EKLEZIASTE 4 - Kalate Zambe Nnomo a Mfefe Mfefé Nkôñelan

¹ Me nga yene fe bitibela'a bise bia boban e jôbe si: mili'i ya bôt ba wu ékpwe'ele mme ma: ve teke môt a volô be *nlem! Bôt ba tibili be mbe be bili ngu, ve teke môt a volô be *nlem!

² Me lôô na bôt be wuya be n'ébotan a dañe ba be ngenan be vee,

³ ve nyô a nji tame bialé nye a dañ ébotan a bese amu a ye bo te yeme bikotekote bi mam bia boban e *si nyô.

Esaé a mam ma tôñe je

⁴ Me nga yene na ésaé ése a nkaban ôse ésaé éziñ ja kabe bi ne ve éviele bana ba bo ba bevok: dina fe e ne momo jam a ntôñan évuñulu.

⁵ Akute môt da ba'a mo a di minsône mié mibien:

⁶ e ne mvaé ya ve womien ôbe awo'on a lôte na ô tu'i nyôle jôé a mboon ésaé é ne teke yeme mfi y'été.

Ntaban étam a mbia be mame y'été

⁷ Me nga yene fe momo jam e jôbe si:

⁸ môt a too étam, teke môte mfe, teke mon nge monyañ, ve a saé te k'awo'on; ja'ane mise mé fe teke jaé a akum. Nde ñhe ma saé a nyume mamiene mvaé asu za? Jame te fe e ne momo a mbômban évevé ô ne mvin.

⁹ Bôte bebaé ba dañe wua amu be bili mbamba ma'ane ya ésaé jap.

¹⁰ Amu na nge ba ku, wua a ye bete nyô mbok. Ve ngo'é môt a n'étam! Nge a ku a nji bi môta baa asu ya bete nye.

¹¹ Nalé fe na nge ba bômbô si bebaé ba ye wô'an ayôñ, ve môt a n'étam a ye wô'ô ayôñ aya'

¹² A nge môt éziñ a dañe nyô a n'étame ngu, bebaé ba ye dañe nye; nkol ô ne mimba'a mila ô ne te ji'a téé.

¹³ Mongô a n'azoé v'a too fek a ne mvaé a dañe njô bôt a ntoo nnôm v'a too akut, te fe beta kañese na be ve nye *melep.

¹⁴ Ja'ane mongô ate a nga so mimbôk asu ya jôô nge na a nga taté bo'o a jaké'é bôt biôm e vôm a zu bo njô bôt.

¹⁵ Avale jame te éyoñ e nga boban, me nga yen ane bôte bese ba ke mimbi a bômane mongô a nga tyendé njô bôt ya mvus éto jé.

¹⁶ A mbe nlô ya nsamba bôt ô ne tek'alañé. Ve da miaé mi bôt mia zu mia ye bo te beta bi meva'a nalé asu dé. Amu dili fe é ne momo jam a ntôñan évuñulu.

Ntyele ya kobô asu Zambe

¹⁷ Te ke *nda Zambe te taté fas. Kelek a nkômbane ya vô'ôlô nalé a ne mvaé a dañe mveane metuna'a avale mekute me bôt ma bo mbe be ne te yeme na ba bo *abé.