EKLEZIASTE 9 - Kalate Zambe Nnomo a Mfefe Mfefé Nkôñelan

Asu'ulane da e be bôte bese

¹ Mam mese me nga yen, me nga ba'ale me. Jam me nga su'ulane yen e ne na: Zambe étam nye a jôô ényiñe bezôsôô be bôt a mimfefek avale fe a jôô mimboone miap. Môt a nji yem ja'ane nye'an, ja'ane ziñ, mam mete mese me ne nye ndim ôsu.

² Mam mese ma kui be bôte bese avale da: asu'ulane da da kui e be zôsôa môt a be mbo *abé, e be mbamba môt a mbia môt, e be môt a ne *mfuban a nyô a ne mvin, e be nyô a ve metuna'a a nyô a nji ve metuna'a; e be mbamba môt a mbo *abé, e be nyô a kane ngana aval'ane be nyô a ko woñe ya kane je.

³ E ne mbia jam mfa'a ya mam mese ma bobane jôbe si va na: Jame da da kui e be bôte bese. Mam ma tôñe valé me ne na: Minlem mi bôt mia jaé ne lut a *abé, nso'on étyi nté be vee; mvuse valé, ba ke vôme miñwuan mi né.

⁴ Nyô a ne nlatan a bevevee bese a ne bi ndi *nlem, ke vevea mvu a ne mvaé a dañe mbime ngbwengbwem.

⁵ Bevevee ba yeme na ba ye wu; ve miñwuan mi nji yeme jôm a mfa'a wop ma'an me nji fe bo amu be vuaneya be.

⁶ Nye'ane wop, ziñe jap a abane dap bi jañeya; a ba ye bo te beta bi ngap mfa'a ya mam mese ma bobane jôbe si va.

⁷ Kelek a di bidi biôé a mevak, nya'a fe woone wôé a mbamba *nlem: amu Zambe a kañeseya mimboone miôé.

⁸ Mengômesane môé me bo'o éfumulu éyoñ ése, a mbon ô bo'o te jembane nlô wôé.

⁹ Vôma'an ényiñ a minga wo nye'e melu mese ya momo ntabane Zambe a nga ve wo jôbe si, nté bemomo melu môé; amu ngabe jôé y'ényiñ nje le ézezañe ya nju'u wo wu jôbe si.

¹⁰ Jam ese wo wôé wo yene mvaé ya bo a ngule jôé, bo'o de, amu étaba'a miñwuan e vôme wo ke, ésaé, mfasan, nyeman a fek bi ne momo wôé.

Fek é nji volô éyoñ ése

¹¹ Me nga yene jam afe jôbe si: mmatane mbi ô nji bo jôme bôt ba dañ ôlet, mewosan jôme ya bôte ba dañe ngu, bidi jôme ya bôte ba dañe fek, akum jôme ya bôte ba dañ atyeñ, *mvam jôme ya bôte ba dañe nyeman, amu mvom a bidim bia kui e be be bese.

¹² Môt a nji yem awolo dé a dañe bekos ba bili avote bidim, nge dañe anon da bili melam. Avale te bidim bia kui be bone be bôt atemetem.

¹³ E jôbe si, me nga yene jam afe e n'anen ajô fek:

¹⁴ ôyôme tison ô nga too ô bili bôte tyôtyoé, nde beta njô bôt a nga zu wôsane wô a dili wô a bita.

¹⁵ Nzôzoé môt ô mbe été v'ô too fek, nd'ô nga nyii tison a fe'e jé, ve môt éziñ a nji simesane *nzôzoé te.

¹⁶ Nde me nga jô na: Fek ja dañ éwôlô. Ve da na fe'e *nzôzoé ja biaséban, a be nji vô'ôlô mejô mé.

¹⁷ Mejô mimfefek ma wô'é évôvoé été me ne mvaé a dañe ñyôtane njô bôt a yôtan e mekut été.

¹⁸ Fek é ne mvaé a dañe mengale mewosan; ve mbo *abé wua a jaa abui mvaé.