EKLEZIASTE 11 - Kalate Zambe Nnomo a Mfefe Mfefé Nkôñelan

Abui ntabane ntyee da ndeñele

¹ Wu'a bidi biôé e mendime yôp, amu éyoñ éyoñ é lôteya, wo ye beta yene bie;

² va'a bôte zamgbwa nge muam ngabe jia, amu ô ne te yem mbia jam a ne kui e *si nyô.

³ Eyoñe minkut mi nto njalan a mveñ, mia sôôé je si; a ng'élé ja ku si, mfa'a ya nké ng'akôé, ja ye bômbô e vôme ja ye ku.

⁴ Nyô a fombô évuñulu a ye bo te bé bidi nyô a toé mise mé e minkut, a ye bo te kôane bidi.

⁵ Aval ô ne te yem ane évuñulu ja vuñ nge ane atyi mon da yaé abume minga a n'abum, nalé ate ô ne te yem ésaé Zambe nyô a bo mam mese.

⁶ Miase mvoñe jôé mametyé a te ve wo wôé awo'on mamengô'é; amu ô nji yeme jôm ja ye bo nya jômô, nge jina nge jili, nge na bibaane bi ne bo *mvo'é.

⁷ Efufup é ne *mvo'é a e ne mvaé na mis me yene jôp.

⁸ Nge môt a nyiñ abui mimbu a va'ak a mimbu mite mise, ve a simesane na melu ya dibi ma ye bo abui: jam ese da kui e ne momo.

Enyiñ ésoé a ate'e nnôm

⁹ A ndômane môt, va'ak éyoñ ô ngenane ndôman, nleme wôé ô bo'o wo na ô vak nté melu ô ngenan ésoé, wulu'u mezene nleme wôé wo liti wo a avale mise môé me lôô; ve yeme na mfa'a ya mam mete mese, Zambe a ye zuu wo ntyi'ane mejô.

¹⁰ Ajô te va'a éndeñela'a e nleme wôé, a titan *abé é ke nyôle jôé ôyap; amu éto ésoé a ngu bia lôt avô.