DANIEL 2 - Kalate Zambe Nnomo a Mfefe Mfefé Nkôñelan

Biyeyeme njô bôt a nga Taté yem

¹ Mbu baa ya njôane wé, ñwô Nébukatnétzar a nga yeme biyeyem, biyeyeme bite bi nga ndeñele nye *nsisim, te fe nguleya beta ke ôyo.

² Ane njô bôt a nga bendé na be loone mimvimvi'i, bebo majik, mingbwengbwee, beyeme mam mevale mese, be kate nye biyeyeme bié. Eyoñe be soya a tebe asu njô bôt,

³ nde a jô be na: Ma te yeme biyeyem bia ndeñele ma *nsisim abui: ma kômbô mi kate ma bie.

⁴ Beyem be nga yalane nye nkobô aramééñ na: Enyiñe njô bôt é bo'o ayap! Kate bebo bisaé bôé biyeyem wo te yem, bi kate wo atinane y'été.

⁵ Njô bôte nye na: Me maneya tyik avale di na, nge mi bo te kate ma biyeyem a atinane y'été, mia ye tyi'ibane bifuse bifus, a menda menan ma ye bo ve mevise me mbuan.

⁶ Ve nge mia kate ma biyeyeme a atinane y'été, ma ye ve mia abui memvaka a duma e n'anen. Ajô te katane ma biyeyem a atinane y'été.

⁷ Beyem bete bese be nga yalan éyoñe baa na: Njô bôt a tame ñhe kate bebo bisaé bôé biyeyeme biôé, a bia ki bia ye kate wo atinane y'été.

⁸ Njô bôt nye na: Ma yeme fo'o na mia yi na éyoñ é lôt abui amu mia yem e jam me maneya tyik.

⁹ Ve nge mi bo te kate ma biyeyem bite, wôna *melep ma ye bo avale da e be mia bese, amu mi maneya kui tyiñe ya kobô minsos a medu'an mfa'a wom, mi yange'e ke na éyoñ é lôt. Ve me ma kômbô na mi, kate ma biyeyeme ma te yem, éyoñe te fe ma ye yeme na, mi ne kate ma atinane y'été.

¹⁰ Beyem be nga yalane na: A njô bôt, teke môte ya *si nyô a ne bo e jam wo sili; nalé fe na: Njô bôt éziñ, to'o a n'éwôlô abui, nge ngu, a ngenane te tame sili mvimvi'i, mbo majik nge nnem avale jam wo sili di.

¹¹ Jame njô bôt a sili e ne ayaé; teke môt éziñ a ne nguleya kate wo de ve bezambe: Ba be bôte ki be nji tabe vôme wua.

¹² Eyoñe te ñhe njô bôt a nga dañe wô'ôlun, ve ve atiñe na, be mane wôé beyeme bese ya Babilôn.

¹³ Ane ntyi'ane ya wôé beyeme bese ô nga kateban vôm ase; be nga jeñe fe Daniel a bemvôé bé na be wôé be.

Zambe a kulane Daniel biyeyeme bi njô bôt a atinane y'été

¹⁴ Eyoñe te Daniel a nga kobô Aryok, évete bezimbi be njô bôt, nyô a nga yiane wôé beyeme ya Babilôn, a nga kobô nye a ntyel a fek

¹⁵ a jô nye na: Amu jé ntyi'ane njô bôt ô ne abime ngule di? Nde aryok a nga kate Daniel jam e né.

¹⁶ Awolo te ebien, nde Daniel a nga ke be njô bôt asu ya ye'elane nye na, a ve nye éyoñ, a ne zu kate nye biyeyem a atinane y'été.

¹⁷ Eyoñ a bulane *nda jé, nde Daniel a kate bemvôé bé Anania, Mikaél a Azaria jame te;

¹⁸ nde fe a jô be na, be sili mvame Zambe ya yôbe na, a kulane be nsolane biyeyem ôte, ndemben ba ye bo te wôéban ba be beyeme mam bevo'o ya Babilôn.

¹⁹ Ane *nsolane jam ô nga kulubane be Daniel e biyeyem a alu. Daniel nye ve taté na a kañe Zambe ya yôp,

²⁰ nye na: jôé Zambe da yian ékaña'a, ataté nnôm éto a kui nnôm éto! Fek a ngu bi n'émbié.

²¹ A ne njôô ya biyoñ, a nyô ya mam ma bobane biyoñ, aval a vaa bejô bôt, nde fe a telé be; e Nye a ve mimfefe'e fek a ñyemane mam, e be ba be ne mintyetyeñ.

²² Nye a kulane mam me n'édok a nsolan; *a yem e mam me ne e dibi été, a éfufup ja bômane nye.

²³ A Zambe ya b'ésaa bam, ma kañe wo a ve wo akéva, amu fek a ngu ô veya ma, amu ô boya na, me yem e jam bi nga sili wo, a ô kulaneya bia e jam da tyelé njô bôte nleme yôp.

²⁴ Mvus éte nje Daniel a zu ke be Aryok, e môte njô bôt a nga bendé na, a wôé beyeme ya Babilôn, a jô nye na: Te bo na beyeme ya Babilôn be wôéban. Kele ma e be njô bôt, me kate nye atinane ya biyeyeme bié.

²⁵ Nde Aryok a ji'a kee Daniel e be njô bôt a jô nye na: E be minkôme ya Yuda été, me yeneya môt a ye kate njô bôt atinane ya biyeyeme bié.

Daniel a kañete biyeyeme bi njô bôt

²⁶ Njô bôt nye Daniel a mbe jôé afe na Beltsazar na: Ye ô ne fo'o nguleya bo na me yem biyeyeme ma te yem atinane y'été'

²⁷ Daniel a nga yalane nye na: Befas ateté, bebo majik a mimvimvi'i be se nguleya kate njô bôt *nsolane jam a kômbô yem.

²⁸ Ve Zambe a ne yôp, Nye a kulane minsolane mi mam, nye a bo na ô yeme jam da ye bobane melu ma zu. Biyeyem ô nga yem ô too ôyo mbie bi:

²⁹ A monti njô bôt, éyoñ ô nga bômbô si, ô nga taté na wo simesane mame ya melu ma zu. Nde nyô a kulane minsolane mi mam, a nga liti wo jam da ye boban.

³⁰ Nge nsolane jame te ô nga kulebane be ma, nalé a nji boban amu na, me bili fek ja dañe nyô ya bôte bese be vee, v'amu na, môt éziñ a kate wo atinane ya biyeyem, a na, ô yem asimesane ya e nleme wôé.

³¹ A Monti njô bôt jam ô nga yen nde di: O nga yen étua beta éve'ela é tele wo ôsu é too aval étôtok ja wôé mis, é too fe ékowoñ.

³² Nlô ya éve'ela te ô mbe nya or, nkuk a mo bi too argent, abum a mebé ki mvot;

³³ mebo me too étyé, éfase mekule mebo jia é too étyé, ji évo'o ki ndi'ane tyia.

³⁴ Ô nga nye'e ô lôô éve'ela te, akekui éyoñe akok e nga famé e nkôle yôp, môt éziñ momo, a jimbi mekule mebo m'étyé a ndi'ane tyia m'éve'ela'a te, a tya'a me.

³⁵ Nde éyoñe jijia étyé, ndi'ane tyia mvot argent a or bi nga veñesane mbuluk, ñwô évuñulu é nga mialan ane bivio bia yele vôme ba tya'a bidi. Nde éve'ela ése é nga mane jañ jôm te li'i. V'ako'o e nga jimbi éve'ela, e nga veñesane beta nkô a yiane si ése.

³⁶ Biyeyem ô nga yeme le, a njô bôt. Atinane y'été ki nde di:

³⁷ A njô bôt, ô ne njôô ya bejôô, amu Zambe ya yôp a veya wo njôan, duma, ngu a étôtok;

³⁸ a futiya bôt, betit a anoñ éjôé jôé si: E vôm ase be né, wo ô ne masa wop. Ajô te a njô bôt, wo ô ne nlô or!

³⁹ Mvuse jôé éjôé éfe ja ye tebe te dañe ngu an'éjôé; wôna mvuse valé éjôé lale ja ye tebe nje ja ye bo mvot a dañe si ése.

⁴⁰ Ejôé nyini ja ye tebe é too ngu an'étyé; aval'étyé ja fit, ja miat a ko'o jôm ése, avale te éjôé te ja ye fit a ko'o bijôé bi ne je ôsu.

⁴¹ Wôna, aval ô nga yene mekule mebo a anyu ya mebo, éfase jia ndi'ane tyia, ji évo'o ki étyé, nde éjôé te ja ye salé zañ; ve jôm éziñe ya ngul étyé ja ye bo été amu ñyenan ô nga yen étyé mbunda'an a ndi'ane tyia.

⁴² A mbôlô anyu ya mebo e mbe éfase jia étyé, ji évo'o ki ndi'ane tyia, éjôé te ja ye bo ngu éfase jia, a éfas évo'o ki teke tabe.

⁴³ O nga yene étyé mbunda'an a ndi'ane tyia amu bejô bôte ya bijôé bite ba ye bo bilat a zene ya meluk. Ve bilate bite bia ye bo teke tabe, avale fe étyé ba ndi'ane tyia be se nguleya fulan.

⁴⁴ Melu ya bejô bôte bete, Zambe ya yôp a ye telé éjôé ja ye bo teke tyamban, a éjôé te ja ye bo teke éjôé y'ayoñ afe si, ja ye fit a bo bijôé bite momo; a ébien ja ye tabe nnôm éto:

⁴⁵ Ajô te nde ô nga yen akok e ko'o nkôle yôp môt éziñ momo, a e nga ko'o étyé mvot ndi'ane tyia, argent a or. Zambe a n'anen a boya njô bôte na, a yeme jam da ye bobane melu ma zu. Biyeyeme biôé bi ne bebela a nkulane y'été ô ne wu ya buni.

⁴⁶ Eyoñe te njô bôte Nébukatnétzar a nga ku asu e butu si, ve kute meboñ asu Daniel, a bendé na be ve nye *bityi'a beôlobinda.

⁴⁷ Njô bôt nye Daniel na: Bebela na, Zambe wônan a ne Zambe ya bezambe, a Masa ya bejô bôt a, a kulane minsolane mi mam, vôme wo te bo nguleya kulane nsolane jame wu.

⁴⁸ Nde njô bôt a nga nene Daniel a fa'é nye abui a biwôlô bi biôm. A nga telé nye njôô ya éfuse si ya Babilôn a telé fe nye évete nnene ya beyem bese ya Babilôn.

⁴⁹ Daniel a nga ye'elane njô bôte na a ve Sadrak, Mésak a Abéd-Négo mevôme ya saé éfuse si ya Babilôn. Ve Daniel a mbe mbôndé mefek e *nda njô bôt.