DEUTERONOME 3 - Kalate Zambe Nnomo a Mfefe Mfefé Nkôñelan

Nyoñane sii Og, njô bôte ya Basañ

¹ Nde bi nga fombô mfa'a ya Basañ. Og njô bôte ya Basañ a nkane bita wé ôse be nga zu wosane bia Edré.

² Nde Nti a nga jô ma na: Te ko nye woñ! Ma ye ve nye e mo môé a nkane bita wé ôse a e si jé. Wo ye bo fe nye ane ô nga bo Sihoñ, njô bôte Beamorééñ a nga too Hesboñ.

³ Ane Nti, e Zambe wongan, a nga bo fe na bi dañe Og a nkane bita wé: bi nga jiane be teke li'i môte wua a vee.

⁴ Eyoñe te ébien nje bi nga mane nyoñe bitisone bié bise; teke jia é nga too ngu ôsu viangan. Bi mbe bitisone mewôm mesamane ya si ba loone Argôb, e Basañ, mbie bi mbe éjôé Og si.

⁵ Bitisone bite bi mbe biwôlô, mbôma'an a mimfine *mekok mi ne ôyabe yôp, mimbé y'été mi too mfetan a mengôñ. Minlam mi nji bo ngu mi mbe fe abui été.

⁶ Bi nga mane tyame mevôm mete mese a wôé befam, binga a bone y'été, avale fe bi nga bo e sii njô bôte Sihoñ ya Hesboñ.

⁷ Ve bi nga ba'ale fo'o ve mimbame biyem, a akum ese bi nga koone de bitison.

⁸ Avale te nde bi nga nyoñe mesi bejô bôte Beamorééñ bete bebaé be nga too e Yordane yat e zañe ôsôé Arnon a nkôle Hermon.

⁹ Besidônieñ ba loone nkôle te na Sirioñ, ve Beamorééñ ba loone wô na Senir.

¹⁰ Bi nga nyoñe bitisone bise ya nje'ese, a si ése ya Galad a Basañ a kui Salka a Edré, bitisone ya éjôé Og, e Basañ.

¹¹ Njô bôte Og ya Basañ a mbe môt a nga li'i a vee étam e mvoñe Berefayim. Be ne nguleya beta yen éwolo mbime jé e Raba, tison ôsu ya Beamônite; éwolo te é ne nkpwelan ako'o été, ja lôte méta ényin e nté a ndam é too bebé méta ébaé.

Mesi me nga veban e be mvô'ô Ruben, Gad a éfase Manasé

¹² Melu mete bi nga mane nyoñe si ése é ne Aroér akôé ôsôé Arnon. Me nga ve mvô'ô Ruben a Gad éfase si minkôle ya Galad, a bitisone bise bi mbe été;

¹³ a me nga ve éfase Manasé abime si e nga buk e Galad a Basañ ase, nalé a ne na e nnôma vôm a mbe éjôé Og si. Si ése ya Argôb a Basañ, ba yeme fe je jôé na sii Berefayim.

¹⁴ Mvô'ô Yahir, e mona Manasé, be nga nyoñe si ya Argôb, e Basañ, a kui nnéa Begésurite a Bemakatieñ; be nga loone mevôm mete na: Minlame mi Yahir, jôé te é ne a kui môse wu.

¹⁵ Me nga ve mvô'ô Makir e mona Manasé si ya Galad.

¹⁶ Ve mfa'a mvô'ô Ruben a Gad me nga ve be si é ne e zañe Galad a Arnon. Ôtôñe Arnon ô too nné y'été mfa'a ya nké a ôtôñe Yabôk ô too nnéé sii bone b'Amon.

¹⁷ Nné ya jôp da dim a tôñe mbi'ili Yordañ e zañe ébata'a ya Génézarét a éwuwua mañ a kui tine nkôle Pisga, ñwô ô ne e mfa'a jôp da tôô.

¹⁸ Nde me nga jô be na: Amu éyoñe ji Nti e Zambe wônan, a veya mia éfuse si é ne e Yordane yat, e mfa'a jôp da tôô, nde bôte mewosane bese ya be mia be ntoo ve nyoñe mengale map a dañe Yordan, be tele ôsu ya bone b'Israél bevo'o bese be ne bobenyoñ.

¹⁹ E binga benan, bone benan a mimbame mienan bi n'abui, ma yeme nalé, mbe étam ba ye li'i va, e bitison me maneya ve mia.

²⁰ Vola'ane bobenyoñ akekui Nti a veya be nkañesane ya bi vôme ya tabe, avale mi boya va, éyoñ be maneya nyoñ e ngabe si Nti, e Zambe wônan, a ye ve be adañe Yordan, e mfa'a jôp da dim. Eyoñe te môt ase ya be mia a ye su'ulane bulane zu tabe vôme wé, e si me veya mia.

²¹ Eyoñe te fe me nga jô Yasua na: Mise môé me nga yen, aval'avé Nti, e Zambe wônan, a nga bo bejô bôte bebaé ya Beamorééñ. Avale te fe a ye bo bejô bôte ya mesi mia ye koone me éyoñ mi dañeya Yordan.

²² Te koone be woñ amu Nti, e Zambe wônan a ye wosan asu denan.

²³ Eyoñe te me nga ye'elane Nti a jô na:

²⁴ A wo Nti, ô nga taté na wo liti mbo ésaé wôé anene dôé a ngule ya wo wôé; amu *zambe mbé a ne yôp a si a ne nguleya ve'ele mimboone miôé a biwôlô bi mame biôé'

²⁵ Ajô te va'a ma nkañesane ya dañe Yordan a yene mbamba si a ne yate wé, mbamba si minkô, a minkôle mi Libañ.

²⁶ V'amu mia nde Nti a nga yaa ma a bene meye'elane mam, a jô ma na: Abime te da yian! Te beta kobô ma ajô te.

²⁷ Betek abôbône nkôle Pisga, tuka'a kui mise môé a fombô mfa'a y'akôé, a e nké, mfa'a jôp da dim a e mfa'a jôp da tôô. Ve yeme na woo ye ke dañe Yordan.

²⁸ Wo ye ve Yasua miñye'elan. Wo ye ve nye ngule *nlem, amu nye a yiane dañe Yordan ane nteb'ôsu y'ayoñ, a kalane bone b'Israél e si wo ye yen.

²⁹ Ataté éyoñe te, bi nga tabe va, e mbi'ili wu, zôsôôô a Bétpéor.