EZAYI 1 - Kalate Zambe Nnomo a Mfefe Mfefé Nkôñelan

¹ Nkulane mejô Ezayi, e mone Amôs, ñwô a nga kulu asu Yuda a Yérusalém, melu Ozias, Yôtam, Akaz a Ezékias bejô bôte ya Yuda be nga too.

Israél a ne asuk

² Vô'ôlô'ô, a yôp! Ke'e alo, a Si! Amu Nti Nye a kobô: me maneya naa *bon, a bo na be yaé, ve be beneya njôane wom.

³ Nnôme nyak a yeme môt a nee nye, A éjakase ki éwolo bidi ésaa wé; Isaraél, a nji ke yeme jôm E bôte bam be ne asuk.

Ngo'o Israél

⁴ Bidim a ayoñ da bo *abé, ayoñe bôt e be'e adite mbe'e ya bikobe biap, Mvoñe bôt ja bo mbia be mam, Bone y'ékotekot mbe mi né! Mi li'iya Nti. Be biaséya Nyô ya Israél a n'étyi, Mi lumeya nye mvus.

⁵ Vôme *mbé nye a beta bibi mia, mia mia yeme ngule ya bene njôan' Nlô ôse ô ne Nkôkon, A *nlem ôse ô biliya atek.

⁶ Ataté abo si a kui nlô, Teke vôm a ne mvo'é; Meveñ, bedu'i, bevevee mefô be nji ke fimi nge tiñeti bie nge sôé mbon été na ényan é voé.

⁷ Si jenan é ntoo bilik. Bitisone bienan bi ntoo ndi'an. Bejin ba di si jenan ôsu vienan: ane jôme bejin be maneya tyam.

⁸ Ngone ya Sioñ ki é li'iya ane ébem afube mindi'i été, ane tison be diliya a bita.

⁹ nge Nti ya minsamba mewosan a too ye bo te li'i bia bone *mebuka'a me bôt, bi nga ye bo ane Sodom, bi nga ye funane Gomor!

Nkañane Zambe a vini

¹⁰ Vô'ôla'ane nkobô Nti A mia bingo'o ya Sodom! Ke'ane melo menan e metiñ me Zambe wongan A mia bôte ya Gomor!

¹¹ Ma bo ézu'u *bityi'a jenane jé' Nalé Nti a jô. Me jaéya a *bityi'a beyôm mintômba bia di'ibane ngumba a avoñe bitoñe benyak, me nji beta kômbô metyi beyôme benyak, e ma me bone mintômba a bikela.

¹² Eyoñ mia zu tebe asu dam, za a nga jô mia na mi tibi minseñe ya *nda jam e mebo menane si'

¹³ Jôka'ane fulu ya zuu mimvean mi ne teke mfi: ôtu ô ne ma mbia jôm. Mfa'a meté me ngon, besabat a beta *mebôk, me se nguleya kañese yene *abé da dañ mbunda'an a *mebôk.

¹⁴ Ma vini meté me ngone menan a mebô'ô menan: bi ne beta mbe'e mfa'a wom me kateya jibi bie.

¹⁵ Eyoñ mia same mo menane yôp; ma vaa mia mise nyô. Mi kusa ye'elane ma biyoñ biyoñ, me nji ke vô'ôlô. Mo menan me ne njalan a metyi.

Bo'one avale di

¹⁶ Woba'ane mendim, tunane miabebien, Va'ane mbia mimboone mienan e mise mam, Jôka'ane mboon *abé.

¹⁷ Yéka'ane mboone mvaé, jeñane nya ntyi'ane mejô. Môt a tibili bôt, bula'ane nye e mbamba *zen. Tyi'ane monenyui ajô *zôsôô, Kama'ane nkus.

¹⁸ Za'ane ñhe bi sañetan, nalé Nti a jô. Nge *abé denan e ntoo évele ne tyaññ, da ye bo éfumulu ane sut; nge e ntoo évele ne zôññ da ye bo ane mevule me ntômba.

¹⁹ Nge mia tyi'i na mia bo mewôk, mia ye di mbamba bibuma ya si;

²⁰ Ve nge mia ben a bo melo, nkpwaté mekôn wo ye mine mia: amu anyu Nti e kobôya.

Yérusalém a ye tuneban

²¹ Jia! Ye tison é mbe mbamba ntaban nje é ntoo ébamba ana' E mbe njalan a *zôsôô, nya ntyi'ane mejôô a nga too été, éyoñe ji é too étaba'a bewôé bôt!

²² Argent wôé a veñesaneya ésôm, Woone wôé ki mfulan a mendim.

²³ Bivete biôé bia bene njôan, ba be miñwuwup be ne *tyiñ, bese ba nye'e biboteze A ba tôñe ma'an; be nji ke tyi'i ajô monenyui *zôsôô, nge kamane nkus.

²⁴ Ajô te, Nti a kobô nalé, Nti ya *minsamba mewosan, nyô ya Israél a ne ngu ma ye liti bebela wom e be bôt be ne ma ngame yat, a ma ye kune mamien e be besiñe bam.

²⁵ Ma ye beta same wo wom a wosane wo, a vaa ésôme jôé avale be wô'ô bo a nduan, a ma ye vaa bifus bise bi ne teke mfi.

²⁶ Ma ye beta bulane betyi'i mejô bôé, avale be mbe melu mvus, a bebôndé mefe'e bôé avale be mbe atata'a. Mvuse valé, ba ye loone wo jôé na Tisone ya *zôsôô, Tison ja wulu *mvo'é.

²⁷ Sioñ a ye kôtéban a nya ntyi'ane mejôô, a bôt be too Yérusalém ba ye kôñelane minlem a mboone mam me ne *zôsôô.

²⁸ Ve bidim bia ye kui e be bebene njôan a bebo *abé, ba ba li'i Nti ba ye jañ.

²⁹ Mia ye bi ôsame amu mi nga kañ azezambe bilé, nde mia semé e minleme mienan été; a mia ye wô'ôson amu mefube mi nga top;

³⁰ amu mia ye bo ane ôzezambe élé ñwô mekaé me maneya viele, ane afup e ne teke mendim.

³¹ Ngungule môt wo ye bo ane mbop, mboone wé ki ane étyaka'a: bebaane bese ba ye di'i nsamba wua, môte ya dime be momo.