EFEZE 4 - Kalate Zambe Nnomo a Mfefe Mfefé Nkôñelan

Nlôñane nyôle Krist e nleme wua été

¹ Ajô te ñhe ma lebe mia de e be Nti, ma, mone mimbôk. Bo'one na binyiñe bienan bi lu'an a nloone mi nga wôk.

² A nsuane bebiene si, a évôvoé, a njiban, jiba'ane mia mia e nye'an été.

³ Ba'alane nlatane ya *nsisim a ntabane *mvo'é.

⁴ Nyôl é ne jia, a Nsisime wua, avale fe ane nloone wônan ô nga zu e be mia, asu ndi minleme jia;

⁵ Nti wua, mbunane wua, nduane wua,

⁶ Zambe wua, a Esaa ya bese, nye a jôô bese, a bese, a too e be bese.

⁷ Ve da, e be môt ase ya e be bia, *mvam é nga veban aval ane ôve'e ya mveane Krist ô né.

⁸ Amu ajô te éfia ji ja jôbane na: e mbetane wé ya yôp, a nga bi mimbôk. A nga ve bôte mimvean.

⁹ A nga bete yôp! Nalé a tinan aya,

¹⁰ Ye sa na, a nga sise fe a kui si? Nyô a nga sis, a ne fe nyô a nga bet ôyabe yôp a dañe môp mese, ane a ye yian émo minlañ ése.

¹¹ A Emien a nga bo bevo'o minlôman, e ba bevo'o bekulu mejô, bevo'o bekatefoé, wôna ba bevok Bepastô a beye'ele,

¹² nalé mimfufup mia ye bo nkômesane ya bo ésaé, asu ya lôñe Nyôle Krist; akekui bia bese, nsamba wua,

¹³ bia ye kui vôme ya bo nlatan e mbunan été a e ñyemane Mona Zambe été, bi too benya bôtô, bi too ba ba yiane Krist e njalane wé été.

¹⁴ Ajô te biaa ye fe beta bo bongô, mbe ba yeñelan a tindibane li a li a évuñulu avale nye'elan ese, mbe bete ba du'uban a mvôle mefe'e ya ba ba kee bôt e nkoban été.

¹⁵ Ve bia ye yaé mimfa'a mise e be nyô a ne nlô, Krist bi meme bebela e nye'an été.

¹⁶ E be nye, ngume nyôl ôse wo kôme meyaé mé ô too ntoon a nya nlatane amu binyi'a bise bia saane wô, ényi'a ése ésaé jé, nalé ngum nyôl ôbien ô ne lôñeban e nye'an été.

Nnôme môt a mfefé môt

¹⁷ E jam ma kobô a yemete e be Nti e nde di: Te beta nyiñan ane meyoñe bikuu, mme atyeñe dap da ke *zen é ne momo.

¹⁸ Asimesane dap e ne mbilane dibi été, a be ne beyeñ mfa'a ényiñe Zambe, amu ndiman wo dutu be na be bo ayete minlem.

¹⁹ E teke yeme wob été, ébamba a kui vôme ya bo mam me ne mvin teke asi'ibi.

²⁰ Mfa'a wônan, mi nji yé'é Krist nalé.

²¹ Nge e ne nalé na, nye mi nga wô'ô be kobô'ô ajô dé, nge nye be nga ye'ele mia, aval ane benya mejôô be ne be Yésus be né.

²² Eyoñe mi li'iya ényiñe jenane ya melu mvus, mia yiane vaa nnôme môt, ñwô ôte wo ndaman amu minkômban mi ne medu'an.

²³ Mia yiane bobane mimfefé a ntyendane nsisime ya atyeñe denan,

²⁴ a jaé mfefé môt, nyô a nga téban a fe'e Zambe, e *zôsôô a étyi été mbie bia so e benya mejôô.

²⁵ Mi kandane ya minsos, môt ase a kobô'ô ñhe nyô mbok benya mejôô, amu bi ne bibu'a, bana a ba bevok.

²⁶ Ye mia yaa? Ve te boon *abé, Jôp e bo'o te dim ayaa denan e too.

²⁷ Te veane Satan ôyôme fet.

²⁸ Nyô a nga bo a wubuk, a bo'o te beta wup. Ve a nyoñe nju'u ya bo ésaé *zôsôô a mo mé, ane a ye bi jôme ya kaban a bôte be ne tee jôm.

²⁹ Mbia nkobô éziñ a bo'o te kui biyaé bienan. Ve nge e ne mfi ya kobô, e bo'o mbamba éfia, e ji ja volô bôt a zuu *mvam e be ba ba wô'ô je.

³⁰ Te veane mfufup Nsisim ôlune *nlem, nye Zambe a nga ve mia ndem ane *sitam, asu môse *nkôtan.

³¹ Ziñ, ôlun ayaa, mewôman, meta mame mete mese ma yiane bo momo e zañe jenan, aval ane kane *nkpwala ese.

³² Bo'one mvaé bana a ba bevok. Jama'an mia mia, aval ane Zambe a nga jamé mia e be Krist.