DANIEL 1 - Kalate Zambe Nnomo a Mfefe Mfefé Nkôñelan

Daniel a bemvôé bé e Babilôn

¹ Mbu lale Yeôyakim, njô bôte ya Yuda a nga jôô, ñwô Nébukatnétzar; njô bôte ya Babilôn a nga soo nkane mewosane wé a dili tisone Yérusalém a bita.

² Nti a nga ve Yeôyakim, njô bôte ya Yuda, e mo me njô bôte ya Babilôn, a ve fe nye éfase bisua a bilaé ya *nda Zambe, nye ve kee bie e si ya Sinéar, e *nda zambe wé; a nga futi bisua a bilaé bite e ndaa énaan akume *zambe wé.

³ Njô bôte ya Babilôn a nga bendé Aspenaz, évete ya biwôlô bebo bisaé bié na a top, e bone b'Israél été, bendôman ba so mvoñe bejôô, nge so menda bingo'o y'ayoñ.

⁴ Bendôman bete be too *mvo'é ne selem, abeñe ya yen, njalan a fek, ñyeman a mfasan bi too fe be be, ndemben ba ye saane njô bôt e *nda jé été. Ba ye ye'ele be ane ba kobô a tili nkobô ya Babilôn.

⁵ Môs ôse njô bôt a nga tiñeti be ngabe y'avale bidi a mbe a ja'ak, a nyô ya avale woon a mbe a nya'ak. Njô bôt a kômbô'ô na be ye'ele be tañe mimbu mila, mvus éte nje ba ye saane nye.

⁶ Bendômane benyine ya bone be Yuda be mbe nsamba ya ba be nga toban be mbe môé na: Daniel, Anania, Mikaél a Azaria.

⁷ V'évete biwôlô bebo bisaé é nga yôlé be mimfefé mi môé avale di: Daniel na Beltsazar, Anania ke na Sadrak; Mikaél nye'e na Mésak a Azaria na: Abéd Négô

Daniel a bene di a nyu ane njô bôt

⁸ Ve Daniel a nga tu'a tyik e nleme wé été na a ye bo te ve émiene nsem a ndian avale bidi njô bôt a nga di di, nge a nyuan avale woon njô bôt a nga bo a nya'ak. Nde a nga sili évete biwôlô bebo bisaé é bo te tindi nye na a ve émiene nsem a avale bidi te.

⁹ Zambe a nga bo na évete ji é nyoñe nsili Daniel a mevak a mbamba *nlem.

¹⁰ V'akôsa bo nalé, é nga yalane Daniel na: Ma ko masa wom njô bôte woñ, amu nye a nga telé jôm mia yiane di a nyu; woñ ô ne me na mesu menan me za bo te faé ane ma bendômane ya miaé wônan. Njô bôt a za tyi'i me nlô amu mia.

¹¹ Daniel nyee môt évete biwôlô bebo bisaé é nga ve na a ba'ale Anania, Mikaél, Abéd-Négo a émiene na:

¹² Tame ve'ele bebo bisaé bôé éyoñe ji tañe melu awôm, be ve bia bijebejeba ya di a mendime ya nyu;

¹³ mvus éte, wo ye ve'ane mesu mangan a ma bendôman ba di avale bidi njô bôt a di, nalé ate wo ye bo bebo bisaé bôé aval'ane jam wo ye yen e né.

¹⁴ Nde a nga kañese jam be nga sili nye a ve'ele be tañe melu awôm.

¹⁵ Eyoñe melu mete awôm me lôteya, mesu map mme me nga dañ abeñ a menyôle map avem a dañe bendôman be nga di avale bidi njô bôt a mbe a ja'ak.

¹⁶ Ajô te môt a mbe a ba'ale'e be a nga bo a telé'é bidi be mbe be yiane di a woon be mbe be yiane nyu fefe a ve be bijebejeba.

¹⁷ Zambe a nga ve bendôman bete benyin mfasan a abui ñyeman e nkobô a fek. Daniel a mbe fe nguleya yem atinane ya miñyenan a biyeyem mevale mese.

¹⁸ Eyoñe éyoñe njô bôte Nébukatnétzar a nga tiñeti na be zuu nye bendôman bete é nga kpwaan, évete biwôlô bebo bisaé é nga zuu nye be.

¹⁹ Njô bôt a nga laane be minlañ, ve teke wua ya bendôman bete a nga yené ntyetyeñ ane Daniel, Anania, Mikaél a Azaria. Nde be nga nyoñebane bisaé be njô bôt.

²⁰ E jam ese njô bôt a nga sili be e fombô'ô fek a mfasan, a nga yene be dañe bebo majik a mimvimvi'i mise y'éjôé jé biyoñ biyoñ.

²¹ Daniel a nga bo ésaé e *nda njô bôt a kui éyoñe Sirus a zu telébane njôô.