ESDRAS 7 - Kalate Zambe Nnomo a Mfefe Mfefé Nkôñelan

Atiñ da vôlô Esdras

¹ Eyoñe mam mete me lôteya, melu Artakzersés njô bôte ya Perse a nga jôô, Esdras mone Azaria, mone Ilkiya,

² mone Salum, mone Sadok, mone Ayitub,

³ mone Amaria, mone Azaria, mone Merayôt,

⁴ mone Zaraya, mone Uzi, mone Buki,

⁵ mone Abisua, mone Finéas, mone Eléazar, mone Aron, *ntuni nnen.

⁶ Esdras ate a nga kôlô Babilôn; a mbe ntili bekalate, njô a nga ve émien e metiñ me Môze mme Nti, e Zambe Israél, a nga ve. A amu wo Nti, e Zambe wé, ô mbe be nye, njô bôt a nga ve nye jôm ése a nga sili.

⁷ Bone b'Israél b'éziñ, betuni a bone be Lévi, beyia bia, beba'ale mimbé a Benétinieñ be nga ke fe e Yérusalém, mbu zamgbwale Artakzersés a nga jôô.

⁸ Esdras a nga kui Yérusalém e ngone tane ya mbu zamgbwale njô bôt a nga jôô.

⁹ A nga telé nkôlan ya Babilôn e ngon ôsu é too alu da, a a nga kui Yérusalém e ngone tane é too alu da, mbamba wo Zambe ô mbe be nye.

¹⁰ Amu Esdras a nga ve nleme wé na a yé'é a bo metiñ me Nti a ye'ele Israél memvinda a minjôan.

¹¹ Mejô ya kalate njô bôt Artakzersés a nga ve Esdras *ntuni a ntili bekalate na a tili aval'ane Nti Emien a nga bendé a tili me ajô Israél na.

¹² Ma, Artakzersés njô bôte bejô bôt, ma tili Esdras *ntuni a ntili bekalate, nyô a veya émien e metiñ me Zambe ya yôp, akk.

¹³ Me veya abendé na be suu mia be bôte bevo'o ya Israél, betuni a bone be Lévi, mbe be kômesaneya na mia be be mia ke e Yérusalém.

¹⁴ Ajô te yeme na njô bôt a bebôndé mefe'e bé zamgbwa ba lôme wo ô ke jome Yuda a Yérusalém aval'ane atiñe Zambe wôé é ne wo wo é né.

¹⁵ A na ô be'e argent a or, mbie njô bôt a bebôndé mefe'e bé be maneya ve Zambe Israél, a mbamba nkômbane wop a nye a bili étaba'a jé e Yérusalém,

¹⁶ argent a or ase wo ye koone bie éfase si ése ya Babilôn, a mimvean ane *nlem wo kômbô, mmie bôt a betuni ba ye bo asu ndaa e Zambe wop é ne Yérusalém.

¹⁷ Ajô te wo ye kuse beyôm benyak, beyôm mintômba, bone mintômba, mimveane miap mi ne avut a mi mi ne binyunyui, wo ye kuse bie a moné ate, a wo ye ve bie ata'a metuna'a Zambe wônane yôp nde é ne Yérusalém.

¹⁸ Jam ése mia ye yene mvaé ya bo, womien a bobenyoñ, a abime argent a or bia buk, mia ye bo de aval'ane nkômbane Zambe wônan ô né.

¹⁹ Kele bôé biôm be kalaneya wo asu ésaé ya ndaa e Zambe wôé, asu Zambe ya Yérusalém.

²⁰ Wo ye nyoñ abime biôm da yian e *nda ba naan akume njô bôt asu bisaé bivo'o wo ye bo asu ndaa e Zambe wôé.

²¹ A ma, njô bôt Artakzersés, ma bendé beba'ale akum bese y'Efrate yate na be ve Esdras *ntuni a ntili bekalate a veya émien asu metiñ me Zambe ya yôp, jôm ése a ye sili mia teke selan:

²² betalañ be argent ntet, minkoé mi nlisi ntet, minlôñga mi woon mi ne anen ntet a nku teke alañé.

²³ Jam ése Zambe ya yôp a bendéya da yiane boban avale é jôbaneya asu ndaa e Zambe ya yôp, ndemben ayaa dé da ye bo te zu éjôé njô bôt a e be bone bé.

²⁴ Ajô te bia bo mia ayemé na: Teke mvôla, *toya nge duan ba ye sili betuni, bone be Lévi, beyia bia, beba'ale mimbé, Benétinieñ a bebo bisaé ya *nda Zambe éte.

²⁵ Wôna wo, Esdras, aval'ane fe'e Zambe ô bili é né, telé'é betyi'i mejô a beyeme metiñ, mbe be tyi'i bôte bese mejô Efrate yat, ba bese ba yeme metiñ me Zambe wôé a ye'ele me e be ba be ne te yeme me.

²⁶ E môt ase a ye bo te ba'ale atiñe Zambe wôé a atiñe njô bôt avale da yian, ba ye ve nye *melep, ma ya awu, nge mekaban, nge nluman aleman, nge nkeane mimbôk.

²⁷ Nti a bo'o ébotan, e Zambe b'ésaa bangan, nyô a nga ve njô bôte nleme ya ve *nda Nti é ne Yérusalém abim étôto'o di.

²⁸ A nye ate fe a jaléya ma mvame jé asu njô bôt, bebôndé mefe'e bé, a asu bebo bisaé bé bese be ne ngu! Amu ngu e wo Nti a ne Zambe wom ô nga ve ma, nde me nga sulan minlô mi bôte y'Israéle na bia be be bi ke.