EKLEZIASTE 10 - Kalate Zambe Nnomo a Mfefe Mfefé Nkôñelan

Beangôndô ya akute mboon

¹ Mimbime minlo mia ndaman a ve ngume nde'e mbon ôlobinda mbia ényum. Avale te mone mboon akut a dimili fek ngule jé a duma dé.

² Nleme mfefek ô ne nye mbo nnôm, ve wu akute môt ô ne nye mbo nga.

³ Eyoñ akute môt da wulu e *zen, fek ja jañe nye a a jô môt ase na: Akute dili!

⁴ Nge nteb'ôsu wôé a yaa wo, te li'i vôme wôé wo bo ésaé: amu évôvoé *nlem ja bo na ô sa'ale bikop.

⁵ Nteb'ôsu a ne nguleya kop. Ajô te me nga yene bité bi ne te yian e *si nyô:

⁶ nsusu'u môt wo nyoñ éto é n'ôyabe yôp, ve minkukum mi liki'i mi bili bito ya si.

⁷ Me nga yene alo e bete bikabela a biwôlô bi bôt bi wulu'u a mebo an'alo.

⁸ Nyô a fa'a ébé, a ye ku été, a nyô a tub *abé akak nyo ja ye lôbe nye.

⁹ Nyô a fa'a meko'o si a ne balé aveñ a nyô a sale bilé mbia jam a ne kui be nye.

¹⁰ Nge ba bo te jeb ôvôn ô ntoo atu, ngul ja sili abui asu ya bo wô ésaé. Yaa, fek é ne évôle ya ndañan.

¹¹ Da volô jé na ô séé nyo nge wo taté jô'é na é lôbe wo'

¹² Mejô y'anyu mfefek me ne njalane mvam; ve biyaé bi'akute môt bia dutu awu dé.

¹³ Atata'a ya nkobô y'anyu dé e n'akut, a amané ya nkobô wé ô ne mbia nso'on étyi.

¹⁴ Akut da kobô abui. Môt a ne te yeme jam da ye boban, a za a ye kate nye jam da ye bobane mvuse jé'

¹⁵ Esaé akute môt ja te'e nye amu a ne te yeme ke tison.

Njô bôt a ngule jé

¹⁶ Ngo'o wo si é bili njô bôt a too mongô a bivet bia di ataté mametyé!

¹⁷ Ebotan a wo, si njô bôte wé a ne mone ya *nda bôte mintômba, a bivete bié bia di éyoñe ja yian, asu ya nyoñe ngu a teke bisulane menyu!

¹⁸ Andile *nda da ku nyô a dañ élese ya kôme de yôp, a *nda ntelé môt ja toé.

¹⁹ Beta be bôt ba kômesane ndian asu mam mevale mevale y'ényiñe jap, woon a ve be mevak a moné a ve be nguleya bi jôm ése.

²⁰ Te kobô njô bôt *abé, ja'an ôsimesane wôé été a, étune *nda wo bômbô été, te kobô nkukum *abé: amu ônone ya yôp wo ye kee foé, biôm bise bi bili mefap bia ye kañete jam ô nga jô.