ESTHE 9 - Kalate Zambe Nnomo a Mfefe Mfefé Nkôñelan

Beyude ba kune bebien

¹ Ngon awôm a baa ba loon Adar é nga kpwaane melu awôm a mela; éyoñe te nje atiñe njô bôt e nga yiane taté mboon ésaé. Besiñe Beyude be nga too ndi nleme na ba ye dañe be. Aval afe nde e nga viane kui: Beyude be nga dañe ba be mbe be vini'i be.

² Vôm ase, éjôé Asuérus été, Beyude be nga sulan e bitison be nga too a bi ba be nga bôndé fe'e ya jiane be. Te ke môt a mbe nguleya jibi be, amu bôte bese be nga dañe ko be woñ.

³ Biwôlô bebo bisaé, bijiane bi njô bôt, bengovina a e bôte ba saé be njô bôt be nga ke ke Beyude ngam amu be nga ko Mardôsé woñ.

⁴ Mardôsé a nga bili fo'o éwôlô éto; e *nda njô bôt be nga wô'ôtane minkumutu mié a kui e mebôta mesi: a mbe môt a nga dañe dañe bo ngu.

⁵ Avale te nde Beyude be nga belane bôt, be nga vini be, e ne na avale bebien be nga yene mvaé; be nga wôé besiñe bab a mengaa; bôt be nga tu'i abui.

⁶ E nlô tisone Suz, be nga wôé bôte mintete mitan te k'éngôngo;

⁷ be nga wôé fe Parsandata, Dalfôn, Aspata,

⁸ Porata, Adalia, Aridata

⁹ Parmasta, Arizayi, Avidayi a Vayezata,

¹⁰ *bon Aman awôm, Aman mone Amedata, nsiñe Beyude, be nga wôé be. Ve be nji sa be.

¹¹ Môs ôte ôbien, tañe bôt é nga wôéban e Suz, nlô tison, é nga kui be njô bôt.

¹² Njô bôt a nga jô Esthe nga njô bôte na: E Suz, nlô tison, Beyude be wôéya a jaa bôte mintete mitan a bone b'Aman awôm. Abim avé be boya e mebôta me si mevok! Ve jé wo sili? Ma ye ve wo je. Wo sili jé éfe? Wo ye nyoñe je.

¹³ Esthe nye na: Nge njô bôt a yene nalé mvaé, Beyude ya Suz be beta bi ngule ya bo a akiti aval'ane den, a be tyelé bone b'Aman awôm élé yôp.

¹⁴ Ane njô bôt a nga jô na be bo nalé, be nga kate foé y'atiñ e Suz, a bone b'Aman awôm be nga tyeléban élé.

¹⁵ Beyude ya Suz be nga beta sulan e Suz e ngon Adar é too melu awôm a menyin a wôé bôte mintete mila, ve teke sa biôm.

¹⁶ Beyude be nga too mebôta me si mevok be nga sulane fe asu ya kaman ényiñe jap. Be nga kandane besiñe bab a wôé toyini mewôme zamgbwale ya ba be mbe be vini'i be, ve be nji sa akume dap.

¹⁷ Jame te e nga boban e ngon Adar melu awôm a mela. Melu awôm a menyin, be nga jô'é ñwôane bôt, wôna *môs ôte ôbien be nga bo beta dina a meva'a mese.

¹⁸ Ve Beyude ya Suz be nga kune bebien e be besiñe bap e ngone melu awôm a mela a awôm a menyin, be nga wo'on e melu awôm a metan môs ôte fe ñwô be nga bo beta dina a meva'a mese.

¹⁹ Ajô te Beyude be too mefan ba bo abôk e ngon Adar é too melu awôm a menyin: ba bo dina a meva'a mese a veane memvaka.

Ntelan abô'ô ya simesan

²⁰ Ane Mardôsé a nga tili mam me nga boban mete. Nde a nga lôme bekalate e be Beyude be nga too mebôta me si me ne bebé nge ôyab e si ése njô bôt Asuérus a jôô.

²¹ A nga sili be na be bo abôk mbu ôse ngon Adar melu awôm a menyin a awôm a metan.

²² Amu melu mete mme Beyude be nga kandane besiñe bap; ngon éte, ôlune viab ô nga veñesane avak a bidime biabe ki mvom. Ajô te be nga simesane mam mete be ja'ak a meva'a mese, bana be lôme fe ba bevo'o memvaka, be va'a fe minzôzoé biôm.

²³ Beyude be nga tôñe miñye'elane mi Mardôsé a kañese na abôk e jemban éyoñ ôsu te ane ngume fulu.

²⁴ Mardôsé a nga bo be be simesane jame dina na: Aman, e mone Amedata ya mvoñe bôte Agag, nsiñe Beyude a nga tyi'i na a jiane be.

²⁵ Ve Esthe a nga ke yene njô bôt, a njô bôt a nga bendé a ntilane jame te na be bo Aman e mbia jam a nga kômbô bo Beyude; nalé ate Aman a bone bé be nga tyeléban élé yôp.

²⁶ Ajô te nde ba loone mimôs mi abô'ô mite na bepurim, jôé te da so éfia Pur nje ja tinane na: Ôkôk. Beyude be nga ba'ale miñye'elan mi mbe e kalate Mardôsé été, a simesane fe mam mese be nga yen a ma bebien be nga tôbane me.

²⁷ Be nga telé éyem asu dap, mvoñe bôte jab a ba bese be ne veñesane Beyude na be ba'ale mimôs mi abô'ô mite mibaé mbu ôse éyoñ é ne ntelan a avale Mardôsé a nga mane telé jame te na e boban.

²⁸ E miaé mi bôt mia zu, *nda bôt Beyude ése ya abôta si ese a tison ése y'éjôé, é nga yiane ke ôsu a kañe mimôs mi Purim; Beyude a memvoñ me bôte mab be nga yiane bo te suu éyeme te nnôm éto nge vuane jam e nga boban.

²⁹ Esthe, nga njô bôt, ngone Abikaé a Mardôsé, mone Beyude, be nga beta tili éyoñe baa, asu ya yemete a ngule njôane jab ése, kalate a kobô ajô bepurim.

³⁰ Be nga lôme mimfefé bekalate mite e be Beyude bese e mebôta me si ntet a mewôm mebaé a zamgbwa ya si Asuérus a jôô je. Bekalate bete be nga bili mefoé me *mvo'é a nye'an.

³¹ Be nga bendé Beyude na be jem abô'ô bepurim, éyoñ é ne ntelan a avale Esthe a Mardôsé be nga ye'ele; ntyi'ane te ô mbe asu dab a memvoñ me bôte map, avale fe ane ntyi'an wo fombô *ntyiane bidi a miñyôn.

³² Mebendé me Esthe mete me nga yemete ntelan abô'ô bepurim, a be nga tili me e kalate ate été.