me maneya sulan; Nti ya minsamba mewosan a ke a fombô nkane bita ô ne nkômesane ya wosan.

⁵ Ba so e si é n'ôyap, e vôme yôb da su'u: Nti a bikpwelé y'ayaa dé; ba ye soo mintaé e be si nyôna ése.

⁶ Yônan amu môse Nti ô ntoo bebé; wo zu ane ébitane Nyô a ne ngul'ése.

⁷ Ajô te nde mo mese ma bili atek, a ate'e *nlem da bi môt ase.

⁸ Be bibaneya a woñ; minkumetan a mintaé bi biya be; ba ke ba nyimekan ane vôme minga a kô'ôlô mie. Ba fombane mis a woñ ôse. Mesu map me ntoo ane nkaba'a nduan.

⁹ Môse Nti le wo zu: môse njet, ôlun a mbia ayaa, e môse wo ye wua *si nyô e beta ôlun été, a jiane bebo *abé y'été.

¹⁰ Amu ateté ya yôb a minsamba miap bia ye bo te beta faé éfufube jap. Jôb da ye bo dibi éyoñ da tôô, nalé fe ngon ja ye bo te beta faé éfufube jé.

¹¹ Ma ye ve *si nyô fonos amu *abé dé, a bebo *abé amu bikobe biap; ma ye man ésase ya bôt be ne mebun, a ma ye sili nkobô ébiasé betibili bôt e si.

¹² Ma ye bo bôt njemban a dañe or a dañ abeñ; ma ye bo na môta binam a jemban a dañe ako'o é n'édima ba loon ôfir.

¹³ Ajô te ma ye bulekane yôp, a si ja ye su'uban e vôm é beme, amu ayaa Nti ya *minsamba mewosan, a môse ya beta ayaa wé.

¹⁴ Eyoñe te ñhe môt ase a ye kôñelan mfa'a bôte bé be né, a môt ase a ye tup a ke e si jé; aval'ane nko'o wo mate, aval'ane mone mbam biyem a ne teke môt a kôane nye.

¹⁵ Ba ye jii ba bese ba tôbane be mekoñ a ba bese ba ye bili nkpwaté mekôn wo ye wôé be.

¹⁶ Benyañebéé bap ba ye wuabane si e mise map me lôô. Ba ye sa menda map a jap e binga bap.

¹⁷ Me nyô, ma tindi beméde be wosane be, mbe be ne te simesan ajô argent, nalé fe or te jô be jam

¹⁸ bilaé biap bia ye wua bisoé bi bôte si, nalé fe te éngôngol e be bone ba bialé; dise dap da ye bo njet mfa'a *bon.

¹⁹ Nalé Babilôn, étôto'o jôme bijôé ya *meyoñ, abeñe jôme mebune bekaldééñ, a ye bo ane Sodom a Gômor, mbe Zambe a nga tyam.

²⁰ A ye bo bilik bôt te fe tabe été nnôm éto. Mone Arabe a ye bo te lame *nda éndelé jé été, nalé fe beba'ale mintômba ba ye bo te beta tebe été. étaba'a mimbam biyem.

²¹ Ve bôte ya nkôte si ba ye jeñ étaba'a jab été; mekuñ ma ye jaé e menda mé, a b'éngutu ba jaé été, nalé fe na bikela ya fé bia ye ke bia tyelé si y'été.

²² Mekamenyañ ma ye bi étaba'a e beta menda ya tison, a bemvak e abeñe menda bejô bôt été. Eyoñe Babilôn é mbeme kui alu da te ke bebe nye yôp.