DEUTERONOME 4 - Kalate Zambe Nnomo a Mfefe Mfefé Nkôñelan

Melep Môze a ve Israél

¹ Eyoñe ji, a Israél, vô'ôlô'ô, asu ya bo memvinda a minjôan ma ye'ele mia, nalé mia ye nyiñ a nyoñe si Nti, e Zamba b'ésoo, a ve mia.

² Mia ye bo te beté e mejô ma kobô mia, avale te fe mia ye bo te vaa jôm; ve mia ye ba'ale mebendé me Nti, e Zambe wônan, avale ma ve mia me.

³ E mise me nga yen e jame Nti a nga bo éyoñe ya Bal-Péor: Nti, e Zambe wôé, a nga wôé ézezañe jenan, e môt ase a nga kañe Bal-Péor.

⁴ A mia mi nga lat a Nti, e Zambe wônan, mi vee bese e môse wu.

⁵ Mi lôô me ye'eleya mia memvinda a minjôan Avale Nti, e Zambe wom, a nga bendé ma, éyoñe te mia ye yeme bo me e si mia zu nyiin a nyoñe je é bo énjenan.

⁶ Mia ye ba'ale me a bo me; amu e nne fe'e jenan a atyeñe denan bi ne'été e mise *meyoñ mefe ma ye wô'ôtane ajô ya minjôan mite a jô na: E beta ayoñe nyô a ne fo'o ve bôt be ne fek a ñyeman!

⁷ Beta ayoñe *mbé a bili bezambe be too nye bebé ane Nti, e Zambe wongan a ne e mfa'a wongan éyoñ ése bia loone nye'

⁸ A beta ayoñe *mbé a bili memvinda a minjôan mi too zôsôôô aval'ane metiñ mese ma liti mia e môse wu'

⁹ Ve da, tabe'e ntyel a womien, a bômbô évévé asu nsisime wôé melu mese y'ényiñe jôé, ô za vuan e mame mise môé me nga yen, a nleme wôé ô za ke me ôyap; bo'o na bone bôé be yeme me, nalé fe bendaé bôé.

¹⁰ Te vuan e *môs ô nga tebe asu be Nti, e Zambe wôé, Hôréb, éyoñe Nti a nga jô me na: Sula'ane bôt e fefele jôé; ma ye bo na be wôk mejô mam, nalé ba ye yé'é ko ma woñ éyoñ ése ba ye nyiñe si, a nalé ate fe ba ye ye'ele me e bone bap.

¹¹ Nde mi nga subu a tebe e tine nkôle si. Nkôl ô mbe njalan a nduan a kui ézezañe yôp. Dibi, minkut a ndutuu bi mbe.

¹² Nti a nga kobô mia e zañe nduan; mi nga wô'ô tyiñe ya mejô, ve mi nji yen asu éziñ; *tyiñ étam nje mi nga wôk.

¹³ Nti a nga kate mia élate jé, a yemete na mi bo je: metiñ awôm; a a nga tili me e bifase meko'o bibaé été.

¹⁴ Eyoñe te Nti a nga bendé ma na, me ye'ele mia memvinda a minjôan ane mia ye bo me e si mia nyiine na é bo énjenan.

¹⁵ Amu mi nji yen asu éziñ e môse Nti a nga kobô mia e zañe nduan, Hôréb. Ajô te taba'ane ntyel a minsisime mienan,

¹⁶ mi za ndamane miabebien a bo *ngunemelan é ne kpwelan, é too éve'ela éziñ ja funane fam nge minga,

¹⁷ ng'éve'ela tit é ne si, ng'ônon éziñ wo yele yôp,

¹⁸ ng'éve'ela tit éziñ ja vutane si a abum, nge kos éziñ é ne mendim e mfa'a ya si,

¹⁹ nalé fe a za bo na, éyoñe wo bete mis a yene jôp, ngon a ateté, ézu'u bivee bifufup ése, éyoñe te wo dutubane na, ô kute bie meboñ a kañe bie: e ngabe Nti, e Zambe wôé, a nga ve bôte bese be ne si ése nje le.

²⁰ Ve mia, Nti a nga nyoñe mia a vaa mia e mbe'e nduan wo nyemé bityé y'Ejipte, nalé mia ye bo bôt be ne e ngabe jé, avale mi né môse wu.

²¹ Nti a nga yaa ma amu mia, a a nga kane ngana na ma ye bo te dañe Yordan a nyiin e mbamba si Nti, e Zambe wôé, a ve wo ane ngap.

²² Mfa'a wom, nne ma ye wu va, maa ye ke dañe Yordan; ve mia mia ye dañe nye a nyoñe mbamba si ate.

²³ Miabebien taba'ane ntye, mi za vuan élate Nti, e Zambe wônan, a nga bo a mia, a te boone *ngunemelan é ne nkpwelan, éve'ela'a éziñ, a selan a avale Nti, e Zambe wôé, a nga bendé wo.

²⁴ Amu Nti, e Zambe wôé, a ne e nduan ja di'i, e Zambe a ne *aban.

²⁵ Eyoñe mia fôé *bon a bendaé a tabe ayap e si ya Kanaan, nge mia ndamane miabebien, nge mia bo bengunemelan be ne nkpwelan, bive'ela ya avale jôm ese, nge mia bo e jam e n'abé e mise me Nti, e Zambe wôé a wô'ô ôlun,

²⁶ e môse wu ma nyoñe ngaa ya bo'olô mia: yôp a si, mi yeme na mia ye jañ a awu e ne tyi'ibi e si mia ye nyoñ éyoñ mi dañeya Yordan, a melu menan maa ye ke bo ayap amu mia ye mane tyamban ne meñ.

²⁷ Nti a ye mialane mia e zañe *meyoñ, a mia ye li'i v'ôyôm abim ézezañe meyoñe Nti a ye kee mia.

²⁸ A e wé, mia ye kañe bezambe be ne mboon a mo me bôt, a bilé a *mekok, be too te nguleya yen, nge wôk, nge di, nge wô'ô ényum.

²⁹ Nne fe wo ye taté na wo jeñe Nti, e Zambe wôé e wé; wo ye yene nye nge wo jeñe nye a e nleme wôé ôse a nsisime wôé ôse.

³⁰ Ôlune viôé été, mam mete mese ma ye nnambe wo. Eyoñe te melu ma zu, wo ye bulane be Nti, e Zambe wôé, a wo ye wô'ô tyiñe jé;

³¹ amu Nti, e Zambe wôé, a ne Zambe a yeme kabane mintaé, a ye bo te li'i wo nge jiane wo; a ye bo te vuan élat a nga kane b'ésoo ngana.

E mvome Israél

³² Tame nyoñe mefoé ya melu mvus me nga too wo ôsu, ataté e môse Zambe a nga té môt e si, ataté aku'u yôbe di a kui di avok, ye beta jame mfe a tameya bobane nalé, a ye be tameya wô'ô avale jame te'

³³ Ye bôt be tameya wô'ô tyiñe Zambe é kobô'ô e zañe nduan, aval ô nga wôk a beta nyiñ'

³⁴ Ye Zambe a tameya ve'ele zu nyoñ ayoñ éziñ e zañe ya ayoñ afe asu dé a *meve'ele, a mendem a bitua bi mam, a bita, a akule wo e n'éwôlô, a wo ô ne nsaman, a mboone mam me n'angôndô, aval'ane mam mese Nti, e Zambe wônan, a nga bo mia Ejipte, mise menan me lôô'

³⁵ Mise môé me nga yiane kuiban asu ya yeme na Nti a ne Zambe, a mfe a nji bo ve nye.

³⁶ A nga bo na ô wô'ô tyiñe jé é so'o yôp asu ya ye'ele wo; a nga bo na ô yen e beta nduane wé si, a ô nga wô'ô nkobô wé e zañe nduan.

³⁷ A nga nye'e b'ésoo a tobe mvoñe bôte jap éyoñ be maneya wu; ajô te Emien a nga vaa wo Ejipte a e beta ngule wé;

³⁸ a nga titane *meyoñ me n'anen a ngu a dañe wo ôsu viôé, a nyiñili wo e si jap, a ve wo je ane ngap, avale ô lôô e môse wu.

³⁹ Ajô te ñhe wo ye yem e môse wu a ba'ale de e nleme wôé été na, Nti a ne Zambe, e yôb été wé a e si été va, a na, e mfe a nji bo,

⁴⁰ a wo ye ba'ale memvinda a mebendé ma ve wo den, nalé wo ye vak, womien a bone bôé e mvuse jôé, a melu môé ma ye bo ayap e si Nti, Zambe wôé, a ve wo aveavé.

Bitison ya sobô e Yordane yat

⁴¹ Ane Môze a nga telé bitisone bilaa e Yordane yat, e mfa'a jôp da tôô,

⁴² bi bo vôme ya sobô asu môt a maneya wôé monyañ e fu'an, te na a nga taté siñe nye, ajô te a ye bo nguleya ke sobô e tisone jia y'été a nyiñ.

⁴³ Bitisone bite bi mbe na: Bétzer, e *nkôte si, e nje'ese, e be bone be Ruben; Ramôt, e Galad, e be bone be Gad a Gôlañ, e Basañ, e be bone be Manasé.

Metiñ awôm

⁴⁴ Metiñe Môze a nga telé ôsu bone b'Israél e mme ma:

⁴⁵ *mintiñetan, memvinda a minjôane Môze a nga kalane bone b'Israél éyoñ be nga kôlô Ejipte.

⁴⁶ Mame ya e Yordane yat, e mbi'ili, zôsôôô a Bétpéor, e sii Sihoñ, njô bôte Beamorééñ a nga too Hesboñ, nye Môze a bone b'Israél be nga bôé éyoñ be nga kôlô Ejipte.

⁴⁷ Be nyoñe si jé a nyô Ôg, njô bôte ya Basañ. Bejô bôte bebaé bete ya Beamorééñ be nga too e Yordane yat, e mfa'a jôp da tôô.

⁴⁸ Ataté Aroér e nsa'a ôsôé Arnon, a kui e nkôle Sioñ ñwô ô ne Ermon,

⁴⁹ Araba ase, e Yordane yat, e mfa'a jôp da tôô, akekui e mañe ya Araba, e meyo me nkôle Pisga.