EKLEZIASTE 2 - Kalate Zambe Nnomo a Mfefe Mfefé Nkôñelan

Mevak a mefok bi ne momo

¹ Me nga jô nleme wome na: Ma zu ve'ele wo a mevak, ô tame tye'e mvaé! Dili fe e ne momo jam.

² Me nga jô vioé na: Akute jame le! Meva'a ke na: Ma volô jé'

³ Me nga tyi'i *nlem été na: Ma tame zu ve minsône miam nyuane woon a kabetane jam ese e ne *te fek, ve me wulu'u fe nleme wom atyeñ, me yange'e yene jam e ne bone be bôte mvaé na be bo e jôbe si va nté be vee.

⁴ Me nga bo beta be mam: me nga lôñe mamiene menda, bé mefube mindi'i mi woon;

⁵ me nga bo mamien minseñ a mefube bilé; me mane bé mevale bilé mese ma wume bibuma été;

⁶ me nga fa'a mamiene menjeñe mendim asu ya sôé afane bone bilé mendime

⁷ Me nga kus alo befam a binga, me bi fe bone bap be nga bialé e *nda jam été. Me nga bi fe abui mimbame biyem: benyak a bekabat a dañe bôte bese be nga too m'ôsu Yérusalém.

⁸ Me nga kôane fe argent a or, akume bejô bôt a bijôé; me nga bili beyia bia: befam a binga, nalé fe abui binga, ava'a ya bone be bôt.

⁹ Me nga bo éwôlô môt, me nga bik a dañe bôte bese be mbe m'ôsu Yérusalém, nalé fe na fe'e jam é nga too be ma.

¹⁰ Jôm ése mise mam me nga kômbô, me nji kamane me je; me nji kamane nleme wom ava'éziñ, amu nleme wom ô nga yene mvaé y'ésaé jam ése: ngab é mbe énjam ésaé te nje le.

Asu'ulane y'ésaé te

¹¹ Me nga fombô bisaé ya mo mam me nga bo a abime nju'u me nga nyoñe na ma bo bie, a zu kooé na bise bi mbe momo jam a ntôñan évuñulu: môt a bi bi mfi e jôbe si va.

¹² Nde me nga tame fombô ñyemane mam, akut a nso'on étyi. E ne fo'o na e môt a nyoñ éto njô bôt a be a bili a vo'o bo jam afe, ve di bôte befe be tameya bo.

¹³ Me nga yene fe na fek é bili mfi a dañ akute mboon avale fe éfufup é bili mfi a dañe dibi.

¹⁴ Mfefek wo kee mise mé e vôm a yian, v'akute môt da wulu e dibi été. Daa me ma yeme na bebaane be bili aval'asu'ulane da.

¹⁵ Ajô te nde me jôya e nleme wom été na: Jame da kui e b'akute môt nde fe da ye kui be ma: jé ñhe me mbe abime fe'e di? Ma jô mamiene na: Dili fe e ne momo jam.

¹⁶ Nsimesan ba simesane mfefek avale f'ane wu ba simesan akute môt mi ne te tabe nnôm éto: ane melu ma lôt nne f'ôvuane ya mam wo kui nalé. Etua jame na: Mfefe'e môt wo wu fe v'ane akute môt.

¹⁷ Ajô te ñhe me nga vini ényiñ amu na, mfa'a wom ésaé ése ja boban e jôbe si va é n'abé amu mam mese me ne ve momo a ntôñan évuñulu.

¹⁸ Me nga vini nju'u ôse me maneya wu e jôbe si amu ma yiane li'i ava'a ese y'été e be nyô a ye tyendé ma.

¹⁹ Ve za *a yem nge a ye bo mfefek ng'akute môt? Akôsa bo nalé nye fo'o a ye bo njôô ya nju'u ôse me wuya e jôbe si va a fe'e ése: momo jame fe le.

²⁰ Nlem ô nga su'ulane bili m'atek amu nju'u ôse me wuya e jôbe si.

²¹ Tame yene môt a boya ésaé jé a atyeñ fek a nyeman, ve ngabe jé ja ye veban e be môt a nji wu nju'u éziñ: dili fe e ne momo a beta mbia jam.

²² Za jômô môt a bili mfa'a ya nju'u ôse a nga wu a ésaé a nga bo e jôbe si'

²³ Melu mé mese me ne fo'o ve mintaé, ésaé jé ki v'ôlun. Ja'ane alu, nleme wé ô nji wo'on: dibi fe e ne momo jam.

²⁴ Jam e ne môte mvaé e ne ve na a di a nyu a yen, asu dé émien, ngabe ya nju'u wé é ne mvaé. Me nga yene na dili e ne ve mveane Zambe.

²⁵ Za mfe a ne di a bu'uban ye sa ma'

²⁶ Amu Zambe a ve môt a yene mvaé fek, nyeman a mevak. Ve mbo *abé a ve ny'évevé ya kôan a naane biôm asu ya ve nyô Zambe a yene mvaé: momo jame fe le a ntôñan évuñulu.