DANIEL 5 - Kalate Zambe Nnomo a Mfefe Mfefé Nkôñelan

E beta dina Baltazar

¹ Môs éziñ njô bôte Beltsazar a nga bo beta dina asu biwôlô bebo bisaé bié, be mbe toyini, ane a nga nyu woon be too.

² Eyoñ a maneya nyu woon, nde a jô na be zuu nye bilaé bi mvot a silba ésaa wé Nébukatnétzar a nga nyoñ e *nda Zambe ya Yérusalém. A nga kômbô belane bie, asu ya nyu, baa be biwôlô bebo bisaé bié, binga bé a bibone bié.

³ Nde ba ke soo bilaé bi mvot bi nga so *nda Zambe, e Yérusalém, njô bôt ve zu belane bie ba be bôte bese a nga bañete.

⁴ Eyoñe nyuan ô maneya, be ve zu taté na ba yia bia bezambe be or, argent, mvot, étyé, bilé a *mekok.

⁵ Awolo te ebien, akule wo ve zu yené bebé ébe'e belambe. De ve zu taté na da tili éfumulu mfine ya *nda njô bôt.

⁶ Eyoñe njô bôt a yen ane wo te wo tili, nye ve zu tab'éyôé *a ko woñ asimesane dé été; ate'e ve bi nye angeteñ a meboñ.

⁷ Njô bôt, ve zu bete tyiñe ngu na be loone beyeme ya Babilôn, bebo majik, befas ateté a mimvimvi'i, nde a jô be na: Môt a ye yeme lañe ntilane wu a kate ma atinane y'été, ba ye jalé nye ngômesane melitan, ba ye jalé nye nsanga or *tyiñ a éyoñe te a ye bo wua ya bengovina b'ôsu y'éjôé.

⁸ Beyem bese be mbe be saane njô bôt be nga zu, ve teke wua a nga bo nguleya lañe ntilane te nge kate njô bôt atinane y'été.

⁹ Eyoñe te njô bôte Beltsazar a nga tu'a dañe ko woñ; biwôlô bebo bisaé fe bi mbe fe'e ne vema.

Daniel a ve atinane ya ntilan

¹⁰ Eyoñe nyia njô bôt a nga wô'ô miñyône njô bôt a biwôlô bebo bisaé bié, a nga nyiine *nda dina a jô na: Enyiñe njô bôt é bo'o ayap! Asimesane dôé e bo'o te bo na ô ko woñ, nge dimili nyôle ya ékôbe jôé.

¹¹ Amu môt a ne éjôé jôé été a too njalan a nsisime bezambe be n'étyi. Melu ésoo a nga too be nga yene na a yeme fase mam, atyeñ a fe'e bia funane fe'e bezambe bi too be nye. Ajô te ésoo, njô bôte Nébukatnétzar a nga telé nye évete mimvimvi'i, bebo majik, befas ateté a mingengañ.

¹² A bili *nsisim wo selan mi mi bôte bevok, wu ya yeme yemelane mam, atyeñ a nguleya ve atinane ya biyeyem, a kulane mesoé me ba a kulane minsolane mi mam. Be tame loone môt ate, Daniel, nyô njô bôt a nga yôlé jôé na Beltsazar: a ye kulan atinane ya ntilane te.

¹³ Nde be nga zuu Daniel be njô bôt, nye ki ve sili nye na: Ye wo ô ne Daniel, nkôme mone Beyude ñwô njô bôt ésaa wom a nga soo wô si ya Yuda'

¹⁴ Me wô'ôya na ô ne njalan a nsisime ya bezambe, a na, wo yeme fase mam, atyeñ a fe'e ja selane bôte bevo'o bese.

¹⁵ Be ndôme soo ma beyem a bebo majik na, be lañe ntilane wu a ve ma atinane y'été, ve be nji bo nguleya bo jame te.

¹⁶ Ve be kateya me na, ô ne nguleya kulane mesoé me ba a kulane minsolane mi mam. Nge wo kui na ô lañe ntilane wu, a ve ma atinane y'été, ba ye jalé wo mengômesane melitan, a jalé wo nsanga or e *tyiñ, a wo ye bo wua ya minlô mi bôte y'éjôé.

¹⁷ Daniel nye njô bôte na: A njô bôt, tame ba'ale memvaka a bifa'é asu dôé, nge ve bie bôte befe. Ve da, ma zu lañe ntilan a kate wo atinane y'été.

¹⁸ Zambe a dañ ôyabe yôp, a nga bo ésoo Nébukatnétzar beta njô bôt, njalan a duma a éjijin.

¹⁹ Amu anen a nga nyoñe be Zambe ate nde bôte ya mesi mese, *meyoñ mese, a *minkobô mise be mbe be fô'ôba'an asu dé. A mbe a va'a mekua y'awu e be môt ase a kômbô, a jôké'é ki môt ase émien a kômbô na a nyiñ; a mbe a nene'e nge sili nyô émien a kômbô sili si.

²⁰ V'a nga su'ulane bo mebun, njalan a nkobô ébiasé; ajô te Zambe a nga vaa nye éto njôane jé, a vaa nye duma.

²¹ Be nga titane nye vôme bôt be too a bo nye na a nyiñ ane betit; ba be bijakase ya fé be nga tabe vôme wua, a ja'a bilok ane benyak, mfô a boté'é nye nyô. A nga tabe nalé a kui *môs a nga yeme na Zambe a dañ ôyabe yôp a ne Njôô ya bejô bôt a a telé môt émien a kômbô na a bo njô bôt.

²² Wo, Beltsazar, mone wé, wo ô too ô tuka'a yeme mam mete mese, ve da na ô nji sili womiene si.

²³ O soñeya Zambe ya yôp éyoñ wo te loone bilaé bi n'étyi bia so *nda jé, a mbie mia te belane bie asu ya nyu bilam, womien, biwôlô bebo bisaé biôé, binga bôé a bibone biôé. Jam afe na wo te lomé bia bezambe be silba a or, mvot a étyé, bilé a *mekok, bezambe be ne te yene jôm, te wô'ô jam, te yeme jôm; a wo te bene ve Zambe a bili ényiñe jôé a asu'ulane dôé e wo wé été duma.

²⁴ Ajô te Zambe a te lôme akule wo e tili ntilane wu.

²⁵ Jam e ne ntilan nde di: Mené Mené, Tekel u Parsin.

²⁶ Atinan e ne na: Mené a tinane na nlañan: Zambe a maneya lañ njôane wôé tañ a kui wô nné.

²⁷ Tekel a tinane na: Mve'an, be maneya ve'e wo kop a yene na ô nji bo adit;

²⁸ Perés a tinane na: Nkaban, njôane wôé ô ntoo nsalane zañ, asu ya veban e be beméde a Bepers.

²⁹ Awolo te ebien, nde Beltsazar a nga jô bebo bisaé bé na be jalé Daniel mengômesan melitan a jalé nye nsanga or e *tyiñ. A nga bo fe foé é katebane na, Daniel a ntoo wua ya beteb'ôsu y'éjôé be tele ôsu.

³⁰ Alu e nga tôñe valé, Beltsazar, njô bôte ya Babilôn a nga wôéban.