EZAYI 10 - Kalate Zambe Nnomo a Mfefe Mfefé Nkôñelan

E bôt ba soñ ayaa Nti

¹ Ngo'o bôt ba telé mbia metiñ, a be too avôle ya tili metiñ ma soo mbia azoé.

² E aba mejô, ba telé bone be bôte fefe, a vaa minzôzoé ya bôte bam e mam ma yiane be. E jôme jab ba bi é ne minkus a ba sa bobenyui;

³ mia ye bo aya e môse *melep, éyoñe nkulu a ye so ôyap' Mia ye tub e be za a bi mvolan' Mia ye ke naan akume denane vé'

⁴ Jame ya bo é ne ve na, mia ye vitibi ézezañe ya mimbôk, nge ku si ézezañe ya bewu. V'akôsa bo mam mete mese, ayaa dé e nji kôlô, a wo wé ô ngenane nsaman.

Zambe a belan Asiri

⁵ Ngo'o Asiri, mbeñ y'ayaa dam, mbeñe te, e wo wom été, ayaa dame le,

⁶ Ma lôme wô ô wosan ayoñ e n'abé, ma bete wô avô ô ke wosan e bôt ba tya'a ma *nlem, be sa be biôm a bo fe be jôme ya nsa, a tibi be a mebo ane mboto'o ya zene yôp.

⁷ Ve nye ki a nji wô'ô jame te nalé, nleme wé ô nji tyi'i jame te avale te, amu ôsimesane wé ô ne na a mane jian, a na a mane abui *meyoñ.

⁸ Ya! A jô na: ye bivete biam bi nji bo bejô bôt bise'

⁹ Ye Kalnô a nji su'ulan ane Karkémis, nge Amat ane Arpad, nge Samari ane Damas'

¹⁰ Nge wo wom ô nga kui e be bijôé bia kañe bengunemelan a bive'ela biab bi ne nkpwelan bi mbe bi dañe bi ya Yérusalém a Samari,

¹¹ ye ma ye bo te bo Yérusalém a bengunemelane bé e jam me nga bo Samari a bengunemelane bé'

¹² V'éyoñe Nti a ye man ésaé j'ése, e nkôle Sioñ yôb a e Yérusalém été, ma ye zu, nalé Emien a jô, a wosan asimesane mebune njô bôte y'Asiri, a wosane fe mfaane ya mise bivéé wé.

¹³ Amu a jôya émiene na: me maneya bo amu ngule ya wo wom a amu fe'e jam, amu me ne ntyetyeñ, me maneya tyame minné ya *meyoñ, a sa akume dab be nga mane naan. Ane mben, me maneya sili ba bese be nga too bito bi njôane si ne vulut.

¹⁴ Wo wom ô kuiya vôm akum ya *meyoñ e né ane dumba'a. Me nyoñeya si ése ane ba to'é metyi kub ja te ben, a teke môt a nga kute mefap nge kui nsoñ, nge kobô an'ônon.

¹⁵ Ye ôvôn wo se'e ôbien a dañe môt émien a belane wô' Ye zik ja nene ébien a dañe môt a bo je ésaé' Aval ane nge ôlé ñwô wo bo na môt a fô'ô wô a fô'ôsan, aval ane nge *ntum ñwô wo bete môt ny'a nji bo élé yôp!

¹⁶ Ajô te Nti, Zambe ya *minsamba mewosan, a ye lôme nkôt e be bôt be n'avem, a étôto'o jé si, ési'i ja ye yôñ ane nduan.

¹⁷ Efufube y'Israél ja ye veñesane nduan. A éñwé a n'Etyi a ye veñesane nkaba'a nduan wo ye di'i, a mine biyo a minsini'i môse wuwua.

¹⁸ A ye di'i étôto'o y'afane dé a bilé bia wume afub dé a ye di'i de nyôl a *nsisim, jame te da ye funane nkôkon wo *duk.

¹⁹ Mebuka'a bilé y'afane dé ma ye bo étua tyôtyoé, mone mongô a too ngule ya lañe me.

Mebuka'a y'Israél

²⁰ A ye bo *môs ôte na: *mebuka'a y'Israél a ma ya *nda Yakob me nga fam awu, ma ye bo te beta ye'ebe be nyô a bôme me: ma ye fo'o ye'ebe be Nti, e be nyô y'Israél a n'Etyi.

²¹ Mebuka'a ma ye bulan, *mebuka'a ya *nda Yakob, e be Zambe a ne ngul.

²² A Israél to'o na e bôte bôé be mbe abui ane nsele'e ya mañ, *mebuka'a étam mme ma ye bulan: atiñe ya jañ e tyiiya teke selan, a *zôsôô ntyi'ane mejô a ye ke ôsu,

²³ a Nti, Zambe ya *minsamba mewosan, a ye tôé njañane te e si ése.

Melebe mefe asu Asiri

²⁴ Ajô te, avale di nde Nti, Zambe ya *minsamba mewosan, a jô na: a ayoñe bôte dam e too Sioñ, te ko Asiri a bôme wo a mbeñe woñ, a a bete'e nkasa wé yôbe na a bibi wo aval'Ejipte é nga bo,

²⁵ amu a li'iya v'abe melu étam, wôna ayaa dam da ye mane be wo, v'ôlune wom wo ye kôñelan mfa'a ya njañane wop.

²⁶ Nti ya minsamba mewosan a ye bibi nye nkasa nyôl, aval a nga bôme Madian akôm Oréb a a ye bete nkasa wé e mañe yôp, aval a nga bo Ejipte.

²⁷ A ye bo *môs ôte na: mbe'e wé wo ye sendé wo étuu, a ébôñeté jé ja ye sendé e tyiñe jé, ébôñeté ja ye ve afo'o éto.

Kpwatôla a kui ane feleves

²⁸ A kuiya bebé e yat, a nga tulane Migron, a ye ba'ale mimbe'e mié e Mikmas,

²⁹ be nga dañe fandane minkô: bia ye bômbô meyôa e Yéba! Rama a fô'ôban, Gibéa Saül a tup.

³⁰ Yônôk, a ngone ya Galim! Vô'ôlô'ô a Layisa!

³¹ Anatot a n'éngôngo! Madména a tup. E bôt be too Gébim ba mate,

³² a môse te ôbien éyoñ a tebe e Nob, a sise nkôle ya ngone Sioñ, a wo wé, nkôle Yérusalém.

³³ Tame yene Nti, Zambe ya *minsamba mewosan, a wua mintyaé si a ngul ése: ba be ne meyab abui be bibaneya, ba be ne beta minkôñ be silibaneya si

³⁴ ba ku étyé si, a mintute y'afane si, a éjijine Libañ é nga su'ulane si.