EFEZE 6 - Kalate Zambe Nnomo a Mfefe Mfefé Nkôñelan

Bon a bebiaé. Belo a Bemasa

¹ A *bon, va'ane bebiaé benan mewôk e be Nti, jame da yian e nde le.

² Semé'é éso a nyua, *atiñ ôsu e bili ngaka'a, nde le:

³ Ajô te wo ye bi mvaé a ényiñ ayap e *si nyô.

⁴ A mia bebiaé, te boone benyo bone na, be kañge. Ve mfa'a ya yale be, jeñane nleban a nye'elan bia so e be Nti.

⁵ A belo, wô'ane Bemasa benane ya *si nyô a woñ, a mfô'ôban, a *nlem ô ne teke abui mam, aval ane nge Krist nye mia ve mewôk.

⁶ Saa amu nkasa ô ne mia mvus, aval ane nge mia kômbô yené mvaé e be bôt, ve aval ane belo be Krist, ba ba jeñe *zen ése ya bo nkômbane Zambe.

⁷ Bo'on ésaé a mbamba minlem, aval ane nge mia bo Nti, saa bôt.

⁸ Mia yeme na, mvaé môt ase a ne bo, a ye beta nyoñe je e be Nti, ja'an a ne *ôlo nge fili.

⁹ A mia Bemasa, bo'one fe be avale da. Jôka'ane bisisia. Mia yeme na, mfa'a wônan a mfa'a wop, Masa a ne yôp été, a nsémane mingume mi bôt ô nji bo be nye.

Biôme mewosane ya Zambe

¹⁰ Ma su'ulane jô na: Bo'one ngul e be Nti, a e ngule jé ja dañe ngul ése.

¹¹ Jaéne biôme mewosane bi Zambe, ane mi ne dôngan atyeñe mimboon mi Satan.

¹² Bi nji wosane metyi nge minsôn, ve bi jôé, betebe ôsu, a bejôô ya dibi, mimbia minsisim mi ne yôb été.

¹³ Ajô te biane biôme mewosane bi Zambe, nde éyoñe mbia *môs wo ye kui, mia ye bo ngule ya yeme ngu a tebe ne sim, a koone na mi maneya bo mam mese.

¹⁴ Teba'ane ñhe tetele! Mi jaé bebela mengeteñ ane kandé, *zôsôô ane ében,

¹⁵ dulu ya kate Mbamba Foé *mvo'é e mebo ane bikôndé.

¹⁶ Mi dañe nyoñ ébene mbunan, ja ye ve mia nguleya dime mekoñe me nduane Satan.

¹⁷ Mi su'ulane nyoñ ékôngô nyian a nkpwaté mekône Nsisim, e ne na: Mejô me Zambe.

¹⁸ Nsisim a va'a mia ngu e meye'elane menan mevale mese, e minja'ane mienan, biyoñe bise. Bela'ane mbômban évevé wônan, asu meye'elan te kat, ajô mimfufube mise,

¹⁹ a mfa'a wome fe na, bifia bi veban anyu dam asu ayo'o ese ya kañete ndimba jame ya Mbamba Foé,

²⁰ nye ate me ne *nlôman ô ne nka'ane ngôkop. Ye'ela'ane ñhe na me yen, e Mbamba Foé ate été, ngule ja volô na me kobô ajô y'été ane da yian.

²¹ Ma yi na mia fe mi yem été jam, jé ma bo; Tikik, e mojañ ma nye'e, mbane mbo ésaé e be Nti, a ye kate mia mefoé mese.

²² Ma vañe fo'o mia nye lôme na, a kate mia e vôme bi ntele, a ve fe mia ngule minlem.

²³ Mvo'é é bo'o e be bobejañ, nye'an a mbunan bi so'o e be Zambe Esaa, a e be Nti Yésus Krist.

²⁴ Mvam é tabe'e e be ba bese ba nye'e Nti wongan Yésus Krist e nye'an ô ne te tyendé.