DANIEL 12 - Kalate Zambe Nnomo a Mfefe Mfefé Nkôñelan

Biyebe a ényiñ

¹ Engele a nga beta jô me na: Eyoñe te Engele Miké a ye yené, évete ya beéngele, nyô a ba'ale bôte bôé. Eyoñe te ja ye bo ji ya minlem mi tyele yôp, avale te e ngenan te tame bo nté ane ayoñ e tabe a kui éyoñe te. Ba bese ya ayoñe dôé môé map ma ye bo ntilan e kalate y'ényiñ ba ye nyiiban.

² Abui bôt e n'ôyo mesoñe si da ye ve'e ôyo, bevok asu ényiñe ya nnôm éto ba bevok asu ôson, asu angôndô ya nnôm éto.

³ Mimfefek mia ye faé a étôtok ane ji ya yôp; mbe be nga volô bôte bevo'o na be bo te tyendé, ba ye faé nnôm éto an'ateté.

⁴ Wo Daniel, ba'ale'e foé nyô nsolan, te kulane jam e ne kalate nyô te na, éyoñ y'asu'ulan é kpwaan. Bôt abui ba ye lañe nye a ñyemane wop wo ye kô'ôlan.

Eyoñe y'asu'ulan

⁵ Eyoñe te ma, Daniel, me kele ôsu a fombô jam me nga yene, te bôte befe bebaé be nga yené, be tele tetele e minsa'a mi ôsôé mibaé.

⁶ Wua a nga kobô môt a nga be'e éfumulu ngômesan a tele mendime y'ôsôé yôp, a sili nye na: Bitua bi mame bi bia ye man éyoñ évé'

⁷ Môt a nga be'e mengômesan me ndombo a nga bete mo mebaé yôp, a me nga wô'ô a jô'ô na: Ma kane ngana a jôé Zambe a too nnôm éto na: Mame ma ma ye tabe mimbu mila a étun. Ma ye man éyoñe ngule y'ayoñe bôte Zambe ja ye bu'uban ése.

⁸ Ma, Daniel, me nga wô'ô mejô mete, ve teke yeme jôm. Ajô te me nga sili na: A Nti wom, mam mete mese ma ye man éyoñ évé'

⁹ Nye me na: A Daniel, foé nyô ja yiane tu'a tabe nsolan a kui éyoñ y'asu'ulan.

¹⁰ Bôt abui ba ye tuneban, fuban, a bo nya *mvo'é amu *meve'ele. Mbia be bôt, amu te nguleya yem, ba ye ke ôsu a bo mbia be mame map. Ve mimfefek mia ye yem e jam da lôt.

¹¹ Ataté éyoñe mvean wo veban éyoñ ése wo ye tebe, a kui éyoñe *ngunemelan ja jian ja ye teléban e *nda Zambe, mimôs mia ye lôt toyini, mintete mibaé a mewôm ébul.

¹² Ebotan a môt a ye yañge a kui mimôs toyini, mintete mila a mewôm mela a mitan!

¹³ Ve wo kelek a kui asu'ulan. Wo ye bi awo'on a wo ye tebe asu ya nyoñe ma'ane môé melu ma su'ulan.