DANIEL 4 - Kalate Zambe Nnomo a Mfefe Mfefé Nkôñelan

¹ Ma, Nébukatnétzar, me nga too *nda njô bôte jame *mvo'é a meva'a mese.

² Nde ma zu yeme biyeyem bi nga bo me na me ko woñ; asimesan e nga tôñe ma, me bôô énoñe jam a mam nsisime wom ô nga yen, bi nga bo na me ko woñ.

³ Nde me nga sulan beyem bese ya Babilôn e fefele jame na, be kate ma atinane ya biyeyeme bite.

⁴ Eyoñe mimvimvi'i, bebo majik, befas ateté a bebo mesimba be sulaneya, nde ma kate be biyeyeme biam, ve be nji bo nguleya kate ma nkulane y'été.

⁵ Obe aboñ ô lôteya, nde Daniel fe a suan a too jôé afe na, Beltsazar, jôé te da so e jôé *zambe wom, ve Daniel ate a too njalan a nsisime bezambe be n'étyi. Nde ma kañete nye biyeyeme biame na:

⁶ A Beltsazar, ma yeme na, ô ne njalan a nsisime bezambe be n'étyi, jôme te nje *nsolane jam éziñ ô se nguleya kate wo. Ajô te kate ma, nkulane ya jam ma te yene biyeyem.

⁷ Jam me nga yen, me bôô énoñe jam nde di: Beta élé a tele ézezañe si.

⁸ Elé te ve zu dañe beta bo anen a ngu; mintyaé mié mia dañ ôyabe yôp mi mbe mi kele nambe yôp. E mbe é yené'é, a kui minné ya si.

⁹ Mekaé mé me mbe étua abeñ; é nga be'e abui bibuma môt ase ve yen jôme ya di été. Betite ya fé be nga bômbô éjijine jé si, a anone ya yôp e nga lôñe mumba'a map e mintyaé mié. Jôm ése é vee é nga yee jôme ya di été.

¹⁰ Me bôô énoñe jam, ateme na, éngele a nga sis, a so'o yôp.

¹¹ Ve yôtane ngu a jô na: Baka'an élé te, tyi'ane mintyaé mié; kola'an mekaé mé a wuane bibuma bié fé; betit be kele élé te ôyap, a anon é kôlô'ô mintyaé mié!

¹² Ve mi jôké'é ékum ya minkañ mié e si été. Tiñeta'an ékume bengôkop b'étyé a mvot, nlatan a bili ya fé; jôka'an é tebe e mfô mendim a so yôb été; é ja'a fe bilok ane betit;

¹³ ba ye tyendé nleme môt é be'e a ve je nleme tit. Ja ye tabe nalé tañe mimbu zamgbwa.

¹⁴ Be éngele mbe ba kalane ntyi'ane wu, nalé ate bevevee bese ba ye yeme na Zambe a dañ ôyabe yôp nye a ne njôô ya bijôé bi bôt: A ve njôan e be môt ase a kômbô, môt a dañe nsilibane si, a ne bete nye a bo njôô.

¹⁵ Biyeyeme ma njô bôte Nébukatnétzar me nga yem, mbie le. Wo Beltsazar, kate ñhe ma nkulane y'été. Teke wua ya beyeme ya éjôé jam a te kui na a kate ma wô; ve wo ô ne ngu, amu nsisime ya bezambe be n'étyi ô ne be wo.

¹⁶ Nde Daniel a mbe jôé afe na Beltsazar a nga tebe fe'e ne vema, asimesane dé e nga bo fe nye na *a ko woñ. Njô bôt a beta jô nye na: A Beltsazar, biyeyem a nkulane y'été bi bo'o te ndômetane wo! Beltsazar na: A Masa, biyeyem bi bo'ok asu besiñe bôé, a nkulane y'été, asu ba be ne wo ngame yat!

¹⁷ O nga yen élé é too anen a ngu, mintyaé mia dañ ôyabe yôp mi nambe'e yôp a si ése é yene'e je.

¹⁸ Elé é nga bili mbamba mekaé te, é nga be'e abui bibuma, biôm bise ve yene jôme ya di été; betite ya fé be nga zu bômbô je si, a anone ya yôp e nga lôñe mumba'a map e mintyaé mié.

¹⁹ A njô bôt, élé te é ne wo! O ntoo anen a ngu. Duma dôé e kuiya yôp a njôane wôé ô keya a kui meku'u ya si.

²⁰ O nga yene fe éngele a sisik a so'o yôp a jô na: Baka'an élé te a jiane je! Ve jôka'an ékum é beme si a minkañ e bilo'o ya fé été, mi tiñeti je bengôkop b'étyé a mvot. Ekume te é tebe'e e mfô mendim a so yôp été a di bilok ane betit tañe mimbu zamgbwa.

²¹ A njô bôt, nkulane ñwô wu: Avale Zambe a dañ ôyabe yôp a maneya tyik mfa'a wôé.

²² Ba ye titane wo vôme bôt be too. Wo ye nyiñ mia be betite ya fé; wo ye di bilok ane benyak, mfô a ye boté wo! Wo ye tabe nalé tañe mimbu zamgbwa, mvus éte nje wo ye yeme na Zambe a dañ ôyabe yôp a ne Njôô ya bejô bôt a na, a ve njôan e be nyô émien a kômbô.

²³ Wôna abendé ya suu ékum élé a minkañe mié da tinane na: Wo ye bulane nyoñe njôan éyoñ ô yemeya na, Zambe ya yôp a ne Njôô.

²⁴ Ajô te, a njô bôt, kañese'e nyoñ melebe mam: Bula'ane mvus mfa'a ya mam *abé môé, a bikobe biôé, tyi'i mejô *zôsôô, a bo minzôzoé mvaé; ndô'ôtô na, éyoñe mefo'o jôé ja ye bo ayap.

Biyeyem bia tôéban

²⁵ Mam mete mese me nga tôébane be njô bôt Nébukatnétzar.

²⁶ Eyoñe ngon awôm a ébaé é lôteya, a kele a wulu *nda njô bôte jé e Babilôn.

²⁷ Nde njô bôt a kobô a jô na: Mi lôô Babilôn, beta tison me nga lôñ ane étaba'a njô bôt. Tison éte ja liti abim avé ngule jam é n'anen, abim avé éjôé jam é bili duma!

²⁸ Awolo ebien njô bôt a mbe a kobô'ô mejô mete nde *tyiñ é nga so yôp a jô na: A njô bôte Nébukatnétzar, vô'ôlô'ô ajô di: Ngule ya jôô é kôlôya be wo!

²⁹ Ba ye titane wo e vôme bôte be too! Wo ye nyiñ mia be betite ya fé a wo ye di bilok ane benyak! Wo ye tabe nalé mimbu zamgbwa, mvuse y'été wo ye yeme na Zambe a dañ ôyabe yôp a ne Njôô ya bejôô, a ve njôan e be môt émien a kômbô.

³⁰ Awolo te, njôane te ô nga tôéban: be nga titane Nébukatnétzar a kôlô vôme bôt be too, a taté fe na a di bilok ane benyak a mfô a nga ku nye nyô. Esile jé é nga bo ayab ane mimvote mi ndôé, biaé bié fe ayap ane biaé bi ônon.

Nébukatnétzar a bo mvo'é

³¹ Nébukatnétzar a nga jô na: Eyoñe mimbu zamgbwale mi lôteya, me nga bete mis a fombô yôp, a me nga beta bi nya fe'e; nde me nga ve Zambe a dañ ôyabe yôp akéva, nyô a too nnôm éto; me nga taté na ma kañe Nye, a yôtan étôto'o jé: Njôane wé ô ne teke nné, éjôé jé é too nnôm éto.

³² Bôt be too *si nyô, to'o be n'abui abime be né, be nji bo jôm e mise mé; a bo bôt a bitétéa ya yôb ane Emien a yene mvaé. Teke môt a ne tebe nye ngame yat e mimboone mié, nge ve nye bijô mfa'a ya jam a bo.

³³ Fe'e môt é nga bulane be ma éyoñe te. Nalé fe éjijin a étôto'o njô bôt bi nga bulane be ma asu duma ya njôane wom. Beteb'ôsu bam y'éjôé, a biwôlô bebo bisaé biam be nga ji'a zu nyoñe ma. Me nga beta tabe éjôé jam. A me nga nyoñe duma a dañ éyoñ ôsu.

³⁴ Ajô t'éyoñe ji ma, Nébukatnétzar, ma kañ, ma zalé, ma ve Njô bôte ya yôbe duma! Jam ese a bo e ne *zôsôô, mimboone mié mise mia yian. A bili nguleya sili ba ba wulu mebune si.