EKLEZIASTE 5 - Kalate Zambe Nnomo a Mfefe Mfefé Nkôñelan

¹ Anyu dôé e bo'o te bo ôjeja'a, nalé fe nleme wôé ô bo'o te bo avôle ya kobô asu Zambe. Amu Zambe a ne e yôb été, womiene ke e *si nyô: ajô te nkobô wôé ô bo'o tyôtyoé.

² Abui mam da tyelé môte nleme yôp nde da soo nye abui mbia biyeyem a bifuuk mejô bia so abui nkobô.

³ Eyoñ ô nga tiñeti Zambe jam, te beta yange ayabe ya bo de amu Zambe a nji liti *mvam e be mekute me bôt: bo'ok e jam ô nga tiñeti.

⁴ E ne wo mvaé na ô bo te tiñeti Zambe jam, sa na ô tiñeti ve teke bo.

⁵ Te kañese na anyu dôé e bo na ngume nyôle wôé ô bo *abé, a te yange jô *ntuni na me nga kop. Amu jé Zambe a yiane wô'ôlun amu nkobô wôé a ndaman ésaé ya mo môé.

⁶ Bemomo be mam ba yené abui biyeyem été avale fe bemomo be mam ba yené abui nkobô été: ajô te wo yiane ko Zambe woñ.

Mba'alan akum ô n'ayaé

⁷ Nge wo yene be kpwe'ele'e minzôzoé a tibi *zôsôô a nya ntyi'ane mejôô e si éziñ, te kame jame te; amu beta môt a kaman e beta môte mbok, ve ba ba dañe be e beta be bôt be ne fe.

⁸ Si ja volô bôte bese; ja'ane ényiñe njô bôte fe é tii ésaé mefup.

⁹ Nye'e moné a ne te kate nye, *a nye'e akum te yene mfi y'été: momo jame fe le.

¹⁰ Eyoñ akum da bo abui, ba ba diane de fe ba bo abui. Za mfi ôfe mbi abui akum a bili ye sa ve na *a nye'e a lôô akume dé'

¹¹ Oyo môt a saé ô ne mvaé to'o a di tyôtyoé ng'abui; ve njaane bidi nkukum ô nji jô'é nye na a k'ôyo.

¹² Mbia ôlune jam me nga yene jôbe si: akume mbi akum a ba'ale asu bidime bié.

¹³ Akume te da mane jañ e mbia jam éziñ été; nge a nga biaé mon, mon ate a li'i teke jôme mo.

¹⁴ E soé a nga so je abume nyia, a ye fe bulan aval a nga so: a nji nyoñe jôme ya kee je mfa'a y'ésaé a nga saé.

¹⁵ Jame te fe e n'ôlune na a ke aval a nga so: mfi wé ô ne jé na a nga saé asu évuñulu'

¹⁶ Jam afe na a nga jañele melu mé e dibi été njalan a ôlun, nkôt a éyôé.

¹⁷ Jame ma me yeneya mvaé e ne na: Môt a di a nyu, a bu'ubane mvaé y'ésaé jé ése a nga bo e jôbe si melu mese y'ényiñe jé Zambe a nga ve nye: amu ngabe jé nje le.

¹⁸ E ne fe ne ma'a Zambe a ve na: Môt a bi akum a abui biôm, a bi nguleya diane biôme bite a nyoñe ngabe jé a va'a fe a ésaé jé.

¹⁹ Eyoñ a ye bo teke mfañe biôm, a ye simesane melu y'ényiñe jé, éyoñe Zambe a mbe a yala'ane nye a meva'a ya nleme wé.