DANIEL 3 - Kalate Zambe Nnomo a Mfefe Mfefé Nkôñelan

Mvinda ya kañe éve'ela or

¹ Njô bôte Nébukatnétzar a nga bo éve'ela or é too ôyabe yôp méta mewôm mela, ndam méta éla a telé je e nje'ese Dura, éfuse si ya Babilôn.

² Ane a nga bañete bivet, benya bôtô, bejôô, betyi'i mejô, beba'ale akum, bebôndé mefek, bekobô mejô a bejôô bese ya biwô'ô bijôé na, be zu tabe beta ékôane ya telé éve'ela njô bôt a nga bo ngume ntelan.

³ Ajô te beta biwôlô bebo bisaé bete bese be nga sulan a tabe ôsu éve'ela asu abô'ô ya telé je ngume ntelan.

⁴ Môt a wulu tebe y'ékôan a nga yôtane tyiñe ngule na: Mia bôt mevale mese, a *minkobô mise, vô'ôla'an abendé di na:

⁵ Eyoñ mia ye wô'ô tyiñe toñ, mfañ, mvet, ntyam ateba, ndeñge, éloñ, biôm ba bôm mevale mese, mia ye kumbu si *a kañ éve'ela or nje Nébukatnétzar njô bôt a maneya telé.

⁶ Môt ase a ye bo te kumbu si *a kañ ba ye wua nye e mbe'e nduan awolo te ebien.

⁷ Ajô te awolo bôte bese be nga wô'ô tyiñe toñ, mfañ, mvet ntyam ateba, ndeñge, biôm ba bôm mevale mese, be nga kumbu si *a kañ éve'ela or Nébukatnétzar njô bôt a nga telé.

Bemvôé be Daniel ba ye kañe ve Zambe

⁸ Awolo te ebien nde bôte b'éziñe ya Babilôn be nga somane Beyude

⁹ a jô Nébukatnétzar njô bôte na: A njô bôt tabe'e nnôm éto!

¹⁰ A njô bôt, womien ô nga ve abendé na: Môt ase a ye wô'ô tyiñe toñ, mfañ, mvet, ntyam ateba, ndeñge, éloñ, biôme ba bôm mevale mese, a yiane kumbu si *a kañ éve'ela or,

¹¹ a na, nyô ase a bo te kumbu si *a kañ, ba ye wua nye ézezañe mbe'e nduan.

¹² Ve Beyude b'éziñ ô nga ve bisaé éfas éjôé ya Babilôn: Sadrak, Mésak a Abéd-Négo, bôte bete be nji bisi abendé dôé, a njô bôt, be nji saane bezambe bôé, nge kañ éve'ela or ô maneya telé.

¹³ Ane Nébukatnétzar a nga wô'ô mbia ôlun a bendé na be zuu nye Sadrak, Mésak a Abéd-Négo. Eyoñ be soya be a telé be ôsu njô bôt,

¹⁴ Nébukatnétzar a nga kobô a sili be na: A Sadrak, Mésak a Abéd-Négo, ye bebela na, mia bene saane bezambe bam *a kañ éve'ela or me maneya telé'

¹⁵ Eyoñe ji, taba'ane nkômane na éyoñ mia ye wô'ô tyiñe toñ, mfañ, mvet, ntyam ateba, ndeñge, éloñ, biôm ba bôm mevale mese, mia ye kumbu si *a kañ éve'ela me maneya bo. Nge nalé momo wôna awolo te ebien, ba ye wua mia ézezañe mbe'e nduan. Zambe *mbé a ye bo nguleya nyii mia e mo mam'

¹⁶ Sadrak, Mésak a Abéd-Négo be nga yalane njô bôt Nébukatnétzar na: Bi nji kômbô yalane wo jam éziñ ajô di.

¹⁷ Ve yeme na: E Zambe wongan, nyô bia saane nye, a ne nguleya nyii bia. Yaa a njô bôt, a ye kôté bia e mbe'e nduan a e mo môé.

¹⁸ To'o ki a nji kômbô nyii bia, ve a njô bôt, yeme na, bia ye bene saane bezambe bôé a bene kañ éve'ela or ô maneya telé.

¹⁹ Eyoñe te Nébukatnétzar a nga jaé ne lut a ôlun, teke f'ajibi mfa'a Sadrak, Mésak a Abéd-Négo, nye na be kôbane mbe'e nduan ô bo ayôñ tañe biyoñe zamgbwa, a dañ abime be nga bo be bo'ok.

²⁰ Nde a jô biwôlô bezimbi bivo'o ya nkane bita wé na, be ka'a Sadrak, Mésak a Abéd-Négo a wua be ayôñe mbe'e nduan.

²¹ Be nga ka'a bôte bete, be be'e mengômesane map: bizingi, melô'ô a mengômesane map mefe a wua be ézezañe ayôñe mbe'e nduan.

²² Amu abendé njô bôt e nga dañe ngu a amu mbe'e nduan ô nga dañ abui, nde nkaba'a nduan ô nga wôé bôt be nga wua Sadrak, Mésak a Abéd-Négo e mbe'e nduan été.

²³ Wôna bôt bete belaa, Sadrak, Mésak a Abéd-Négo, be nga ku tem nduan été be too nka'an.

Bemvôé belaa ba nyiiban e mbe'e nduan

²⁴ Atemeteme na njô bôte Nébukatnétzar a nga kôlô si, fe'e ne vema, a sili bôte bé y'éjôé na: Ye bi nji wua bôte belaa nka'an e nduan? Be na: Nalé fo'o a njô bôt.

²⁵ Njô bôt nye na: Ve me lô bôte benyin, teke nka'an, be wulu'u ézezañe nduan. Teke môt éziñe y'été a be'e éve'ela aveñ. A môta nyini a funa'ane *zambe éziñ.

²⁶ Nébukatnétzar ve subu bebé e *mbé mbe'e nduan a jô tyiñe yôbe na: A Sadrak, Mésak a Abéd-Négo, bebo bisaé be Zambe a dañ ôyabe yôp, kuan atan mi zu nné!

²⁷ Nde bivet, benya bôtô, bejôô a bebôndé mefe'e be njô bôt, be nga bômane be a yene na nduan é nji nnambe menyôle me bôte bete, a yene fe na, ésile ya minlô miap é nji ke dik, mengômesane mabe fe teke ndaman, ényume nduan ébien teke nnambe be.

²⁸ Nébukatnétzar ve bete *tyiñ nye na: Duma e bo'o be Zambe Sadrak, Mésak a Abéd-Négo, nye a te lôme éngele a kôté bebo bisaé bé. Ba te tabe nye ndi. Ba te tyam abendé njô bôt a kañese ékpwe'ele ya menyôle map, sa na be saan, a kañe *zambe mfe, éjiane Zambe wop.

²⁹ Ajô te, ataté éyoñe ji, atiñe dam e ne na: Môt ase, to'o a ne *mbé, ayoñ avé, nge nkobô ôvé, a ye kobô Zambe Sadrak, Mésak a Abéd-Négo ébiasé, a ye tyi'ibane bifus, *nda jé fe ja ye bo avise mbuan, amu Zambe mfe a ne nyii bôt ane Nye, a nji bo.

³⁰ Mvuse éte nje njô bôt a nga ve Sadrak, Mésak a Abéd-Négo bito bia dañe ngu éfas éjôé ya Babilôn.

Biyeyeme baa njô bôt: Beta élé

³¹ Njô bôt Nébukatnétzar a nga lôme foé nyô e be bôt mevale mese, *meyoñ mese, a *minkobô mise mbe be too *si nyô ése nye na: Mvo'é é bo'o be mia abui abui!

³² Ma yene mvaé ya bo na bôt be yem mesimba me mam a bitua bi mame Zambe a ne ôyabe yôp a boya mfa'a wom;

³³ mesimba me mam mé me n'angôndô y'anen! Bitua bi mame bié bi n'angôndô ya ngu! Zambe ate a ye jôô nnôm éto, njôane wé ô too a kui miaé mise!