DEUTERONOME 34 - Kalate Zambe Nnomo a Mfefe Mfefé Nkôñelan

Awu Môze

¹ Ane Môze a nga kôlô minje'ese ya Môab a bet e nkôle Nébô, abôbône nkôle Pisga, zôsôôô a Yérikô. Nde Nti a nga liti nye si ése: Galad a kui Dañ,

² Néftali ase, e sii Efrayim a Manasé, e sii Yuda ése, a kui mañ ya jôbe da dim,

³ Négéb mbi'ili Yordan, a mbi'ili ya Yérikô, tisone melen, a kui Sôar.

⁴ Ane Nti a nga jô nye na: E si me nga tiñeti Abraham, Izak a Yakob a nkanane ngana na: Ma ye ve je e mvoñe bôte jôé. Me litiya wo je na ô yen, ve woo ye ke nyiin été.

⁵ Ane Môze, mbo ésaé Nti, a nga wu valé, e si ya Môab, avale Nti a nga jô.

⁶ Nde Nti a nga jame nye e mbi'ili, e si ya Môab, zôsôôô a Bétpéor. Môt éziñ a nji tame yeme soñ jé a kui môse wu.

⁷ Môze a mbe mimbu ntet a mewôm mebaé, éyoñ a nga wu; valé mise mé me ngenan te tek, a ngule jé te man;

⁸ bone b'Israél be nga yône Môze tañe melu mewôm mela, e minje'ese ya Môab; éyoñe te miñyôn a meyep ajô awu Môze bi nga man.

⁹ Yasua, e mona Nun, a mbe njalan a nsisime ya fek, amu Môze a nga beté nye mo. Bone b'Israél be nga wô'ô nye, a nga wulu aval'ane mebendé Nti a nga ve Môze me mbe.

¹⁰ Môt éziñ a nji beta tebe Israél a too *nkulu mejô aval'ane Môze, nyô Nti a mbe a yemek mesu mesu;

¹¹ teke na be ne ve'ane nye a môt, amu mendem a bitua bi mam Nti a nga lôme nye a bo e si y'Ejipte a wosane Faraoñ, bebo bisaé bé a ngume si wé ôse,

¹² a amu bikowoñ bi mam Môze a nga bo a wo ô ne ngu, e mise m'Israél ase.