EKLEZIASTE 12 - Kalate Zambe Nnomo a Mfefe Mfefé Nkôñelan

Eto nnôm a awu

¹ Ô simesa'ane Nyô a nga té wo melu ô ngenane ndôman, nté mbia melu me ngenane te so, a nté mimbu wo ye jô na: Me nji yene mvaé été mi ngenane te so.

² Nté jôp, éfufup, ngon a ateté bi ngenane te bo ékukut, a nté minkut mi ngenane te beta zu, nalé fe mveñ,

³ e môse beba'ale *nda ba ye fô'ôban a mingungule mi bôt mia ye vitibi, e môse binga ba ko'o bidi ba ye telé ésaé jap, be too te k'abui, e môse binga ba fombô vundu ba ye dimili mfaane wop,

⁴ éyoñe bivine mimbé bia diban e njoñ a tyiñe minsini a ko'o bidi ja tab? évô, éyoñe bôte ba kôlô si a nkobô ônon a binga ba yia bia ba ye tabe bivô;

⁵ éyoñe te ñhe mone nkôl a sise wo, a woñ wo bi wo *zen, éyoñ élé amañdié ja sam a étandak ja bo adit a ébuma kaprié ja kpwañ; avale te môt ase a ke e *nda jé ja su'ulan. Nté te ôse beyi du ke be lôta'an e njoñ;

⁶ nté nkole argent ô ngenane te téé a *élaé or é ngenane te bôlé, nté nde'e njeñ é ngenane te bôlé anjeñ, nge na nka wo dutu mendim ébé ô ngenane te salé.

⁷ Nté mbuluk ô ngenane te bulane mbuluk aval ô mbe a mveb? ényiñ ô ngenane te bulane be Zambe a nga ve wô.

Asu'ulane ya nkobô

⁸ Momo ya bemomo, nalé nkatefoé a jô, mam mese me ne momo.

⁹ Sa ve na nkatefoé a mbe mfefek, v'a nga ye'ele fe ñyemane mam e be bôt; a nga vô'ôlô, a nga bi'ili a tak abui minkana.

¹⁰ Nkatefoé a nga bo ésaé ya yene bifia bi ne mvaé, benya bifia, bi too ntilan avale bi né.

¹¹ Bifia beyeme mam bi ne aval'ane minsoñ bibaé; betili bekalate ki ane mesen me beme vôm éziñ. Mveane Pastô wua ñwô le.

¹² Nde ñhe a mone wom nyoñe ñye'elan été; ntilan abui bekalate wo ye ke man a abui ñyé'an da ve nyôl atek.

¹³ Asu'ulane ya nkobô wuna ôse e ne na: Ko Zambe woñ a ba'ale mebendé mé. Amu ngume jam môt a yiane bo ñwô le.

¹⁴ Amu Zambe a ye kee mboon ôse ntyi'ane mejô, mam mese me ne nsolan, to'o di e ne mvaé to'o di e n'abé!