DANIEL 11 - Kalate Zambe Nnomo a Mfefe Mfefé Nkôñelan

¹ Nye mamien me nga volô a suk, mbu ôsu Darius mone Méde a nga jôô.

² Eyoñe ji foé ya buni ma kate wo nje nyô: Bejô belaa ba ye tyendan éjôé ya Perse, nyô nyini a ye tôñ, a ye kôan akum e too abui a dañe bejôô be nga too ny'ôsu. Eyoñ akume dé e veya nye abime ngule da yian, éyoñe te a ye ve ngul ése ya wosane éjôé Grék.

Bita e zañe bejô bôte y'akôé a e nké

³ Ve mbene ya mewosan wo ye bo njô bôte ya Grés. A ye bo nlô ya éjôé é ne ndam a a ye bo aval'a yene mvaé.

⁴ Ve da na, éyoñ a maneya tu'a telé éjôé jé, ngule njôane jé ja ye bu'i a éjôé jé ja ye kabane ngab ényin. Saake bôte ya mvoñe jé mbe ba ye tyendé nye: Ngule njôan ja ye kaban e be bôte befe, ve balé bete teke kui abime ngu a nga bili.

⁵ Môt a ye jôô éfas éjôé ya nké a ye bo ngu, ve jia ya bivete bezimbi bié, ja ye dañe nye ngu, a éjôé jé ja ye dañ énjé ndam.

⁶ Abe mimbu e lôteya, ba ye bo élat: ngone njô bôte ya nké ja ye lu'u njô bôte y'akôé, asu ya beta kôme ñwôka'an e zañe jap. Ve a ye bo te ba'ale éjôé jé. Nnôm émiene fe aa ye ke nyiñ, avale te fe mone wop. Emiene fe a ye wu baa be bôt ba bômane nye, ésaa a nnôm.

⁷ Môte ya *nda bôte jé a ye nyoñ éto ésaa, a a ye zu wosane nkane bita njô bôte y'akôé aleme dé été. A ye wosane nkane bita ôte a dañe wô.

⁸ Biôme ya nsa a ye kee bie Ejipte, bi ne bive'ela bezambe ya si éte, a biôme bi or a argent biap. Eyoñ abui mimbu e lôteya évôvoé été,

⁹ njô bôte y'akôé a ye ke éjôé ya nké, a beta fe bulan e si jé.

¹⁰ Bone be njô bôte y'akôé ba ye kômesane bita amu ba ye kôane minkan mi too étua abui. Wua y'été a ye ke ôban, éyoñe te baa be bezimbi bé ba ye dañe nné ane vôm ôtôñ mendim wo kui ndôn. Eyoñ a ye bulan e si jé a ye wosane tison ôleme nsiñ.

¹¹ Amu ôlun, nde njô bôte ya nké a ye tya'a njô bôte y'akôé bita; njô bôte y'akôé ate a ye ta'a abui minkane bezimbi nsamba ve mia ye ku e mo besiñ.

¹² Njô bôte ya nké a ye bo mebun amu ndañane te; v'akôsa bo a ye wôé betoyini bezimbi, a ye bo teke dañ.

¹³ Njô bôt y'akôé a ye beta ta'a mimfefé minkane bezimbi nsamba, mi too abui a dañe mi ya ôsu. Eyoñ abe mimbu e lôteya, a ye beta zu a beta nkane bita ate, mengale mé me too ngu.

¹⁴ Melu mete bôt abui ba ye ke njô bôte ya nké ngame yat; ja'ane bôte y'ayoñe dôé a Daniel, bôt ba nye'e mame y'évô, ba ye ke nye ngame yat, nalé ate jam e nga kateban e ñyenan été da ye tôéban. Ve ba ye bo te dañ.

¹⁵ Njô bôte y'akôé a ye zu a bo bikôndôk a a ye nyoñe tison ôlem. Nkane bita ya nké ô kusa bi *minsamba mewosan mi ne ngu, wo ye bo teke tebe asu dé; ngule jé ja ye bo te volô nye na a yeme ngu.

¹⁶ Môta ôban a ye bo ane a yene mvaé. A ye tabe e si ya mesi ma dañ abeñ, a kooé na a maneya tyame biôm e zene jé.

¹⁷ Eyoñe a ye tyi'i na a zu wosan a ngul ése y'éjôé jé, a a ye vañe bo bilat a nye: A ye kee ngo jé aluk e be njô bôte ya nké, ôsimesane vié ô too na a kee si nsiñe wé njañ, ve fe'e medu'an éte ja ye bo teke dañ.

¹⁸ Eyoñe te a ye wua mise mé e bifuse bi si ya mañ a nyoñe abui mebôta, a kui évete ya si fe ja ye tyi'i mbia anyu wé nné, a bo mam ma tôñe valé na me ku nye nlô.

¹⁹ Eyoñe te a ye fombô bitisone ya si jé bi bili alem, ve a ye yeñelan a su'ulane ku be teke fe nye beta yen.

²⁰ Nyô a ye nyoñ éto jé a ye lôme môte na a sa *nda y'éjôé ja dañe duma; ôbe aboñ ô lôteya, ba ye bu'u njô bôt ate ve saake menganda bôt été, nge ézezañe bita.

²¹ Nyô a ye nyoñ éto jé a ye bo môt ba biasé; ba ye bo te ve nye éto éjijine njô bôt. E *mvo'é été, môt ate a ye zu nyoñe njôan a mefe'e medu'an.

²² Teke nkane bita éziñ wo ye bo nguleya dañe nye; a ye ko'o mie mise a a ye wôé évete bôte y'élat.

²³ A ye belan bilat baa be be asu ya du'u be, a ngule jé ja ye bo ve yaé yaé, akôsa bi bôte tyôtyoé.

²⁴ E *mvo'é été, a ye ke e mebôta ma dañ afok éfuse si te asu ya bo jame bimvam bié bi nji tame bo; a ye sa si a kabe biôme ya nsa a akum e be bôte bé. A ye fe bi ôsimesane ya wosan alem. Ve jame te ese daa ye ke tabe ayap.

²⁵ Ndi é too nye mfa'a ya ngule jé a ayo'o dé; a ye ke wosane njô bôte ya nké a bili beta nkane bita. Njô bôte ya nké ate a ye kômesane mewosan a bili nkane bita wo dañ anen a étua ngu, ve a ye bo te kui na a vo nye, amu mvôle mboone mam ja ye bo na a bili.

²⁶ Amu bôte ya ba bômane nye ba ye koñe nye, ba ye dañe nkane bita wé, a abui bezimbi da ye wu.

²⁷ Bejô bôte bebaé ba ye tôbane tawôlô wua, ve mbôlô minleme miap mia ye bo njalan a *abé, ba ye laane ve minsos. Minlañe miap mia ye bo teke kui vôm éziñ, amu éyoñ y'asu'ulan é ngenan te kui.

²⁸ Njô bôte y'akôé a ye ke e si jé a bili ézu'u akum. E *zen, a ye wosane bôte y'élat, aval e mbe ny'ôsimesan, éyoñe te a ye bulane e si jé.

²⁹ Eyoñ éyoñ é kuiya, njô bôte y'akôé a ye beta ke éjôé ya nké, v'éyoñe te, mam ma ye bo te beta bo ane éyoñ ôsu.

³⁰ Bôte ya jôp da dim, be so'o besitima ya Kitim ba ye zu tebe nye e ngame yat. Eyoñ a biliya ate'e *nlem, a ye bulan; éyoñe te a ye beta kôñelan ayaa dé e be bôte y'élat é n'étyi, baa be beyeñeyeñ be bôte y'élat be too *tyiñ.

³¹ Bezimbi a ye lôm ba ye tebe asu mfufube tison ôlem, a ve je mvin. Ba ye tyame mimvean ba ve Zambe *môs ôse, a telé mbia jôm a n'angôndô ata'a metuna'a yôp.

³² Njô bôt émien a ye dutu bôt be ben élat a atyeñe nkobô dé. Ve ba bese be ne avale da mfa'a Zambe, ba ye yem e mboone wob été.

³³ Ba ba dañe fek été ba ye ye'ele ba bevo'o abui; nté éziñ, ba ye wôé bevo'o y'été, a di'i ba bevo'o nduan, ba ye futi ba bevo'o *nda mimbôk, éyoñ be maneya wôlé be akume dap.

³⁴ Eyoñe ya bikpwe'ele bite, mvolan wo ye bo be ve tyôtyoé, amu abui bôt da ye tôñe be ba ye bo jame te mboone bebadu'u.

³⁵ Bôt abui ya ba be ne mimfefek ba ye ku, a awu da ye volô mfa'a ya tune ba ya ayoñ, a fubu de, a bo de éfumulu asu éyoñ y'asu'ulan. V'éyoñe te é ngenane te bo ji y'asu'ulan.

³⁶ Njô bôt a ye bo aval émien a yene mvaé. A ye kobô Zambe ya bezambe avale e nji yiane *njaman, njalan a mebun a too fe v'ane nyô a dañe bezambe. Mam ma ye wulu nye *mvo'é a kui éyoñ ayaa Zambe da ye yené. Eyoñe te ñhe Zambe a ye bo jam a nga tyik.

³⁷ Njô bôt ate a ye bo te semé bezambe bimvame bié bi nga kañ, nge nyô binga ba dañe dañe nye'e; amu a yen émien ane nyô a dañe azezambe, teke semé wua.

³⁸ V'a ye viane kañe *zambe y'alem, ôzezambe bimvame bié bi nji ke yem; a ye ve wô or, argent, meko'o me n'édima a biôm bife bia kui tañ.

³⁹ A ye wosane bitisone bi'alem a mvolane ôzezambe ya si fe ôte. A ye jalé ba bese ba kañese ôzezambe te duma, a ye telé be bivete ya abui bôt, a ve be mesi ane ma'an.

⁴⁰ Eyoñ y'asu'ulan, njô bôte ya nké a ye beta taté mewosan, ve njô bôte y'akôé a ye jimbi nye a bevagoñe bita bé, bikabela bié a ézu'u besitima jé; a ye nyiin e abui mesi, a nkane bita wé, a tula'ane minné ane ôtôñ mendim wo kui ndôn.

⁴¹ A ye vambane si ya ma ma dañ abeñ, vôme bôt abui ba ye ku. Ve bone b'Edom, baa be Môab a biwôlô y'Amon ba ye fam minju'u mite.

⁴² A ye kee éjôé jé e mesi mefe, ja'ane Ejipte, je fe ja ye bo te fame mo mé.

⁴³ A ye nyoñ mefo'o y'Ejipte: Or, argent a biôm bi n'édima. Belibieñ a b'Etiopieñ ba ye ke éjôé jé si.

⁴⁴ Ve mefoé ma so jôp da tôô a akôé ma ye bo nye na *a ko woñ: A ye ke ôban, njalan a ayok, asu ya jiane abui bôt.

⁴⁵ A ye lame menda bindelé me njô bôte mé e zañe mañ a nkôle ya si ya mesi ma dañ abeñ ô n'étyi. A vôm ate nye awu da ye dilane nye, môt éziñ teke zu volô nye.