ESDRAS 5 - Kalate Zambe Nnomo a Mfefe Mfefé Nkôñelan

Nlôñan * nda Zambe wo ke ôsu

¹ Nkulu mejô Agé a *nkulu mejô Zakari, mone Iddô, be nga kulu mejô a jôé Zambe Israél e be Beyude be nga too e Yuda a e Yérusalém.

² Eyoñe te Zôrôbabél mone Séaltiél a Yasua mone Yôtsadak be nga kôlô si a beta taté nlôñan *nda Zambe ba be bekulu mejô be Zambe ba be be be nga too.

³ Eyoñe te ébien nje Tatnayi njôô ya Efrate yat, Sétar-Bôznayi a beébe bebo bisaé bap be nga zu e be be a kobô be na: Za a nga ve mia ngule ya lôñe *nda éte a kôme mimfine mié'

⁴ Nde bi nga yalane be na: Bôte ba lôñe *nda nyô be ne môé na beza'

⁵ Ve dise Zambe wop é nga too e be bemvendé ya Beyude. Be nji ke telé mboone bisaé nté be nga yañge na foé é ke e be Darius a ke fe kui éyalan ya kalate a kobô ajô te é soya.

⁶ Kalate Tatnayi njô bôte ya Efrate yat Sétar-Bôznayi a beébe bebo bisaé bap bevo'o be ne Afarsak Efrate yat, be nga lôme Darius.

⁷ Be nga kate nye foé é too avale di: A njô bôte Darius, mbôlô!

⁸ Njô bôt a tame yeme na bi nga ke éfase éjôé é ne Yuda a kui e ndaa Zambe a ne anen. Ba lôñe je a *mekok me ne mbaan; be nga bôé bilé e mimfin; ésaé ja boban a ngômôtô ése a ja wulu fe *mvo'é e mo map été.

⁹ Bi nga sili bemvendé minsili a kobô be na: Za a nga ve mia ngule ya lôñe *nda nyô a beta kôme mimfine mi'

¹⁰ Bi nga sili fe be biyôlé biabe na bi lôme wo bie a tili biyôlé minlô mi bôt.

¹¹ Eyalan be nga ve bia nje ji: Bi ne bebo bisaé be Zambe ya yôp a si, a bia beta lôñe *nda é nga tame lôñeban den a ntoo mimbu abui mvus; beta njô bôt y'Israél a nga lôñe je a mane fe je.

¹² V'éyoñ b'ésaa bangan be nga bo Zambe ya yôbe na a wô'ô ôlun, nde a nga kee be e mo me Nébukatnétzar njô bôte ya Babilôn, mone Kaldééñ a tyame *nda éte a kee bôt e minkôme Babilôn.

¹³ Ve jame da na mbu ôsu Sirus a nga jôô e Babilôn, Sirus a nga ve abendé na be beta lôñe *nda Zambe.

¹⁴ E *nda Zambe ya Babilôn été, Sirus a nga vaa fe biôme Nébukatnétzar a nga vaa e *nda Zambe ya Yérusalém a kee bie e Babilôn, a nga bo na be kalane bie Sékbatsar, môt émien a nga telé njôô ya Yuda.

¹⁵ Ane a nga jô nye na: Kele biôme bi, a bôé bie e *nda Zambe ya Yérusalém, a na *nda Zambe é beta'a lôñeban e vôme wé.

¹⁶ Ane Sékbatsar ate a nga zu a bôé mimbôka'a ya *nda Zambe e Yérusalém; ataté éyoñe te a kui éyoñe ji, ba lôñe je ve é ngenan te man.

¹⁷ Ajô te éyoñe ji, nge njô bôt a yene nalé mvaé, be tame jeñ e vôm ba ba'ale mintilan mi njô bôt e Babilôn a yen nge njô bôte Sirus a nga ve abendé éziñe na be beta lôñe *nda Zambe éte e Yérusalém. Mvus éte, njô bôt a tame kalane bia nkômban wé mfa'a ya ajô di.