EKLEZIASTE 8 - Kalate Zambe Nnomo a Mfefe Mfefé Nkôñelan

A ne mvaé ya bo njô bôte mewôk

¹ Za a funane mfefe'e môt a za *a yem atinane ya mam? Fek môt a bili ja bo asu dé na e faé a tyendé fe mimbote y'asu dé.

² A ne mvaé ya ve njô bôte mewôk éyoñ a kobô amu bi nga kane nye ngana asu Zambe,

³ ajô te te bo avôle ya ke ny'ôyap a te wo yemele e mbia jam été amu a ye bo jam ese a ye yene mvaé.

⁴ Amu nkobô njô bôt ô bili ngu; za a ye jô nye na: Wo bo jé'

⁵ Nyô a ba'ale abendé a ye bo te yeme jam éziñ e n'abé. Nleme mfefek wo yem éyoñ a ntyi'ane mejô.

⁶ Yaa, jam ese é bili éyoñ a ntyi'ane y'été, ve mbia jam a ne asu môt:

⁷ a ne te yeme jam da ye boban, za a ye liti nye éyoñe jame te da ye kui'

⁸ Môt éziñ a se nguleya jôô mveb'ényiñ a bi wô na ô bo te kôlô; nalé fe na môt éziñ a se nguleya jôô môse y'awu: *njaman ô nji bo e mewosane mete, nalé fe na *nkpwala ô nji ve ba ba bo wô zene ya tup.

⁹ Mam mete mese me nga yene me éyoñe me nga wua mise mam mfa'a mam mese ma boban e jôbe si, éyoñe môt a bili ngule ya bo môte mbo'o *abé.

Mevak me ne boban akôsa bo njembane ma'an

¹⁰ Ke me nga yen mbia be bôt be jambe'e soñ a ke. Bôt be mbe be so'o vôm a n'étyi a vuane mboone wop e tison été: momo jam fe le.

¹¹ Nleme ya bôt ô ne njalane ya bo *abé amu melebe ya mbia mboon me ne te ji'a veban.

¹² Ve da akôsa bo na mbo *abé a ne bo *abé biyoñe ntet a beta fe nyiñ abe melu, me ma yeme na mvaé é ne asu ba ba ko Zambe woñ amu be bili woñ asu dé.

¹³ Ve mvaé é nji bo asu mbo *abé, v'a ye ke limiti melu mé a dañe nsisiñ, amu a nji bi woñ asu Zambe.

¹⁴ Momo jame mfe a bobane *si nyô a too na: Asu'ulane ya bezôsôô be bôte b'éziñ da viane lu'an a mboone bebo *abé, a di bebo *abé b'éziñ é luka'an a mboone bezôsôô be bôt: ma jô na momo jame fe le.

¹⁵ Ajô te me nga se'e mevak, amu jam afe, e jôbe si, e nji bo mvaé asu môt ve na a di, a nyu a wô'avak; jam da yiane tôñe nye ésaé jé été nté melu y'ényiñe Zambe a ve nye jôbe si nde le.

¹⁶ Eyoñe me nga ve *nlem asu ya yeme fek a yene f'évevé bôt be bôô je *si nyô, amu mise me môt me nji k'ôyo to'o amôs to'o alu,

¹⁷ éyoñe te nje me nga yen ésaé ése Zambe a nga bo; môt a se nguleya yemelan ésaé ja bobane jôbe si va, akôsa bo na a saé na a jeñe je, ve teke yene je; ja'ane mfefek wo yemete na wo yem, ve teke nguleya yene je.