BETYIʼI MEJÔ 9 - Kalate Zambe Nnomo a Mfefe Mfefé Nkôñelan

¹ A nga bo na Abimélék, e monafame Yérubal, a nga ke Sikem, e be bendôm be nyia. Nde a nga kobô bôte bese ya janyañe dé na:

² Ma ye'elane mia mi jô benya bôtô bese ya Sikeme na: Jé ja dañe mvaé mfa'a wônan, ye na bôte mewôme zamgbwa, e ne na bobefame be Yérubal bese be jôô mia, ye na môte wua nye a jôô, mi simesane na me ne jia ya bivese bienan a wua ya minsône mienan'

³ Nde bendômenyañ be nga ba'alane nkobô wé ôte ôse e señ jé e be benya bôtô bese ya Sikem. Ane minleme miab mi nga ndeñ e mfa'a Abimélék amu be nga jô na: Abialé dangane le.

⁴ Be nga ve nye minsañ mi moné mewôme zamgbwa mi so'o e *nda zambe Bal Bérit mfa'a ya kuse bôt be ne te mfi a bezametane mam be tôñe nye.

⁵ Ane a nga zu Ofra e jale b'ésaa wé, a wôé bobenyañ, bobefam be Yérubal bôte to éyoñe jia. Yôtam étam, nyô a mbe mongô, nye a nga li'i amu a nga sobô.

⁶ Ane benya bôtô bese ya Sikem a Bét-Millo ase be nga sulan a telé Abimélék njô bôt, bebé élône y'ako'o e ne ntélan e Sikem.

Nkana Yôtam

⁷ Eyoñe Yôtam a nyoñeya foé éte, ane a nga ke tebe abôbône nkôle Garizim, éyoñe te a nga yôtan ôyabe yôbe na: Vô'ôla'ane ma, a mia benya bôtô ya Sikem, Zambe fe a tame vô'ôlô mia!

⁸ Bilé bi nga ke na bi wo'o njô bôt a zu tebe be ôsu mbon. Be nga jô ôlivié na: Bo'ok njô bôte wongan.

⁹ V'ôlivié ô nga yalane be na: Ye ma ye jô'é mbone wom ñwô ôte wo volô na Be ve Zambe a bôte duma, V'amu na me ke ndeñekolô E bilé yôp'

¹⁰ Ane bilé bi nga jô figié na: Wo, za'a jôô bia.

¹¹ Ve figié é nga yalane be na: Ye ma jô'é avoé dam A mvaé ébuma jam, V'amu na me ke ndeñ kolô E bilé Yôp.

¹² Ane bilé bi nga jô ndi'i woone na: Wo, z'a ñhe jôô bia!

¹³ Ve ndi'i woon ô nga yalane be na: Ye ma jô'é e woone wom A ve Zambe a bôte mevak V'amu na me ke ndeñe kolô E bilé yôp'

¹⁴ Nde ñhe bilé bise bi nga Jô Esaé biyo na: Wo, za'a jôô bia!

¹⁵ Ane ésaé biyo é nga Yalane bilé na: Nge e ne bebela na mia Kômbô wo'o ma mbone na Me bo njôô wônan, Za'an a sobô évôvoé jame si; Nge nalé momo wôna nduan ja Ye vam ésaé biyo si A mane di'i besédre ya Libañ.

¹⁶ Ajô te éyoñe ji ye e ne bebela a *zôsôô a mboon mia te bo na mia telé Abimélek njôô? Ye mia te bo Yérubale mvaé a e *nda jé'

¹⁷ Amu na ésaa wom a nga wosan asu denan, a nga ve ényiñe jé asu bita a kôté mia e wo bôte ya Madian;

¹⁸ ve mia, mi maneya kôlô si den a wosane ndaa ésaa wom. Mi maneya wôé bobefame bé, bôte mewôme zamgbwa, akôme da yôp, a mi teléya Abimélék njô bôte ya benya bôtô ya Sikem, nyô a ne e mona mbo ésaé minga wé, amu a bialane mia.

¹⁹ Nge jam mia te bo Yérubal a *nda jé e môse wu e ne bebela a *zôsôô, Abimélék a bo'ok ava'a denan, a mia kik bo'one ava'a dé!

²⁰ Nge momo wôna nduan é so'ok e b'Abimélék a mine benya bôtô ya Sikem a ba ya *nda Milô, a nduan é so'o fe e be benya bôtô ya Sikem a ba ya *nda Milô a min Abimélék!

²¹ Ane Yôtam a nga kôlô a tup; a nga ke e Bir a tabe wé akekui Abimélék a nga wu.

Engôngol awu Abimélék

²² Abimélék a mbe njô bôt Israél tañe mimbu mila.

²³ Ane Zambe a nga lôme mbia nsisime metyama'ane e zañe Abimélék a benya bôtô ya Sikem, nde benya bôtô ya Sikem be nga koñe Abimélék,

²⁴ be bula'ane nye mboon évô a nga bo bobefame be Yérubal mewôme zañgbwa a nalé ate metyi mab ma ye tabe e b'Abimélék, monyañe wop, nyô a nga wôé be, a e be benya bôtô ya Sikem mbe be nga volô nye na a wôé bobenyañe bé.

²⁵ Ane benya bôtô ya Sikem be nga telé bôte ya yabe Abimélék e mebôbône minkô be bo'ok ésaé ya wôlé belôtan bese ba zu bebé vôm be tele *zen e biôm bise be bili. Ve be nga kat Abimélék jame te.

²⁶ A nga bo na Gal, e mona Ebéd, ba be bobenyañ be nga zu lôte Sikem. Ane benya bôtô ya Sikem be nga tabe nye ndi.

²⁷ Nde be nga ke mefub a kolé bibuma bi ndi'i woon, be nga tya'a bibuma bite, a bo abui mevak; nde be nga nyiin e ndaa *zambe wop, a di a nyu, nde be nga yo'é Abimélék.

²⁸ Gal, e mona Ebéd a jô'ô na: Za a ne Abimélék a za a ne Sikem, asu ya na bi saane Abimélék? Ye a nji bo e mona Yérubal a Zebul, ye a nji bo évete jé? Bo'one bôte b'Amor ésaa Sikem bisaé; ve bia amu jé bia yiane saane Abimélék'

²⁹ Za a ye kee ma bôte bana e mo mam été? Eyoñe te ma ye wôé Abimélék. A a nga jô Abimélék na: Yemete'e nkane bita wôé a ke wosan!

³⁰ Eyoñe Zebul, njôô ya tison a nga wô'ô e jame Gal e mona Ebéd a nga jô, nde a nga yaa.

³¹ Ane a nga lôm Abimélék minlôman asoé a jô nye na: Gal, e mona Ebéd a bobenyañ, be zuya e Sikem a tindi bôte ya tisone na be ke wo ngame yat.

³² Eyoñe ji kôlô'ô si a alu, womien a bôt be ne ngame jôé a ke sobô afan été.

³³ Mametyé, éyoñe tyé ja lendé, wo ye kôlô si a ke e tison. Eyoñe Gal a e bôt be ne ngame jé ba ye zu wosane wo, wo ye bo nye e jame ngule jôé ja ye ve wo nkañesan.

³⁴ Nalé Abimélék a bôt be mbe e ngame jé be nga kôlô si a alu a ke sobô bebé Sikem be too minsamba minyin.

³⁵ Wôna Gal, e mona Ebéd a nga kui atan a ke tebe anyiine *mbé ya tison. Eyoñe te Abimélek a bôte bese be mbe e ngame jé be nga kui asoé.

³⁶ Nde Gal a nga yene bôt a jô Zebule na: Tame yen nsamba bôt wo so abôbône minkô. Nde Zebul a nga yalane nye na: Nsisiñe ya minkô ñwô wo yen a nyoñ ane bôt.

³⁷ Nde Gal a nga beta nyoñe nkobô a jô na: Nsamba bôte fo'o ñwô wo sis e mfa'a ya ézezañe nlam a nsamba ôfe wo zu e zene Elône mimvimvi'i.

³⁸ Ane Zébul a nga yalane nye na: Mbamba *minkobô miôé mi ntoo vé, wo ô mbe ô jô'ô na: Za a ne Abimélék, na bi saane nye? Ye sa bôt ô nga biasé mbe le? wulu'u éyoñe ji a wosane nye!

³⁹ Ane Gal a nga tebe ôsu benya bôtô ya Sikem a wosane Abimélék.

⁴⁰ A nga mate ôsu Abimélék amu a nga tôñe nye. Abui bôt e nga balé fe mbalan ya wu nde be nga mane ku si a kui anyiine *mbé.

⁴¹ Ane Abimélék a nga tebe Aruma. A Zébul a nga titane Gal a bobenyañ; be nji fe bo nguleya beta tabe e Sikem.

⁴² Mametyé, bôte ya Sikem be nga kômesan a ke mefup, Abimélék a wô'ô jame te.

⁴³ Nd'a nga nyoñ e nsamba bôte wé a kabe wô minnoñ mila a ke sobô mefup. Eyoñ a nga yen ane bôt be nga kui atane tison, ane a nga ke wosane be a bôé be.

⁴⁴ Abimélék a minnoñ mi bôt ba be be be nga wulu a tebe anyiine *mbé ya tison; nde minnoñ mibaé y'été mi nga kubu e be bôte bese be mbe mefube a bôé be.

⁴⁵ Abimélék a nga wosane fe tison tañe ngumba môs; ane a nga nyoñe je a wôé bôte bese be mbe été. Ane a nga mane tyame je a sôé nku e vôm tison éte é mbe (g).

⁴⁶ Eyoñe benya bôtô ya Sikem be nga wô'ô jame te, be nga ke e bibé bi né e *nda zambe Bérit été.

⁴⁷ Ane be nga kate Abimélék na benya bôtô bese ya beta tisone Sikem be maneya sulan.

⁴⁸ Nde Abimélék a nga bet e nkôle Salmôn, émien a bôt be mbe ngame jé. A nga nyoñ ôvôn e wo wé nde a nga ba'é ntyaé élé, a bete wô a beté wô étu; ane a nga jô bôte ya ngame jé na: Mi yeneya e jam ma te bo, bo'on avôle ya bo ane ma.

⁴⁹ A bôte bese be nga tyik, môt ase, ntyaé élé, a tôñ Abimélék; be nga dibe ébé a mintyaé bilé a di'i je a bôte bese be mbe été. Ajô te bôte bese ya beta tisone Sikem be nga mane wu. Bôt bebé toyini, befam a binga.

⁵⁰ Ane Abimélék a nga wosane fe Tébés. A nga bômane nye bita a nyoñe nye.

⁵¹ Beta ôlem a mbe ézezañe tison, befam a binga bese be nga ke sobô été a benya bôtô bese ya tison.

⁵² Ane Abimélék a nga tulan a kui vôm ôlem ô mbe; nde a nga wosane wô a subu bebé e *mbé na a futi nduan été.

⁵³ Nde minga éziñ a wua éfus ako'o ba ko'o bidi, de ve bi Abimélék e nlô a tya'a nye ékôkoé nlô.

⁵⁴ Awolo te ebien, Abimélék a nga loone ndômane môt é nga be'e nye biôme mewosan a jô nye na: Dutu'u nkpwaté mekône wôé a wôé ma, be za jô me na: Minga e nye a te wôé nye. Ane ndôman môt éte é nga jii nye nkpwaté mekôn, nde a nga wu.

⁵⁵ Eyoñe bôte y'Israél be nga yene na Abimélék a wuya, nde be nga bulan môt ase e *nda jé.

⁵⁶ Ajô te Zambe a nga bulan *abé Abimélék a nga bo ésaa e be émien éyoñ a nga wôé bobenyañ mewôme zamgbwa.

⁵⁷ A Zambe a nga bulane bôte ya Sikem *abé be nga bo e be bebien. Nalé ate biyo'é Yôtam, e mona Yérubal, bi nga tôéban e be be.