EFEZE 1 - Kalate Zambe Nnomo a Mfefe Mfefé Nkôñelan

Paul a ne za

Mebatan

¹ Paul, nlômane Krist Yésus amu nkômbane Zambe, ma tili mimfufup a *bebuni Krist Yésus.

² Mvam a *mvo'é bi tabe'e e be mia bi so'o e be Zambe Esaa wongan, a e be Nti Yésus Krist.

Mbamba be mam Zambe a nga ve bia e be Yésus Krist

³ Zambe a bo'o ébotan, Esaa Nti wongan Yésus Krist. A nga botane bia a ébotane ya Nsisim ése é ne e yôb été a e be Krist.

⁴ A nga tobe bia e be nye, te yene mbôka'a ya si ô za bo'ok, ane bia ye bo mimfufup, a teke bijô asu dé, e nye'an été.

⁵ A nga tyi'i mfa'a wongane na bia ye bo bone be ntoñe béé zene ya be Yésus Krist; e nne mvame é nga kômbô nalé

⁶ amu duma y'étôto'o jé a amu *mvam a nga jalé bia e be Eñwé a dañe nye'e.

⁷ E be nye, a zene ya metyi mé, bi ntoo *nkôtan. E be nye, mintyamane metiñe miangan mi ntoo *njaman, aval ane afo'o ya mvame jé e né.

⁸ Zambe a nga ve bia je teke alañe a yoé bia mfa'a ya ése a ñyeman ôse.

⁹ A nga bo bia na, bi yeme nsolane jame ya nkômbane wé, e mbamba ôsimesane a nga bi ôsusua e be Emien

¹⁰ mfa'a ya bo biyoñe na bi jaléban, e ne na: E late émo minlañ ése, éjôé évete jia si, nje é ne Krist; e biôme bi ne yôp été a bi bi nee si.

¹¹ E be nye fe, bi nga nyoñe ngabe jangan, Aval ane nta'ane mame Nyô a wulu mam mese a e nkômbane wé ô né; e mbe bia ntiñetan aso nnôm éto

¹² na bi bo benyoñe ngabe ya duma y'étôto'o jé, e ba be nga taté bi ndi nleme be Krist.

¹³ E be nye fe, mi nga wô'ô bebela nkobô, E Mbamba Foé a nyii mia. Avale dada te fe mi nga buni be Nye; A Sitame Nsisim ô mbe ngaka'a, Mfufube Nsisim a nga lômbane be mia,

¹⁴ ane éfase ya ngab éli'i jangan, akekui amané *nkôtan, éyoñe bia ye nyoñ ngab éli'i ése asu duma y'étôto'o jé.

Meye'elane me Paul asu bôte ya Eféze

¹⁵ Amu ajô te ma fe, ataté ane me nga wô'ôtane mbunane wônane mi bili be Nti Yésus, a nye'ane wônan asu mimfufube mise,

¹⁶ me nji jô'é ve akéva ajô denan, éyoñ ma tote mia e meye'elan mam été.

¹⁷ E Zambe Nti wongan Yésus Krist, Esaa, nye ate a ne étôtok, a va'a mia nsisime fek, ñwô ô liti mia nye, a tu'a bo na mi yeme nye.

¹⁸ A ku'i minleme mienan éfufube jé, ane mi ne yem za ndi nleme nloone wo ve mia, akume ya étôto'o jé, élik a bo mia benyoñe ngap, mia be mimfufup,

¹⁹ abim abui ngul a nga ve asu mvaé jangan bia *bebuni. E ngule jé, éwôlô jé a ntute ngule wé ôse.

²⁰ A nga belane bie e be Krist, éyoñ a nga wômôlô nye miñwuan, a tooé nye e mbo nnôme wé e yôb été,

²¹ mbetane yôp a dañe Ngul éjôé ése, Njôan, Ewôlô, Eto Fili a jôé ese é ne ngule ya toteban, saa ve émo jina étam ve nalé fe émo ja zu.

²² Yaa, a maneya telé biôme bise e mebo mé si, a telé nye ane nlô ya keké ése,

²³ nje é ne nyôle jé, njalane ya Nyô Zambe Emien a jalé ngumba.