EKLEZIASTE 7 - Kalate Zambe Nnomo a Mfefe Mfefé Nkôñelan

Jôm é ne mvaé

¹ Mbamba jôé a ne mvaé a dañe mbon ô ne mbamba menyum A môse y'awu mvaé a dañe wu y'abialé.

² A ne mvaé ya ke *nda awu a dañe nkeane ya *nda ndian. Amu asu'ulane ya môt ase e ne nd'awu a vevea môt a ke nyoñe nye'elane valé.

³ Olun ô ne mvaé a dañe vioé amu na éyôé é kusa bo asu ve *nlem ô ne bo mevak

⁴ nleme mimfefek ô ne e nd'awu, ve wu mekute me bôt e *nda mevak

⁵ a ne mvaé ya wô'ô bijô bi mfefek a dañe na ô bo môt a wô'ô jia mekute me bôt.

⁶ Vioé mekute me bôt ô ne ane biyo bia tôtan e mvé si: dili fe e ne momo jam.

⁷ Etibela'a é ne bo mfefe'e na ô veñesan akut, ve memvaka ma bo na môt a dimili fek.

⁸ Asu'ulane jam e ne mvaé a dañ atata'a y'été ôjibi ô ne mvaé a dañe mebun.

⁹ A nji bo mvaé ya ji'a wô'ôlun amu mekute me bôt mme ma ji'a wô'ôlun.

¹⁰ Te sili na: Melu ya mvus me mbe abeñ aya a dañe melu ya den? Amu nsili wôé wo liti na fek é ne wo momo.

¹¹ Fek é ne mvaé an'élik; ja volô bôt be bili je.

¹² Ja kamane môt avale f'ane moné; môt a bili je a nyiñ ayap: ajô te e ne mvaé ya yeme je.

¹³ Tame fombô mboone Zambe: Z'a ne sôane *zôsôô jôm a boya ékotekot'

¹⁴ E môse mam mese ma ke *mvo'é, va'ak, e môse ma ke *abé: tebe'e élé atyeñe si: Zambe a lôme mvaé ba *abé avale da, nalé ate môta binam a ye bo te yeme jam da ye kui nye akiti.

Abé jôme ya si ése

¹⁵ Me nga yene mam mete mese éyoñe bemomo melu y'ényiñe jam. Zôsôa môt éziñ a jañ e *zôsôô wé été a mbia môt a nyiñ ayap mbia mboone wé été.

¹⁶ Te bo *zôsôô a dañe nné, a te dañe bo fek; amu jé wo ye jiane womien'

¹⁷ Te dañe bo *abé a te veñesan akut; amu jé wo yiane wu te na éyoñe jôé é kui'

¹⁸ A ne mvaé ya bi jame dina, ve wo wôé teke jô'é dili: amu nko Zambe woñ a nji yiane fubane bibé.

¹⁹ Fek ja bo mfefe'e na ô dañe bo ngu a dañe bengovina awôm be too e tison.

²⁰ Yaa! Zôsôa môt a bo mvaé teke bo *abé a nji bo *si nyô.

²¹ Ajô te ñhe te ve *nlem mfa'a ya mejô mese bôt ba kobô, ô za wôk ane mbo ésaé wôé a kobô wo *abé.

²² Amu abui biyoñ, wo yeme na, wo fe ô nga kobô bôte bevo'o *abé.

Fek ja jemban e be fam a minga

²³ Me nga mane fase mam mete mese a fek. Me nga jô na: Ma ye bi fek. Ve é ne m'ôyap.

²⁴ Bebela a ne ndam a édo'o abui. Z'a ne wô'ô ny'ase'

²⁵ Ma ma ye ve ngu a nleme wom ôse ya yem, ya fak a jeñe fek a mbamba nta'ane bifia, ya yeme fe na *abé e n'akute jam, akute jam da bo môte na a sok.

²⁶ Ve me nga yene na e minga a n'ôlam, nyô nleme wé ô n'avot a mo mé mengata'a, a n'ayô a dañ awu; môte Zambe a yene mvaé a tube nye, ve mbo *abé a ye bo jôm a bi.

²⁷ Jam me nga yene le, nalé nkatefoé a jô, éyoñ me maneya fase biôm jijia asu ya bi jame ya jô.

²⁸ Me ngenane ma jeñ, ve me ngenane te yen: me yeneya fame jia e toyini befam été, ve me ngenane te yene minga wua e binga bese été.

²⁹ Ve da ye ô lôô jam me nga yen: Zambe a nga kôme bôt *zôsôô, ve bebien be nga mane ve mam ayaé.