ESDRAS 6 - Kalate Zambe Nnomo a Mfefe Mfefé Nkôñelan

Darius a tili kalate na melôñ ya * nda Zambe me ke ôsu Mveane Zambe nda

¹ Ane njô bôte Darius a nga ve ngule na be ke e *nda ba ba'ale bekalate a naane mintilan e Babilôn a bo minjeñan.

² Eyoñe te be nga koone mvulekane kalate e tison Ameta, éfas éjôé ya Médi, jam ya simesan é mbe ntilan été avale di:

³ mbu ôsu Sirus njô bôt a nga jôô, ñwô njô bôt Sirus a nga bendé na: Nda éte be beta lôñe je é bo vôm ba tyi'i mimvean, a ja yiane bi mimbôka'a mi ne ngu. Ja ye bo ôyabe yôp menyi'i me mo mewôm mesaman; ndam ki menyi'i me mo mewôm mesaman.

⁴ Minnoñ meko'o me ne mbaan a nnoñ mimfefé bilé wua. Nda njô bôt nje ja ye ya'ane tañ ése.

⁵ Jam afe na ba ye bulan biôm bi ne mboon a or, a argent, mbie Nébukatnétzar a nga vaa e *nda Zambe ya Yérusalém a kee bie e Babilôn, ba ye bulane bie e *nda Zambe ya Yérusalém e vôm bi nga too, a bôé bie e *nda Zambe.

⁶ Eyoñe ji a Tatnayi njôô ya Efrate yat, Sétar-Bôznayi a mia beébe bebo bisaé babe ya Afarsak mi too Efrate yat, teba'an e fefe.

⁷ Jôka'an bisaé ya *nda Zambe éte bi ke ôsu; môt a jôô Beyude baa be bemvendé bap be lôñe je e vôme wé.

⁸ Abendé ma ve da fombô jam mia yiane bo bemvendé ya Beyude bete ane be ne beta lôñe *nda Zambe éte: mia ye nyoñe tañ ja yiane ésaé akume njô bôt été, akume te é so'o betoya ya Efrate yat, a ya'ane je bôte bete éyoñ ja yian, nalé ésaé ja ye bo te tebe.

⁹ Jôm ja yian asu mimveane Zambe ya yôp mi ne ngum nje ji: bitoñ beyôm benyak, beyôm mintômba a bone mintômba, avut, nku, woon a mbon; mia ye ve je betuni ya Yérusalém *môs ane *môs, avale bebien ba ye sili, a teke éngbwemese éziñ,

¹⁰ nalé ba ye ve Zambe ya yôp mimvean mi ne mbamba menyum a ye'elan asu njô bôt a bone bé.

¹¹ Abendé ma ve asu nyô ase a ye tyam nkobô wu nde di: ba ye vaa éfus élé ya *nda jé a tyelé nye été a wôé nye; ba ye bo *nda jé avise mbuan wo nyum *abé.

¹² Wôna Zambe, Nyô a boya na jôé dé é tabe e vôme nyô, a ye kpwé njô bôt a bôte bese ba ye same wo wop a tyam njôane wu, éyoñe ba tyame *nda Zambe é ne Yérusalém! Ma Darius, me veya abendé te. Ba yiane bo de mewôk teke selan.

¹³ Eyoñe te Tatnayi njôô ya Efrate yat, Sétar-Bôznayi a beébe bebo bisaé bap be nga bo ane abendé njô bôt Darius a nga ve be é mbe teke yañge.

¹⁴ Ajô te bemvendé ya Beyude be nga lôñ, a ésaé é nga wulu be *mvo'é, aval'ane minkulan mejô Agé *nkulu mejô a Zakari mone Iddô mi mbe; be nga lôñ a beta kôm aval'ane abendé Zambe Israél é mbe, a aval'ane abendé Sirus, di Darius a di Artakzersés njô bôte ya Perse é mbe.

¹⁵ Nda é nga man e môse lale ya ngon Adar, mbu saman Darius a nga jôô.

¹⁶ Eyoñe te bone b'Israél, betuni a bone be Lévi a *mebuka'a me bôt me nga too minkôm, be nga bo abô'ô ya dii *nda Zambe éte a mevak.

¹⁷ Asu ndiane *nda Zambe, be nga ve beyôm benyak ntet, beyôm mintômba mintet mibaé, bone mintômba mintet minyin; asu nsilane *njaman abé ya Israél, ase be nga ve beyôm bikela awôm a bebaé aval'ane tañ *meyoñ y'Israél é né.

¹⁸ Be nga telé betuni aval'ane minsamba miap mi né a bone be Lévi avale be ne nkaban mfa'a ya bo ésaé Zambe e Yérusalém, aval'ane é ne ntilan e kalate Môze été.

¹⁹ Ane bôt be nga so minkôm be nga jem abô'ô Pak e ngon ôsu ya mbu é too melu awôm a menyin.

²⁰ Betuni a bone be Lévi be nga tune bebien vôme wua, bese be mbe mfuban; nde be nga wôé éyeme Pak, asu bôte bese be nga so minkôm, asu bobenyañe bap be mbe betuni a asu dap bebien.

²¹ Bone b'Israél be nga so minkôm be nga di Pak ba be ba bese be nga kandane mvin ya *meyoñ me ne te yeme Zambe a ba be nga zu fulan a be mfa'a ya jeñe Nti, e Zambe Israél.

²² Nde be nga jem abô'ô belet é ne te mvusan a meva'a mese, tañe melu zamgbwa, amu Nti a nga bo na be vak, éyoñ a nga kôñelane nleme njô bôte ya Asiri mfa'a wop a su'u be ésaé ya *nda Zambe, e Zambe Israél.