EZAYI 11 - Kalate Zambe Nnomo a Mfefe Mfefé Nkôñelan

Mfefé David

¹ Ntyaé wo ye faa e nnôm ékume Izayi. A éfa'alé ya mindi mié ja ye wume bibuma.

² Nsisime Zambe wo ye tabe be nye: nsisime fek a mbamba mfasane mam, wu wo ve ngu a mbôndane fek, *nsisim wo ve ñyeman a nkoone Zambe woñ.

³ A ye yene mvaé ya ko Zambe woñ. A ye bo te tyi'i mejô v'a ñyenane ya mis, nge tyi'i mam v'a ñwô'ane ya melo.

⁴ V'a ye tyi'i minzôzoé mejô *zôsôô, a tyi'i bingôngole bi bôte ya *si nyô mejô ne tiññ. Mejô y'anyu dé ma ye bibi si nyô aval ane mbeñ, a mvebe ya biyaé bié wo ye jiane mbo *abé.

⁵ Zôsôô a ye bo kandé ya mevele m'abume mé, a nye'ane ki asese ya angeteñe dé.

Mfefé Paradis

⁶ Akamenyañ a mone ntômba ba ye tabe vôme wua. Ze ki a mon ékela ba ye bômbô vôme wua. Mone nyak, étoñe ngbwengbwem a tit é n'avoñ ba ye di vôme wua, ôyôme monafam wo ye ya'ale be.

⁷ Ngale nyak a Urs ba ye di vôme wua, e bone babe ki ba ye bômbô vôme wua. Ngbwengbwem a nyak ba ye kendé bilok.

⁸ Nyañebéé a ye vôé e mbil akpwe, a mon a tyiya mebé a ye some wo wé e mbile viet.

⁹ Te k'abé ng'éndaman bia ye boban e nkôle wom ôse ô n'étyi, amu si ja ye jaé ne lut a ñyemane Zambe, avale f'ane mendim ma jalé mañ.

Minkôm mia bulan

¹⁰ A ye bo *môs ôte na ndi Izayi wo ye kebelan ane nyungu ya *meyoñ, *meyoñ ma ye jeñe je, étôtok ja ye jaé e vôm é tele.

¹¹ A ye bo *môs ôte na, Nti a ye same wo éyoñe baa na a kôté *mebuka'a ya bôte bé, e ma me li'iya Asiri, Ejipte, Patrôs, Elam, Sinéar a Amat, nalé fe ma me li'iya e bikôte bi mañ.

¹² A ye bete nyungu asu *meyoñ me bôt. A ye kôane bôte y'Israél be nga mane mialan, a sulane bôte ya Yuda be nga mane tetan, be so'o meku'u menyine ya *si nyô.

¹³ Mesengan m'Efrayim ma ye man, a besiñe be Yuda ba ye bo momo. Efrayim a ye bo te beta sengane Yuda, a Yuda a ye bo te beta wosan Efrayim.

¹⁴ Mfa'a jôb da dim, bese ba ye kubu e minkôle befilisteñ, mfa'a jôb da tôô, ba ye ke sa meyoñe ya *nkôté si biôm. Edom a Môab ba ye ke éjôé jabe si, avale te fe mfa'a bone b'Amon.

¹⁵ Nti a ye kôlô mbate mañe y'Ejipte. A ye samese wo wé e beta ôsôé yôp. A ye kandé wô mimbale zamgbwa a ngule ya mvebe wé. A ye bo na e bôte bé be wulu été a mebo.

¹⁶ Njoñ wo ye lôt été asu *mebuka'a ya bôte bé ma ye li'i Asiri, aval e nga kui b'Israél éyoñ a nga kôlô si y'Ejipte.