EKLEZIASTE 1 - Kalate Zambe Nnomo a Mfefe Mfefé Nkôñelan

Momo ya bemomo

¹ Mejô me Nkatefoé, e mone David a njô bôte ya Yérusalém.

² Momo ya bemomo, nalé Nkatefoé a jô, momo ya bemomo, mam mese me ne momo.

³ Mfi môt a bili mfa'a y'ésaé ése a ju'u je e jôbe si va ô ne jé'

⁴ Miaé bôte wua wo ke, wu ôvok wo so, ve si j'étoo avale da éyoñ ése.

⁵ Jôp da tôô, da dim, ve beta ji'a bulane vôm e nga tôô.

⁶ Evuñulu ja ke mfa'a ya nké a vuñ mfa'a y'akôé. Ja vuñ, ja tyiñelan a ke, a ja beta taté ntyiñelane wé.

⁷ Asôé ese da suane mañ ve mañ teke jaé; da suane vôme wua éyoñ ése.

⁸ Ajô bivôle nde dina na: Dis te kate ñyenan, alo ki te kate ñwô'an.

⁹ Jam e mbe, nde fe da ye bo; jam e nga boban nde fe da ye beta boban: teke mfefé jam e jôbe si!

¹⁰ Nge e ne jôban e be jam éziñe na: Dina e ne mfefé! Ve da e ne aso ayap, e biyoñe melu ya kôa.

¹¹ Ôsimesane ya minnôm mi mam wo jañ; miaé mi bôte mia zu fe mia ye vuane mam ma ye boban.

Esaé é ne momo jam

¹² Ma Nkatefoé, me nga too njô bôte y'Israél e Yérusalém.

¹³ Me nga ve *nlem a fek asu ya jeñ a fase mam mese ma boban e yôbe si: dili e ne nju'u ésaé Zambe a ve bone be bôt.

¹⁴ Me maneya yene bisaé bise bia boban e jôbe si, a kooé na bise bi ne momo jam a ntôñan évuñulu.

¹⁵ Jôm é n'ékotekot é se nguleya nyooban. Jôm é ne momo é se nguleya lañeban.

¹⁶ Me nga jô nleme wome na: Me maneya nene a tôkane fek a dañe bôte bese be nga too m'ôsu Yérusalém, me yeneya f'abui mame ya fek a ñyemane mam.

¹⁷ Me nga ve mamien asu ya kandé e zañe benyaa a zesé mam; Me nga su'ulane yene na dili fe e ne ntôñan évuñulu.

¹⁸ Amu abui ñyemane mam da soo abui ôlun, nyô a bili ñyemane mam a kô'ôlane fe abui éndeñela'a.