ESTHE 6 - Kalate Zambe Nnomo a Mfefe Mfefé Nkôñelan

Aman a ne ntindane ya bete Mardôsé yôp

¹ Alu te njô bôt a nji bo nguleya ke ôyo. A nga sili na be zuu nye bekalate minkañete, kalate ba tili mam ma boban e si a jôô je, nde be nga lañe nye nye.

² Be nga dañe lañe nye vôm a kañete ane Bigtan a Tévék, bebaé ya bebo bisaé be nga ba'ale anyiine menda me njô bôt, be nga kômbô wôé njô bôt; a ane Mardôsé a nga kulane fe'e jap.

³ Nde njô bôt a nga sili na: Aval'avé be nga ya'ane Mardôsé a bete nye yôp? Bebo bisaé be nga yalane na: A nji nyoñe ma'an.

⁴ Njô bôt a nga beta jô na: Za a ne e nseñe ya *nda njô bôt? Awolo te ebien Aman a nga nyiin e nseñe y'atan, a za'a sili njô bôte na be tyelé Mardôsé élé a nga kôme nye.

⁵ Bebo bisaé be nga yalane na: Aman nye a ne e nseñ. Njô bôt nye na: A nyi'in.

⁶ Ane Aman a nga nyiin a njô bôt a nga sili nye na: Ma yiane bo môt ma kômbô bete yôb ngume mbetan aya? Aman a nga fas ajô *nlem été na: Za njô bôt a kômbô bete yôb abime te? A ne bo fo'o ve ma!

⁷ Nde a yalane na: A njô bôt, nge wo kômbô bete môt éziñe yôp,

⁸ jalé'é nye jia ya mengômesane môé womien, be zule fe nye ékabela jôé womien, ékate njô bôt é too nye nlô.

⁹ Eyoñe te wo jô wua ya biwôlô bebo bisaé na a jalé môt ate ngômesan, a kee a wulu nye e tisone tison a yôta'ane na: Avale di nde njô bôt a bo e môt a kômbô bete yôp!

¹⁰ Njô bôt nye Amane na: Jika'a ñhe ke nyoñe ngômesan a ékabela, a bo Mardôsé aval ebien wo te jô ma; a ne e mone Beyude a saé anyiine *nda njô bôt. Te ke li'i mone jam éziñ.

¹¹ Ane Aman a nga nyoñe ngômesan a ékabela. A nga jalé Mardôsé ngômesan, a daa nye ékabela yôb a kee nye e Tisone Tison a yôta'ane na: Avale di nde njô bôt a bo e môt a kômbô bete yôp!

¹² Mardôsé nye ve bulan anyiine *nda njô bôt, Amane ki ve bulane *nda jé éza éyoñ, asu mbutan, *zen ya solé ôsone vié.

¹³ A nga kañete Zérek, minga wé a bemvôé bé bese jam e nga kui be nye. Bebôndé mefe'e bé a Zérék be nga jô nye na: Nge Mardôsé ate, nyô ô tatéya na wo ku mimbek asu dé, a ne mone Beyude, yeme na wo ye bo te tebe nye ôsu.

¹⁴ Be ngenan be kobô'ô nye, ane beba'ale *nda njô bôt be nga so, nde be nga ji'a kee Aman e ndiane Esthe a nga kôm.