ESDRAS 9 - Kalate Zambe Nnomo a Mfefe Mfefé Nkôñelan

Ajô meluk e zañe Beyude a Bikuu

¹ Eyoñe mam mete me maneya, minlô mi bôt mi nga zu be ma a jô na: Ayoñ Israél, betuni a bone be Lévi be nji ke kandan a *meyoñ ya mesi be too, nge kandan a mbia mboone mame wop: nyô bôte ya Kanaan, nyô Beétieñ, Beférézieñ, Beyébuzieñ, bone b'Amon, bone be Môab, bôte y'Ejipte a Beamorééñ.

² Amu be nga lu'u bengone bap asu dabe bebien a asu bobefame bap, a bundane mvoñ é ne étyi a bôte ya mesi mete; minlô mi bôt a beyeme metiñ mbe be nga taté bo beta mbia jam ate.

³ Eyoñ me nga wô'ô ajô te, me nga nyabe mengômesane mam a alô'ô dam, me nga té ésil a tabe si nyôl é too ma nte'an.

⁴ Eyoñe te bôte bese be nga nyeñeban amu mejô me Zambe Israél, be nga sulan vôm me nga too amu mbia mboon besoo minkôm be nga bo, a ma me nga too si, nyôle nte'an akekui éyoñ mimveane ya mamengô'é.

⁵ Eyoñe ba ve mveane ya mamengô'é, me nga kôlô si ôsame viam été, ngômesan jam a alô'ô dam nyaban; me nga kute meboñe si a same mo e be Nti Zambe wom,

⁶ a jô na: A Zambe wom, me nji fe yem jôm me né, a ma wô'ôson ya bete asu dam e be wo, a Zambe wom! Amu minkobane miañgan mi maneya bulan a yandan e minlô miañgane yôp, a mekua mañgan me vuseya a kui yôp.

⁷ Ataté melu b'ésaa bangan, mekua mañgan me neneya a kui e môse wu, a ô nga kalane bia e mo besiñe bangan, e nkpwaté mekôn, e minkôm, e nsa, ôsone ya asu dangan ane môse ya den amu minkobane miañgan.

⁸ V'akôsa bo nalé, éyoñ ébiene ji, Nti, e Zambe wongan, a ndôme mvamane bia a nsuane bôt b'éziñ be so'o minkôm, a mveane bia vôm bi ne tabe e vôme wé a ne étyi, nalé ate Zambe wongan a ye kui bia mis a ve bia ôbe ényiñ ézezañe ya éto *ôlo jañgan.

⁹ Amu bi ne alo, ve Zambe wongan a nji ke jô'é bia *ôlo viangan été. A litiya bia mvame jé asu be bejô bôte ya Perse, mfa'a ya bulane ve bia ényiñ, nalé bia ye beta telé ndaa e Zambe wongan, a beta kôm mevôm me nga mane tyamban, a ve fe bia vôm ya wo'on e Yuda a e Yérusalém.

¹⁰ Eyoñe ji, a Zambe wongan, bia ye ñhe beta jô aya mvus éte'

¹¹ Amu bi nga li'i mebendé môé ô nga ve bia a anyu bebo bisaé bôé bekulu mejô na: Si mia nyiin a nyoñe je ane ngap é ne si é ne ndaman amu mimboon *meyoñ me too été ma bo, amu be jaléya je a mam me ne angôndô ataté li a kui li.

¹² Ajô te te veane bengone benan e be bobefame bap, a te lu'ane bengone bap asu bobefame benan; mia ye bo te nyamete *mvo'é jap nge mvaé jap; éyoñe te mia ye bo ngu a di bidi bia yô si éte, a mia ye li'i je é bo ngap asu bone benan.

¹³ Mvuse ya mbia be mam mese me nga kui e be bia amu mbia mimboone miañgan a amu mekua mañgan, akôsa bo ô nji ke ve bia *melep me too abime da yian a minkobane miañgan, a Zambe wongan, a amu ô ba'aleya besoo minkôm ba,

¹⁴ ye bia ye beta taté na bia tyam mebendé môé. A ke ôsu a bo bilat a *meyoñ me ne mbia jôm ana? Y'ayaa dôé da ye bo te yôñe be bia a kui vôm ya mane jiane bia teke *mebuka'a nge ba ba fam awu'

¹⁵ A Nti, e Zambe Israél, ô ne *zôsôô, amu bi ne den ve *mebuka'a. Bia bana bi ne ôsu viôé a mekua mañgan, a teke môt a ne tebe asu dôé amu ajô di!