ESDRAS 3 - Kalate Zambe Nnomo a Mfefe Mfefé Nkôñelan

Nkôman ata'a metuna'a asu mimvean mi ne ngum, mbôan mimbôka'a ya * nda Zambe

¹ Ngone zamgbwale é nga kui a bone b'Israél be nga too e bitisone biap. Nde bôte bese be nga sulan e Yérusalém ane môte wua.

² Ane Yasua mone Yôtsadak a bobenyañe bé betuni, nalé fe Zôrôbabél mone Séaltiél a bobenyañe bé, be nga kôlô si a lôñe ata'a metuna'a Zambe y'Israél asu mimvean mi ne ngum aval'ane é ne ntilan e kalate metiñe Môze, môta Zambe.

³ Nde be nga beta telé ata'a metuna'a te e mbôka'a wé yôp, amu be nga ko e bôt be nga koone be valé woñ, ajô te be nga ve Nti mimvean mi ne ngum ata'a metuna'a te yôp.

⁴ Be nga jeme fe abô'ô bibem aval'ane é ne ntilan, a be nga ve mimvean mi ne ngum *môs ane *môs aval'ane tañ ja yiane *môs ôse é né.

⁵ Mvuse ya valé, be nga ve fe mimvean mi ne ngum mia veban éyoñ ése, a mimvean mi ne ngum asu metéé me ngon a asu mebô'ô mese a mi ba ve Nti aval'ane *nlem wo kômbô.

⁶ Eyoñe *môs ôsu ya ngone zamgbwale ô nga kui, be nga taté ve Nti mimvean mi ne ngum. Ve da na valé mimbôka'a ya *nda Zambe Nti mi ngenan te bô'ôban.

⁷ Ane be nga ve beba *mekok a bebo mendile moné; wôna be nga ve bôte ya Sidoñ a Tir bidi, menyu a mbone na be zuu bilé bi Sédre ya Libañ bi wulu'u e mañe mañ a kui e Yafa, aval'ane Sirus njô bôte ya Perse a nga ve ngu.

⁸ Mbu baa ya nkuan be nga kui e *nda Zambe ya Yérusalém, e ngone baa, Zôrôbabél mone Séaltiél, Yasua mone Yôtsadak a bobenyañ bevo'o bese, betuni a bone be Lévi a ba bese be nga kui e Yérusalém be so'o minkôm, be nga taté ésaé a ve bone be Lévi be ne mimbu mewôm mebaé a mitan ésaé ya fombô bisaé ya *nda Nti ane bia wulu.

⁹ Wôna Yasua ba be bone bé a bobenyañe bé, Kadmiél ba be bone bé be mbe bôte ya Yuda, bone be Enadad ba be bone bap a bone be Lévi bobenyañe bap, bese be nga nyoñe ésaé ya fombô ba be nga bo ésaé ya *nda Zambe.

¹⁰ Eyoñe belôñe *nda be nga bôé mimbôka'a ya *nda Zambe a Nti, be nga telé betuni be be'e mengômesan, be bili fe metoñ, a Belévit bone b'Asaf be bili biwoé ane ba ye kañe Nti aval'ane David njô bôte y'Israél a nga liti.

¹¹ Be nga kañese bia a nkañan a mvean Nti duma be bela'an mejô mana: Nye'ane wé mfa'a Israél ô too nnôm éto. A bôte bese be yôta'ane beta ñyôtan, be kañe Nti amu be nga bôé mimbôka'a ya *nda Nti.

¹² V'abui ya betuni, bone be Lévi a minlô ya menda me bôt mi ntoo abui mimbu, amu be nga yene ndaa ôsu, be nga yi abui éyoñ be nga bôé mimbôka'a ya *nda éte mise map me lôô. Ve bôte bevo'o abui be nga bete metyiñe yôbe ngu a yôtan ñyôtane ya mevak,

¹³ ajô te é mbe ayaé ya kandé ñyôtane mevak a wu miñyôn amu éduñe ñyôtane bôt é mbe é kele ôyap.