DANIEL 8 - Kalate Zambe Nnomo a Mfefe Mfefé Nkôñelan

Nyenane baa: Nnôme ntômba a nnôm ékela

¹ E mbu lale Beltsazar a nga jôô, ma Daniel, me nga yene mfefé ñyenan e mvuse wu y'ôsu.

² Me mbe me fombô'ô, éyoñe ñyenane te, a yen v'ane nge me ne e Suz, nlô tisone y'éfas éjôé y'Elam. Nyenane te été, me mbe mfôm ôsôé ba loone Ulayi.

³ Eyoñ me nga bete mis, me nga yene nnôme ntômba a tele mfôm ôsôé valé, a be'e minla'a mibaé. Minla'a mite mibaé mi mbe ôyabe yôp, ve nla'a wua ô dañe wu ôvo'o ôyabe yôp, a wu ô nga dañ ôyabe yôp ñwô ô nga su'ulane kui.

⁴ Me nga yene nnôm ntômba a wu'a minlak mfa'a jôp da dim, mfa'a y'akôé a mfa'a ya nké. Teke tite fe éziñ é mbe nguleya jibi nye, a teke môt a mbe nguleya nyii môt e mo mé. Aval'ese a kômbô, nde a mbe a bo'ok a ngule jé é mbe ve yaé yaé.

⁵ Awolo me mbe me fasek jôm me nga yen nje nnôm ékela a nga so mfa'a jôp da dim; a nga tyele si avôl avôl, mebo te nnambe tyia, angônda nlak a too nye e zañe mise mebaé.

⁶ Nde a kui bebé nnôme ntômba me nga yen mfôm ôsôé a be'e minla'a mibaé, ve jimbi nye a ngul ése.

⁷ Me nga yen ane a kui nnôme ntômba bebé, ve jimbi nye, a bu'u nye minla'a mié mibaé. Ve wua nnôme ntômba si, nnôme ntômba nyô, te nguleya jibi nye, a tibi nye a mebo; teke môt a mbe nguleya vaa nye e mo mé;

⁸ ngule nnôm ékela é nga bo ve yaé te bulane mvus. V'éyoñ a nga kui abôbône ya ngule jé, nde beta nlak a nga bu'i atemetem; minla'a mife minyin mi nga kui e vôme wuna ô nga too mi lôô mfa'a meku'u menyine ya *si nyô.

⁹ Mfefé nlak ô nga kui, ô so'o nla'a ô nga dañe tyôtyoé ya minla'a minyine mi, ngule jé ve zu yiane mfa'a ya nké, mfa'a jôbe da tôô a mfa'a si ja dañ abeñ.

¹⁰ Nla'a te ô nga wosane beéngele ya yôp, a wua abui y'été si, nalé fe abui ateté a tibi de a mebo.

¹¹ A nga wosane fe ja'ane évete beéngele ya yôp, a vaa *bityi'a be mbe be va'a nye *môs ôse, ve ndamane vôme wé a n'étyi.

¹² Beéngele ya yôp be nga veban e mo mé éyoñe jia, baa be *bityi'a ya *môs ôse, amu mbia mboone nla'a te. Nlak ô nga wua mbamba nkañane Zambe si. E jam ése ô nga bo e nga wulu *mvo'é.

¹³ Eyoñe te me nga wô'ô Engele a kobô'ô. Mfe a nga sili nye na: E mam ñyenan wo liti, ma ye tabe nté ôvé? Nté ôvé mimveane ya *môs ôse mia ye bo momo, nalé fe nté ôvé ékotekot ja ndamane mam mese ja ye jôô, a nté ôvé ba ye tibi vôm a n'étyi a beéngele ya yôp a mebo'

¹⁴ Nde Engele ôsu a nga yalane nye na: Ngô'é a tyé, toyini ébaé a mintete mila bia yiane taté lôt, éyoñe te ñhe vôm a n'étyi a ye beta teléban étyi.

Atinane ya ñyenane baa

¹⁵ Ma Daniel, me ngenane me kele ôsu a fombô jam me nga yen, a me jeñe zene ya wô'ô atinane y'été, nde vevea jôm a funa'ane môt a nga zu tebe ma ôsu.

¹⁶ Nde me nga wô'ô *tyiñ é so'o ôsôé Ulayi é jô'ô nye na: A Gabriel, tame bo môte nyô na a wôk e jam a te yen.

¹⁷ Ane Gabriel a nga subu vôm me nga tele. Amu woñ ô nga bi ma, nde me nga ku asu e butu si, v'a nga jô me na: A Daniel, ô ne ve môt; ve tame yeme na, ñyenane te ô ne ajô susu'a biyoñ.

¹⁸ Nté a mbe a kobô'ô ma, asu dam d'e butu ve si, a me nga dimili fek. Nde a nga bi ma a beta telé ma tetele.

¹⁹ Nye me na: Ma zu kulane wo jam da ye boban éyoñ é ne ntelan, éyoñ ayaa Zambe da ye man.

²⁰ Nnôme ntômba wo te yen a be'e minla'a mibaé a ne ndeme ya bijôé ya Méde a Perse.

²¹ Nnôm ékela a n'éjôé Begrék; beta nlak e zañe mise mé a ne ndeme njô bôt ôsu.

²² Eyoñe nlak ô nga bu'i, minla'a mife minyin mi nga faa vôm ate: Bijôé binyin bia ye nyoñ éjiane ji y'ôsu mbie le, ve teke kui ngu ane énjé.

²³ Eyoñe bijôé bite bia ye kui asu'u dap, a bebo *abé ki be tulane mboon *abé wop ôkup, njô bôt a ne mbia anyu a ôkup mfa'a ya medu'an a ye kuu.

²⁴ Ngule jé ja ye yaé, jame te teke so be émien. A ye bo éndaman bôt ve semé. Jam ese a ye bo da ye wulu *mvo'é a kui vôme ya mane jiane biwôlô bi bôt a ayoñe ya ba be n'étyi.

²⁵ Amu atyeñe dé, a ye kui na a du'u bôte bevok. E mebune mé été, a ye jian abui bôt da buni na e too *mvo'é te jôme ya ko woñ, a a ye wosane njô bôte ya bejô bôt. Eyoñe te ñhe ba ye bu'u nye, môt éziñ te futi mo mé été.

²⁶ Nkôñelane ya buni mfa'a jam ô nga yen ajô mimveane ya mamengô'é a mametyé ñwô le, ve ba'ale'e ñyenane wu nsolan, amu wo fombô melu me ngenan ôyap.

²⁷ Eyoñe te nje ma Daniel, me nga su'ulan a me nga kon nté éziñ. Eyoñ me nga beta bo *mvo'é me nga beta taté mboon ésaé jam e be njô bôt. Ve da na, ñyenane wu ô kele ôsu a ndeñele ma *nsisim, amu me mbe teke tu'a wô'ô wô.